Renaimaciya zalına kirip bara jatqan däriger. I.S.Jekenova atındağı qalalıq klinikalıq jwqpalı aurular auruhanasınıñ Türksib audanındağı filialı. Säuir 2021 jıl. Almatı qalası. Foto: QT / Kültegin Aspanwlı

Bıltır küzden beri Qazaqstanda 4 mıñnan asa medqızmetkerge koronavirus jwqqan, 8 adam qaytıs bolğan. Däl sol twsta prezident Toqaev uäde etken memlekettik ötemaqı tölemi toqtap edi.

The Qazaq Times redakciyasınıñ swrau hatına bergen jauabında Densaulıq saqtau ministrligi 2020 jılğı 20 qazan men biılğı 31 naurız aralığında respublikada «koronavirus pen pnevmoniyağa 4087 medicina qızmetkeri şaldığıp, 8-i qaytıs bolğanın» habarladı.

Bıltır 21 qazanda densaulıq saqtau ministriniñ birinşi orınbasarı Marat Şoranov qızmet barısında koronavirus jwqtırğan nemese pnevmoniyağa şaldıqqan medicina qızmetkerlerine berilip kelgen birjolğı memlekettik ötemaqı toqtaytının mälimdegen.

Ministrlik ötemaqınıñ ükimettik deñgeyde toqtauına birneşe sebepti alğa tartadı.

«Vedomstvo men jergilikti atqaruşı organdarı barlıq medicina qızmetkerleriniñ qauipsiz eñbek jağdayın qamtamasız etuge qajetti barlıq şaranı qolğa alıp jatır. Medicinalıq wyımdar üş ayğa jetetin jeke qorğanış qwraldarımen tolıq qamtılğan. ...2021 jılğı 1  qañtardan bastap medicina qızmetkerleriniñ jalaqısı 30%-ğa deyin köterilgen jäne olardı vakcinaciyalau jürip jatır», – delingen resmi jauapta.

Dayındağan: QT. Derekköz: QR DSM

Ötemaqı beruge qabıldanatın ötinim toqtağalı medmamandar jwmıs kezinde sırqattanğan jağdayda käsipodaq jäne jergilikti atqaruşı organnıñ (äkimdik) esebinen «mümkindiginşe qoldau» alıp keledi deydi. Degenmen ministrlik ötken bes ayda medqızmetkerlerge tağayındalğan ötemaqı kölemi men sanın körsetpedi. Mwnı äkimdikterge siltedi.

Bwl turalı 2 säuir küngi brifingte Almatı qalasınıñ äkimi Baqıtjan Sağıntaev naqtı derek keltire almay, basqarmağa bağıttağan. «Eger qoğamdıq densaulıq saqtau basqarmasınan wsınıstar bolsa, qarastıruğa dayınbız. Qoldaudan qaşpaymız» degen. Küzden bergi esepti jazbaşa joldauğa uäde etip, sözi sol küyi jauapsız qaldı. Jergilikti bilik indet kezinde därigerlerdiñ jataqhana-qonaqüydegi twrısı men joljüris şığının kötergenin eske alıp qana qoyğan.

Qazirgi tañda qater jağdayında jwmıs isteytin medqızmetkerlerge jalaqığa qosımşa üstemaqı beriledi.

Sanitarlıq-epidemiologiyalıq baqılau komitetiniñ resmi ökili Erjan Baytanaevtıñ redakciyağa bergen mälimetinşe, bıltır naurız-qazan aylarındağı jağday boyınşa elde 14 460 (KVI+ 10 323, KVI- 4317) medicina qızmetkeri auırıp, derttiñ kesirinen 182 maman köz jwmğan. Komissiya 9309 mamannıñ tikeley käsibi qızmet barısında auırğanın rastap, ärqaysına uädeli 2 mln teñge köleminde ötemaqı töleuge şeşim şığarğan. Sonday-aq, 182 adamnıñ tuıstarına 10 mln teñgeden järdemaqı berilgen.

Tölemaqığa jauaptı DenMin men EñbekMin ötinimdi tirkeu jäne tölem tağayındau jwmısında sılbırlıq tanıtıp, sozbwydağa salğandıqtan parlament deputattarı jäne qoğam tarapınan qatañ sınğa wşırağan. Küzde narazı därigerlerdiñ şağımınan keyin Toqaev «üstemaqı men saqtandıru tölemderin alu kezinde äli künge deyin byurokratiyalıq tosqauıldar barın» moyındağan.

"The Qazaq Times"