رەنايماتسيا زالىنا كىرىپ بارا جاتقان دارىگەر. ي.س.جەكەنوۆا اتىنداعى قالالىق كلينيكالىق جۇقپالى اۋرۋلار اۋرۋحاناسىنىڭ تۇركسىب اۋدانىنداعى فيليالى. ءساۋىر 2021 جىل. الماتى قالاسى. فوتو: QT / كۇلتەگىن اسپانۇلى

بىلتىر كۇزدەن بەرى قازاقستاندا 4 مىڭنان اسا مەدقىزمەتكەرگە كوروناۆيرۋس جۇققان، 8 ادام قايتىس بولعان. ءدال سول تۇستا پرەزيدەنت توقاەۆ ۋادە ەتكەن مەملەكەتتىك وتەماقى تولەمى توقتاپ ەدى.

The Qazaq Times رەداكتسياسىنىڭ سۇراۋ حاتىنا بەرگەن جاۋابىندا دەنساۋلىق ساقتاۋ مينيسترلىگى 2020 جىلعى 20 قازان مەن بيىلعى 31 ناۋرىز ارالىعىندا رەسپۋبليكادا «كوروناۆيرۋس پەن پنەۆمونياعا 4087 مەديتسينا قىزمەتكەرى شالدىعىپ، 8-ءى قايتىس بولعانىن» حابارلادى.

بىلتىر 21 قازاندا دەنساۋلىق ساقتاۋ ءمينيسترىنىڭ ءبىرىنشى ورىنباسارى مارات شورانوۆ قىزمەت بارىسىندا كوروناۆيرۋس جۇقتىرعان نەمەسە پنەۆمونياعا شالدىققان مەديتسينا قىزمەتكەرلەرىنە بەرىلىپ كەلگەن بىرجولعى مەملەكەتتىك وتەماقى توقتايتىنىن مالىمدەگەن.

مينيسترلىك وتەماقىنىڭ ۇكىمەتتىك دەڭگەيدە توقتاۋىنا بىرنەشە سەبەپتى العا تارتادى.

«ۆەدومستۆو مەن جەرگىلىكتى اتقارۋشى ورگاندارى بارلىق مەديتسينا قىزمەتكەرلەرىنىڭ قاۋىپسىز ەڭبەك جاعدايىن قامتاماسىز ەتۋگە قاجەتتى بارلىق شارانى قولعا الىپ جاتىر. مەديتسينالىق ۇيىمدار ءۇش ايعا جەتەتىن جەكە قورعانىش قۇرالدارىمەن تولىق قامتىلعان. ...2021 جىلعى 1  قاڭتاردان باستاپ مەديتسينا قىزمەتكەرلەرىنىڭ جالاقىسى 30%-عا دەيىن كوتەرىلگەن جانە ولاردى ۆاكتسيناتسيالاۋ ءجۇرىپ جاتىر»، – دەلىنگەن رەسمي جاۋاپتا.

دايىنداعان: QT. دەرەككوز: قر دسم

وتەماقى بەرۋگە قابىلداناتىن ءوتىنىم توقتاعالى مەدماماندار جۇمىس كەزىندە سىرقاتتانعان جاعدايدا كاسىپوداق جانە جەرگىلىكتى اتقارۋشى ورگاننىڭ (اكىمدىك) ەسەبىنەن «مۇمكىندىگىنشە قولداۋ» الىپ كەلەدى دەيدى. دەگەنمەن مينيسترلىك وتكەن بەس ايدا مەدقىزمەتكەرلەرگە تاعايىندالعان وتەماقى كولەمى مەن سانىن كورسەتپەدى. مۇنى اكىمدىكتەرگە سىلتەدى.

بۇل تۋرالى 2 ءساۋىر كۇنگى بريفينگتە الماتى قالاسىنىڭ اكىمى باقىتجان ساعىنتاەۆ ناقتى دەرەك كەلتىرە الماي، باسقارماعا باعىتتاعان. «ەگەر قوعامدىق دەنساۋلىق ساقتاۋ باسقارماسىنان ۇسىنىستار بولسا، قاراستىرۋعا دايىنبىز. قولداۋدان قاشپايمىز» دەگەن. كۇزدەن بەرگى ەسەپتى جازباشا جولداۋعا ۋادە ەتىپ، ءسوزى سول كۇيى جاۋاپسىز قالدى. جەرگىلىكتى بيلىك ىندەت كەزىندە دارىگەرلەردىڭ جاتاقحانا-قوناقۇيدەگى تۇرىسى مەن ءجولجۇرىس شىعىنىن كوتەرگەنىن ەسكە الىپ قانا قويعان.

قازىرگى تاڭدا قاتەر جاعدايىندا جۇمىس ىستەيتىن مەدقىزمەتكەرلەرگە جالاقىعا قوسىمشا ۇستەماقى بەرىلەدى.

سانيتارلىق-ەپيدەميولوگيالىق باقىلاۋ كوميتەتىنىڭ رەسمي وكىلى ەرجان بايتاناەۆتىڭ رەداكتسياعا بەرگەن مالىمەتىنشە, بىلتىر ناۋرىز-قازان ايلارىنداعى جاعداي بويىنشا ەلدە 14 460 (كۆي+ 10 323, كۆي- 4317) مەديتسينا قىزمەتكەرى اۋىرىپ، دەرتتىڭ كەسىرىنەن 182 مامان كوز جۇمعان. كوميسسيا 9309 ماماننىڭ تىكەلەي كاسىبي قىزمەت بارىسىندا اۋىرعانىن راستاپ، ارقايسىنا ۋادەلى 2 ملن تەڭگە كولەمىندە وتەماقى تولەۋگە شەشىم شىعارعان. سونداي-اق، 182 ادامنىڭ تۋىستارىنا 10 ملن تەڭگەدەن جاردەماقى بەرىلگەن.

تولەماقىعا جاۋاپتى دەنمين مەن ەڭبەكمين ءوتىنىمدى تىركەۋ جانە تولەم تاعايىنداۋ جۇمىسىندا سىلبىرلىق تانىتىپ، سوزبۇيداعا سالعاندىقتان پارلامەنت دەپۋتاتتارى جانە قوعام تاراپىنان قاتاڭ سىنعا ۇشىراعان. كۇزدە نارازى دارىگەرلەردىڭ شاعىمىنان كەيىن توقاەۆ «ۇستەماقى مەن ساقتاندىرۋ تولەمدەرىن الۋ كەزىندە ءالى كۇنگە دەيىن بيۋروكراتيالىق توسقاۋىلدار بارىن» مويىنداعان.

"The Qazaq Times"