Foto: cdn23

Reseydiñ Ukraina şekarasındağı äskeri belsendiligi halıqaralıq qauımdastıqtardı alañdatıp otır. «Mäskeu atıstı toqtatu turalı kelisimdi öreskel bwzdı» degen Soltüstik Atlantikalıq al'yans, Euroodaq pen AQŞ Ukrainanıñ egemendigi men aumaqtıq twtastığın qoldaytının birneşe märte mälimdedi.

Qazir Reseydiñ twraqsızdandıruşı äreketteri Ukrainanıñ şığısındağı şielenisti uşıqtıra bastağan. Osığan baylanıstı Al'yans müşeleri 1 säuirde Qara teñizdegi jağdaydı talqıladı. NATO mälimetinşe, äskeriler qaqtığısı kezinde tört ukrain sarbazı qaza tapqan.

Germaniya men Franciyanıñ Sırtqı ister ministrleri taraptardı ıntımaqtastıq baylanıs ornatuğa şaqırıp, Reseyge eskertu jasadı. EO-nıñ sırtqı sayasat jäne qauipsizdik jönindegi Joğarğı ökili Jozep Borrel bwl mäseleni ukrain tarapımen Euroodaq elderi SİM basşılarınıñ tayaudağı sammitinde talqılauğa nietti.

Naurızdıñ soñında The New York Times gazeti Mäskeudiñ Ukraina şekarasına 4000-ğa juıq äsker jibergenin jazdı. Basılımnıñ mälimetinşe, Resey 23 naurızda ayaqtalğan äskeri jattığulardan keyin Ukraina şekarasına jaqın aymaqtan äsker şığarmağandıqtan, AQŞ pen Euroodaq bwl jağdaydı qatañ baqılauğa alğan. Sebebi şekarağa äsker jiberu – memlekettiñ qauipsizdigine nwqsan keltirui mümkin. Key sarapşılar Kreml'diñ eki el şekarasına sarbaz jiberuin «jaña soğısqa qadam» dep boljağan. 2036 jılğa deyin bilikte qalu mümkindigine ie bolğan Putin Qırım anneksiyasınan keyin Doneck, Lugansktı Federaciya qwramına qosıp alsa, «Jaña Resey» twjırımı qalıptasuı bek mümkin. Al bwl Putinniñ bilik etu merzimin tağı da wzartuğa mümkindik beredi.

Sonımen birge, äleumettik jelilerde Resey Bryansk, Voronej jäne Rostov oblıstarına, anneksiyalanğan Qırımğa da äskeriler jiberip jatqandığı turalı habarlamalar jariyalandı.

Bwl habarğa halıqaralıq qauımdastıqardıñ nazarı auğannan keyin Putinniñ baspasöz hatşısı Dmitriy Peskov 1 säuirde mälimdeme jasap, «Resey öz aumağında qarulı küşterdi qalay qoldanatının özi şeşedi jäne bwğan alañdauşılıq tanıtudıñ qajeti joq», – dedi.

Keyinnen London men Kiev şielenistiñ uşığuına jol bermeu maqsatında halıqaralıq seriktestermen Ukraina şekaralarındağı jağdaydı baqılauğa kelisti.

Resey Ukrainanıñ Qırım tübegin 2014 jılı naurızda zañsız anneksiyalap alıp, tübektegi äskeri äleuetin küşeyte bastağan. 2014 jılı kök'temde Ukrainanıñ şığısındağı Doneck jäne Lugansk oblıstarında reseyşil separatister men ükimet äskeri arasında qaqtığıs bastalğan.

Ukraina men Batıs elderi Mäskeudi separatisterge qoldau körsetip otır dep ayıptaydı. Biraq Kreml' mwnı joqqa şığaradı. Alayda, 2016 jılı qaraşada Halıqaralıq qılmıstıq sot Ukraina şığısındağı qaqtığıstı «Ukraina men Resey arasındağı halıqaralıq qarulı qaqtığıs» dep tanığan. Amerika men Euroodaq elderi Qırımdı Resey jeri retinde moyındağan emes.

"The Qazaq Times"