Körneki kollaj. Astana äkimdigi jäne onıñ basşısı Altay Kölginov. Foto: aşıq derekköz

Äleumettik jelilerdegi Ras Aitamyn zertteu arnası elorda "qızıl aymaqqa" enip, koronavirus indeti örşip jatqan twsta astana äkimdiginiñ memlekettik bağdarlamalar propagandası men viruspen küresti BAQ-ta nasihattau üşin byudjetten 287,5 million teñge jwmsamaq josparın anıqtadı.

"Memlekettik sayasattıñ äleumettik mañızdı jäne basım bağıttarın iske asıru, onıñ işinde koronavirus infekciyasımen küres jaylı gazette jäne basılım saytında aqparattıq materialdar äzirleu" attı tenderdi elordanıñ aktivter men memlekettik satıp alu basqarması jariyalap wyımdastırıp jatır, al tapsırıs beruşi – astananıñ işki sayasat basqarması.

Tender orıstildi jäne qazaqtildi basılımdarğa arnalğan eki lottan twradı. 287 mln 510 mıñ 428 teñge orıstildi jäne qazaqtildi basılımğa teñdey bölinbek.

Tenderdi wtıp alğan basılım eñ aldımen elbası, prezident, parlament, ükimet, elorda äkimdigi men mäslihattıñ jwmısı jäne prezident joldauındağı mindetterdiñ iske asıp jatqanın nasihattaydı. Sonımen qatar "densaulıq saqtau salasındağı (däri-därmekpen qamtamasız etuin jaqsartu, medicinalıq bilim berudi modernizaciyalau) memlekettik sayasattıñ äleumettik mañızdı jäne basım bağıttarın iske asıru men elordada koronovirus infekciyasına qarsı qabıldanıp jatqan is-şaralardı, qoğamdıq saqtıq şaralardı, halıqtı vakcinaciyalauğa aqparattıq qoldau" körsetedi.

Önim beruşi täuelsizdiktiñ 30 jıldığı men äbden jauır bolıp, tizesi şıqqan bağdarlamalar – "Eñbek", "Nwrlı jer", "Nwrlı köş", "Ruhani jañğıru", t.b. jaylı maqalalar jariyalaydı.

Astana äkimdigine tünegen köpbalalı jäne mümkindigi şekteuli balaları bar analardıñ aldına şığuğa jaramağan, uäjderin tıñdamağan Kölginovtiñ äkimdigi "Halıqtıñ äleumettik osal toptarın, ana men balanı qorğauğa arnalğan şaralar" men Tıñdauşı memleket" twjırımdaması jaylı materialdarğa da tapsırıs beripti.

Sonımen qatar aqparat qwralı bıltır Qorday janjalınan keyin bası dauğa qalıp, sınğa alınğan Qazaqstan halqı assambleyasınıñ is-şaraları men "Mäñgilik El" wlttıq patriottıq ideyasın jäne azamattıq wstanım boyınşa qazaqstandıq biregeylik pen birlikti nasihattaydı.

Önim beruşi işki sayasat basqarmasınıñ tapsırısımen maalalar negizinde 10-30 sekundtıq beynerolikter äzirlep, Youtube platformasında jariyalaydı.

Tenderge qatısatın basılımnıñ bir jolğı taralımı – 5 000 danadan kem emes, jiiligi – aptasına 3 retten kem emes, aptalıq taralımı - 15 000-nan kem emes, 8 betten kem emes, formatı – D2 boluı tiis. Bwl talaptarğa äkimdikke qarastı "Elorda Aqparat" JŞS-ğa kiretin "Astana aqşamı" men "Veçernyaya Astana" basılımdarı say keledi. Bwl tenderdi osı eki basılım aladı dep topşılaymız. Kölginovtiñ äkimdigi pandemiya bastalğalı beri bir jıldıñ işinde "Elorda Aqparat" JŞS-ğa 506 million teñge köleminde tender bölgen.

Jalpı, astana äkimdigi pandemiya bastalğalı beri propagandağa 1,3 milliard teñge jwmsağan.

Osılayşa astana äkimdigi koronaviruspen küresu üşin byudjettiñ 684 mıñ dollardan astam qarjısın densaulıq saqtau salası, tösek orındar qorına bağıttau ornına propagandağa jwmsamaq.

"The Qazaq Times"