Soltüstik Koreya soğıs rejimine ötti

Soltüstik Koreya basşısı Kim Çen In el astanası Pioñyañda (Phen'yan) evakuaciya jasap, bükil el köleminde soğıs rejimine dayındauğa bwyrıq berdi. Sonımen birge, Soltüstik Koreya 15 säuir küni eldiñ qwruşısı Kim Ir Senniñ tuılğan künine oray el köleminde merekelik şarağa dayındalıp jatır. Oñtüstik Koreya aqparat qwraldarı teristik körşileriniñ jerastı twraqtarına tasalanıp jatqanın habarlaydı. Sol eldegi şeteldik jurnalisterge aldağı ülken bir oqiğağa dayın boludı tapsırğan. Armiyağa soğıs rejimine ötu bwyırılıp, eldiñ är jerinde soğıs dabılı qağılğan. Bwl turalı Türkiya tele-radio ortalığınıñ resmi saytı, Koreya jäne Resey aqparat qwraldarına silteme jasap habarlağan bolatın.

Bügingi Korey tübeginiñ şielenisi soğısqa bet bwruda

Korey tübegi jağdayı künnen künge şielenisip keledi. Soltüstik Koreya yadrolıq qarudan bas tartpay qasarıssa, AQŞ äskeri ärekettermen döñaybat tanıtuda. Japon, Qıtay, Oñtüstik jäne Soltüstik Koreya, AQŞ, Resey müddeleri toğısıp jatqan Soltüstik Şığıs Aziyanıñ aldağı jağdayı ne bolmaq? Amerika alda qanday qadamdar jasauı mümkin? Süriya jağdayı Soltüstik Koreyada qaytalanuı mümkin be ?

9 säuir küni AQŞ memlekettik hatşısı Tillerson jurnalisterdi qabıldağanda, aldağı uaqıtta Tramp ükimetiniñ S.Koreyağa qanday äreketter qoldanatını turalı tis jarıp eşteñe aytpadı. Dese de, ol: «Eger S.Koreya yadrolıq sınaqtardı toqtatar bolsa, onda AQŞ kelissöz jürgizudi qoldaydı», – dedi. Al sodan bir kün bwrın Tillerson Süriyağa jasalğan şabuıl kezinde: «Bwl osı sekildi özge elderge jasalğan eskertu, eger halıqaralıq normalardı bwzuşılar bolsa, osınday jauap aladı», – degen bolatın. Bwl jerdegi özge elder degende meñzegeni  QHDR ekeni aydan anıq sekildi. Anığında Tramp ükimeti odan bwrın da eskertuler jasap kelgen bolatın.

Köz aldağı jağdayda mına bir elementterdi eskermey bolmaydı – Soltüstik Koreyanıñ BWW Qararın elemegeni ras. Ballistikalıq zımırandar men yadrolıq sınaqtardıñ köbeyui AQŞ pen onıñ odaqtastarın alañdatatın eñ bastı qauip. Ekinşi jağınan AQŞ biligi Tramptıñ bilikke kelui «Amerika birinşi» ideyasın oyatıp, älemniñ är twsında AQŞ bedeli men ıqpalın arttıruğa ärekettenip otır. Soltüstik Koreyağa batıl äskeri şaralar qabıldauı da sonıñ bastı däleli. Odan sırt, AQŞ-Oñtüstik Koreya arasında wzaq uaqıttan beri Soltüstik Koreyağa qarsı äskeri äreketterdiñ josparları bar. Bwl Tramptıñ özine degen senimin arttırıp otır.

Soltüstik Koreya ekinşi Süriya bola ma?

Oñtüstik Koreyadağı «Asan» sayasattı zertteu institutı ötken jıldıñ soñında qortındı jasap, Respondentterdiñ 43,2 payızı dağdarıstı şeşu üşin Soltüstik Koreyağa şabuıl jasau kerek dep qaraytının aytqan edi. Küş qoldanuğa qarsı twratındar bwrınğığa qarağanda 9 payızğa köbeygen. Äskeri is-qimıldıñ tuılu mümkindigi soñğı 30 jıldağı eñ joğarı şekke jetti dep körsetedi atalğan institut.

Al key sarapşılar Soltüstik Koreyağa qarsı ülken qadam jasau üşin AQŞ-qa asa saqtıqtıñ qajet ekenin eskertedi. Sebebi, Soltüstik Koreya Süriyağa wqsamaydı. Eger Süriyadağıday zımıran şabuılı S. Koreyağa jasalatın bolsa, onda onıñ zardabın mölşerleudiñ özi qauipti dep otır. Älemde S.Koreya şın mänisinde yadrolıq qaruğa ie el dep eseptelinedi. Bwl atalğan eldi Süriyadan biiktetip twrğanı anıq. Oğan qosa elde oppoziciyalıq küş joq boluı sebepti Soltüstik Koreya özine jasalğan şabuıldı twtas el bolıp qabıl aladı. Sondıqtan Amerikağa äli de salmaqtıraq oylanuı kerek deydi. AQŞ aviamatkasınıñ S.Koreya irgesine kelui üreylendiruden köri, äskeri şabuılğa köbirek wqsaydı. Al, KHDR bwğan şın-ötirigi belgisiz eş qorıqpaytının ayttı. Olar da qatañ şara qoldanıp, AQŞ-qa pärmendi jauap beremiz dep otır.

Osı jerde Soltüstik Koreyanıñ wlttıq ideologiyasın da eskermey bolmaydı. Twtastay qatañ rejimge bağındırılğan teristik koreylerde soğıs şığının esepteu, şın mänisindegi soğıs jeñisine degen tanım basqaşa. Mwnday tanımdı «jabayı soğıs tanımı» deuge boladı. YAğni, soğıs zardabımen eseptespeu, tek qarsı jağın joyıp jiberu üşin soğıs jürgizu. Ekinşi dünie soğısı kezinde Keñes odağı tap osınday soğıs jürgizgen bolatın. Soğıs şığını men onıñ elge tigizgen zardabınıñ qasında, Berlinge basıp kiru sındı jeñis tükke de twrmaydı. Al bügin AQŞ soğıs aşar bolsa, Teristik Koreya da şamasın salıstırıp jatpay-aq, soqır soğıstı ğana taldap şığadı.

Qalay bolğan künde de Korey tübegindegi qaterdiñ artuımen birge, älemge de yadrolıq soğıstıñ qaupi küşeyip keledi. Soltüstik Koreya ekinşi Süriya bolması anıq. Biraq, Korey tübegindegi soğıs biltesi twtansa, onıñ şarpitın aumağı Süriya mäselesinen äldeqayda keñ bolmaq. Mäsele ülken deñgeydegi soğıs älemniñ qay öñirinde bolsa da, tüpki müddesi alpauıttarğa barıp tireletininde. YAdrolıq soğıs älem alpauıttarın eriksiz ülken alañğa alıp kiredi. Bwl soğısta jeñuşi bolmaydı, al jeñiluşi adamzat qoğamı boladı.

“The Qazaq Times”