Fotokollaj: tengrinews.kz

AQŞ Naval'nıy isine baylanıstı Reseyge qarsı sankciya engizip, ekonomika, qorğanıs salasında kömek körsetu bağdarlamaların toqtattı. Sankciya 1991 jılı qabıldanğan «Himiyalıq jäne biologiyalıq qarudı baqılau jäne onı qoldanuğa tıyım salu turalı» zañ ayasında jüzege asıp otır. Bwl turalı Memlekettik departamenttiñ jazbaşa mälimdemesinde aytılğan.

Qwjatta: «AQŞ Resey ükimetiniñ «Himiyalıq qaruğa tıyım salu turalı» Konvenciyanı bwzıp, öz azamattarına qarsı himiyalıq qaru qoldanğanın anıqtadı. Nätijesinde, Kongresstiñ 15 kündik habarlama merzimi ayaqtalğannan keyin jaña sankciyalar jüzege asadı», – delingen. Endi Vaşington Mäskeuge şwğıl gumanitarlıq kömekti qospağand, 1961 jılı qabıldanğan Zañ boyınşa ekonomikalıq jağınan kömek körsetudi toqtatadı. Sonday-aq, AQŞ Reseyge kez kelgen qorğanıs önimderin satudı jäne eksporttaudı, qaru-jaraq eksportına licenziyalar men rwqsattar berudi de toqtattı.

Sankciyadan keyin Reseyge şeteldik äskeri qarjılandırudı közdeytin AQŞ-tıñ barlıq bağdarlamsı küşin joydı. Vaşington, sonımen birge, Mäskeuge AQŞ ükimetiniñ ministrlikteri men basqarmaları, onıñ işinde eksport-import banki arqılı nesie nemese basqa qarjılıq kömek beruden de bas tartadı. Amerikadan Reseyge «Wlttıq qauipsizdik üşin mañızdı tauarlar men tehnologiyalardı eksporttauğa» da şekteuler engizilude.

Resmi mälimdemede Memlekettik departament 1991 jılğı Zañğa säykes 2018 jılğı naurızda bwrınğı barlau qızmetkeri Sergey Skripal' men onıñ qızı YUliyağa qatıstı jağdaydan keyin Reseyge alğaş ret engizilgen sankciyalar tizimin arttırdı. Joğarıda atalğan şekteulerden bölek, AQŞ-tıñ sırtqı sayasat bölimi Reseydi «qorğanıs salası boyınşa qoldau körsetilmeytin elder tizimine» qostı.

Sankciyalardıñ qoldanılu merzimi

Reseyge qarsı engizilgen sankciyalar kem degende 12 ay zakñdı küşinde boladı. AQŞ Sırtqı ister ministrligi eger Resey ükimeti «Himiyalıq jäne biologiyalıq qarudı baqılau jäne onı qoldanuğa tıyım salu turalı» zañda belgilengen birneşe şarttardı orındasa, sankciyalar jeñildeytinin ayttı. Mwnımen qatar, Resey BWW baqılauşılarınıñ öz aumağında tiisti tekseruler jürgizuine mümkindik berui tiis.

Osı aptada AQŞ Memlekettik departamenti FSB, Resey memlekettik Organikalıq himiya jäne tehnologiya ğılımi-zertteu institutı, 33-şi Ortalıq ğılımi-zertteu institutı, Resey Federaciyası Qorğanıs ministrliginiñ 27-şi ğılımi ortalığı, Resey Qarulı Küşteri Bas ştabınıñ bas keñsesi, sonday-aq reseylik Ruslan Boşirov pen Aleksandr Petrovtıñ vizalarına şekteuler engizdi. Olardıñ barlığı seysenbide AQŞ Qarjı ministrliginiñ qara tizimine engen.

Osı aptada Euroodaqtıñ twraqtı ökilderi oppoziciyalıq sayasatker Aleksey Naval'nıydı qudalauğa qatısı bar delingen tört reseylik şeneunikke sankciya saludı maqwldadı. Bwğan deyin Resey sırtı ister ministri Sergey Lavrov «Bryussel' sankciyanı küşeytse, Mäskeu EO-men qatınastı üzuge dayın» degen. Resey biligi EO-nı eldiñ işki isine aralastı dep ayıptap, oppoziciyalıq sayasatkerdiñ qamaluına sayasattıñ qatısı joğın aytqan.

Euroodaq engizetin şekteuler Resey tergeu komitetiniñ basşısı, federaldıq qılmıstıq jazanı atqaru qızmetiniñ direktorı, Rosgvardiya bastığı, bas prokurına qatıstı. Reseyde tergeu komitetin – Aleksandr Bastrıkin, Rosgvardiyanı – Viktor Zolotov, federaldıq qılmıstıq jazanı atqaru qızmetin – Aleksandr Kalaşnikov basqaradı.

Sarapşılardıñ pikirinşe, Bayden äkimşiliginiñ bwl şeşimi Mäskeuge «küşti signal» bolmaq. Bwğan deyingi AQŞ prezidenti Naval'nıydıñ ulanuı men qamaluına baylanısı Reseymen dialog jürgizbegen. Demek, Bayden adam qwqıqtarı mäselesinde Tramptıñ sayasatın jalğastırmaydı. Bwl jolı sankciyalardan keyin Resey keybir eksporttıq licenziyalarınan ayırıluı mümkin.

"The Qazaq Times"