Qırğız prezidenti Sadır Japarov Reseydegi memlekettik saparın bastadı. Bwl onıñ prezident retinde alğaşqı şetel saparı. Ol RF prezidenti Putin jäne birqatar ükimet jetekşilerimen kezdesudi josparlağan. Japarov Reseyden keyin Qazaqstanğa saparlay keletinin onıñ bas diplomatı Ruslan Qazaqbaev mälimdegen.

 Qırğızstan SİM jetekşisi Ruslan Qazaqbaev BBC qırğız qızmetine bergen jauabında Sadır Japarovtıñ Reseydegi saparında sayasi mäseleler bastı küntärtipte bolatının aytqan. Bwğan qosa, Euraziya Damu qorınan 100 mln dollar jeñildetilgen nesie alu mäselesi men jılsayınğı Qırğızstanğa beriletin granttardı alu boyınşa söylesedi. Qırğızstan sırtqı ister ministriniñ aytuınşa, sapar tobı Reseymen import-eksport mäselelerin de qarastırmaq. Bwdan basqa da qol qoyılatın kelisimder men söylesetin taqırıptar da bar.

10 qañtarda ötken saylaudan keyin Qazaqstan prezidenti Qasım-Jomart Toqaev Sadır Japarovqa alğaşqılardıñ biri bolıp telefon soğıp saylaudağı jeñisimen qwttıqtağanın jäne qazaq eline resmi saparmen keluge wsınıs etkenin Aqorda saytı jazğan edi. Habarda Sadır Japarovtıñ qırğız prezidenti retinde alğaşqı resmi saparın Qazaq elinen bastaytını da aytılğan bolatın. Japarovtıñ alğaşqı şeteldik saparı Reseyde bolatını belgili bolğannan keyin Qazaqstan men Qırğızstandağı keybir aqparat qwraldarı bwğan nazar audarğanı belgili.

Bwl turalı tüsinik bergende Qazaqbaev: «Anıqtay ketu kerek, alğaşqı şaqıru Resey prezidenti Vladimir Putinnen kelip tüsti. Sonımen qatar, bilesizder halıqaralıq masştabtağı täjiribeli diplomat Qasım-Jomart Kemelwlı birinşi resmi saparmen bir tuğan Qazaq eline kelip ketiñiz degen wsınıs jasağan. Protokol boyınşa Resey saparınan keyin alğaşqı resmi sapar Qazaqstanğa jasaladı. Mwnday wsınıs Özbekstan prezidenti Şavkat Mirzeevten de kelgen bolatın. Bwyırsa kezek-kezegimen saparımızdı jalğastıramız», – dep tüsindirgen.

Qırğızstan SİM basşısınıñ aytuınşa Sadır Japarovtıñ Qazaqstanğa saparı naurız ayınıñ bas şenine josparlanıp jatır.

“The Qazaq Times”