جاپاروۆ ساپارىن رەسەيدەن باستادى. فوتو: كازتاگ

قىرعىز پرەزيدەنتى سادىر جاپاروۆ رەسەيدەگى مەملەكەتتىك ساپارىن باستادى. بۇل ونىڭ پرەزيدەنت رەتىندە العاشقى شەتەل ساپارى. ول رف پرەزيدەنتى پۋتين جانە بىرقاتار ۇكىمەت جەتەكشىلەرىمەن كەزدەسۋدى جوسپارلاعان. جاپاروۆ رەسەيدەن كەيىن قازاقستانعا ساپارلاي كەلەتىنىن ونىڭ باس ديپلوماتى رۋسلان قازاقباەۆ مالىمدەگەن.

 قىرعىزستان ءسىم جەتەكشىسى رۋسلان قازاقباەۆ BBC قىرعىز قىزمەتىنە بەرگەن جاۋابىندا سادىر جاپاروۆتىڭ رەسەيدەگى ساپارىندا ساياسي ماسەلەلەر باستى كۇنتارتىپتە بولاتىنىن ايتقان. بۇعان قوسا، ەۋرازيا دامۋ قورىنان 100 ملن دوللار جەڭىلدەتىلگەن نەسيە الۋ ماسەلەسى مەن جىلسايىنعى قىرعىزستانعا بەرىلەتىن گرانتتاردى الۋ بويىنشا سويلەسەدى. قىرعىزستان سىرتقى ىستەر ءمينيسترىنىڭ ايتۋىنشا، ساپار توبى رەسەيمەن يمپورت-ەكسپورت ماسەلەلەرىن دە قاراستىرماق. بۇدان باسقا دا قول قويىلاتىن كەلىسىمدەر مەن سويلەسەتىن تاقىرىپتار دا بار.

10 قاڭتاردا وتكەن سايلاۋدان كەيىن قازاقستان پرەزيدەنتى قاسىم-جومارت توقاەۆ سادىر جاپاروۆقا العاشقىلاردىڭ ءبىرى بولىپ تەلەفون سوعىپ سايلاۋداعى جەڭىسىمەن قۇتتىقتاعانىن جانە قازاق ەلىنە رەسمي ساپارمەن كەلۋگە ۇسىنىس ەتكەنىن اقوردا سايتى جازعان ەدى. حاباردا سادىر جاپاروۆتىڭ قىرعىز پرەزيدەنتى رەتىندە العاشقى رەسمي ساپارىن قازاق ەلىنەن باستايتىنى دا ايتىلعان بولاتىن. جاپاروۆتىڭ العاشقى شەتەلدىك ساپارى رەسەيدە بولاتىنى بەلگىلى بولعاننان كەيىن قازاقستان مەن قىرعىزستانداعى كەيبىر اقپارات قۇرالدارى بۇعان نازار اۋدارعانى بەلگىلى.

بۇل تۋرالى تۇسىنىك بەرگەندە قازاقباەۆ: «انىقتاي كەتۋ كەرەك، العاشقى شاقىرۋ رەسەي پرەزيدەنتى ۆلاديمير پۋتيننەن كەلىپ ءتۇستى. سونىمەن قاتار، بىلەسىزدەر حالىقارالىق ماسشتابتاعى تاجىريبەلى ديپلومات قاسىم-جومارت كەمەلۇلى ءبىرىنشى رەسمي ساپارمەن ءبىر تۋعان قازاق ەلىنە كەلىپ كەتىڭىز دەگەن ۇسىنىس جاساعان. پروتوكول بويىنشا رەسەي ساپارىنان كەيىن العاشقى رەسمي ساپار قازاقستانعا جاسالادى. مۇنداي ۇسىنىس وزبەكستان پرەزيدەنتى شاۆكات ميرزەەۆتەن دە كەلگەن بولاتىن. بۇيىرسا كەزەك-كەزەگىمەن ساپارىمىزدى جالعاستىرامىز»، – دەپ تۇسىندىرگەن.

قىرعىزستان ءسىم باسشىسىنىڭ ايتۋىنشا سادىر جاپاروۆتىڭ قازاقستانعا ساپارى ناۋرىز ايىنىڭ باس شەنىنە جوسپارلانىپ جاتىر.

“The Qazaq Times”