NATO keşe, 17 aqpan küni öziniñ kezekti qorğanıs ministrler keñesin ötkizdi. Jinalısta 30-dan astam müşesi bar älemdegi eñ ülken qorğanıs bağıtındağı wyımnıñ aldağı bastı problemaları talqılandı. Bayden ükimeti bwl jiınğa alğaş ret qatıstı. Pentagonnıñ resmi ökili habarlağanda, NATO jiınında Qıtaydıñ sın-qaterlerine qalay tötep beru mäselesi de qaralğan.

Pentagon NATO-nıñ soñğı eki jıldağı Qıtay qaterine qarsı äreketterin joğarı bağalap otır. Biraq, jaña strategiyalardı jüzege asıru üşin äli de köp jwmıs isteu kerek dep sanaydı. Pentagon ökili sözinde: «Geosayasi jağdaylardıñ özgerisine baylanıstı NATO Qıtay mäselesin birinşi küntärtipke qoyuı tiis», – degen.

Pentagon ökili men NATO bas hatşısı baspasöz jiınında. Foto: VOA.

NATO müşeleriniñ qorğanıs ministrleri qatısatın jiında Qıtay taqırıbınıñ keñ kölemdi talqılanatının wyımnıñ bas hatşısı bwğan deyin de habarlağan edi. Yens Stoltenberg onıñ sebebin Qıtay men Resey erejelerge negizdelgen halıqaralıq tärtipke qauip töndirip otır dep tüsindirgen edi. Sonday-aq, wyımnıñ bas hatşısı Resey men Qıtaydıñ  avtoritarlıq quğın-sürgindi aşıq jasap otırğanın ayıptadı. Ol NATO äskeri mäselelerdi ğana emes, ekonomika men tehnologiya siyaqtı qauipsizdikke ayqın äser etetin köptegen mäselelerdi talqılauı kerek ekenin de söz etken.

NATO bas hatşısınıñ söziniñ auanına qarağanda, bwdan keyin ıqpaldı wyımnıñ qimıl auqımı keñeymek. Qorğanıs salasımen şektelmey, ekonomika, sauda jäne halıqaralıq qatınastarda Resey men Qıtaydıñ ıqpaldarına qarsı äreket etui mümkin. Onıñ üstine NATO öziniñ sayasatı özgergeni de bayqaladı, yağni, bwdan keyin NATO «Keñirek konsul'taciyalar» degen ädispen jwmıs istemek. Bwnı Yens Stoltenberg aşalap tüsindirip ketken. Bılayşa aytqanda, Qıtay men Reseydiñ ıqtimal qauip-qaterine qarsı äreket etude öz serikterimen anağıwrlım tığıs keñesip şeşetin boladı.

NATO wyımın prezident Tramp köbirek sınğa alğan bolatın. Ol bwl wyımdı «eskirgen odaq» dep te aytqanı bar. Oğan qosa Tramp wyımğa bölinetin qarjılardıñ är elge birdey emes ekenine narazılığın da bildirgen bolatın. Bayden biligi kezekti keñeske alğaş ret qatıstı, onıñ komandasınan Pentagon tizginin qolına wstağan Lloyd Ostin NATO keñesinde äriptesterimen jolıqtı. AQŞ pen NATO mälimdemelerine qarap, Tramp kezindegidey emes ıntımaqtastıq tereñdey tüsui mümkin dep boljauğa boladı. Bwğan qosa NATO aldağı uaqıtta Reseydi ğana emes Qıtay mäselesin de bastı taqırıpqa qoyıp, Qıtay ıqpalına qarsı äreket ete bastaytını bayqaladı.

“The Qazaq Times”