12 اقپان جۇما كۇنى كەنتاۋ قالاسىندا كاسىپورىن جۇمىسشىلارى مەن اقتوبەدە قوعامدىق كولىك جۇرگىزۋشىلەرى ەرەۋىلگە شىقتى.

تۇركىستان وبلىسى كەنتاۋ قالاسىنداعى ترانسفورماتور زاۋىتىنىڭ ونداعان جۇمىسشىسى جالاقىنى كوتەرۋدى تالاپ ەتىپ، نارازىلىق جيىن وتكىزگەن. مۇنى زاۋىت باسشىلىعى ازاتتىققا راستاعان.

اقپارات قۇرالى جۇمىسشىلاردىڭ پرەزيدەنت توقاەۆقا ۆيدەو ۇندەۋ جولداعانىن حابارلادى. ولار ەڭبەكاقىنى ءوسىرۋدى تالاپ ەتكەن. تۇسكە دەيىن جالعاسقان ەرەۋىلگە قاتىسۋشىنىڭ ءبىرى «كاسىپورىن باسشىلىعى قاڭتار ايىندا كەيبىر جۇمىسشىلاردىڭ جالاقىسىن 60 مىڭ تەڭگەگە دەيىن كەمىتىپ جىبەرگەن، بۇعان باسقالارى نارازىلىق ءبىلدىردى» دەگەن.

كەنتاۋ ترانسفورماتور زاۋىتىنىڭ ديرەكتورى حايروللا قوجاباەۆتىڭ ازاتتىققا ايتۋىنشا، جالاقى جۇمىستىڭ اۋىرلىعى مەن ۋاقىتىنا قاراي بەلگىلەنەدى. جۇمىسشىلاردىڭ ورتاشا جالاقى – 156 مىڭ تەڭگە. ەرەۋىلگە 120 مىڭ تەڭگە جالاقى الاتىن جۇمىسشىلار شىققان.

مىڭنان استام جۇمىسشىسى بار زاۋىت باستىعى قوجاباەۆ «تۇسكە دەيىن جۇمىسشىلارمەن سويلەسىپ ايلىق جالاقىلارىن 150 مىڭ تەڭگەگە كوتەرۋگە شەشىم شىعاردىق» دەپ مالىمدەگەن.

كەنتاۋ ترانسفورماتور زاۋىتى جۇمىسشىلارىنىڭ ەرەۋىلى. تۇركىستان وبلىسى، 12 اقپان 2021 جىل. فوتو: ازاتتىق راديوسىنا جولدانعان ۆيدەودان سكرين-قيىندى

ءدال وسىعان ۇقساس ەڭبەك داۋىمەن اقتوبەدە «جولاۋشىلار اۆتوكولىك كاسىپورنىنىڭ» جۇزگە جۋىق جۇرگىزۋشىسى بۇگىن قارسىلىق اكتسياسىن وتكىزگەن. قالا مەن ماڭايىندا 19 باعىت بويىنشا جولاۋشى تاسىمالدايتىن جۇرگىزۋشىلەر جالاقىنى 200 مىڭ تەڭگەگە دەيىن ءوسىرۋدى، ەڭبەك جاعدايىن جاقسارتۋدى تالاپ ەتتى. جۇمىسشىلار نارازىلىعىنىڭ سالدارىنان مىڭداعان جولاۋشى مەجەلى جەرىنە دەر كەزىندە جەتە الماي ابىگەرلەنگەن.

ايتپەگەندە جۇمىسقا شىقپايتىنىن جەتكىزگەن جۇرگىزۋشىلەردىڭ مۇڭىن ازاتتىق تىڭداعان. نارازىلاردىڭ ءبىرى بەكزات ايازباەۆ كاسىپورىن باسشىلىعىنان «اپتاسىنا 400 مىڭ تەڭگەدەن استام پلان وتكىزسە دە، نەلىكتەن ايلىعى 32 مىڭ ەكەنىن، جارتى جىلدان بەرى زەينەتاقى مەن مەديتسينالىق ساقتاندىرۋعا جارنا تۇسپەگەنىن» سۇرادى. جۇمىسشىلاردىڭ سوزىنشە، ەڭبەك ماسەلەسى شاش ەتەكتەن. جالاقى ۋاقىتىلى بەرىلمەيدى، كولىك بۇزىلسا جۇمىسشى شىعىندالادى، جوسپار نەگىزسىز كوبەيتىلدى، زەينەتاقى اۋدارىمى تولەنبەيدى، كوندۋكتوردى جۇرگىزۋشى جالدايدى دەگەن جۇرت قاپالى.

كومپانيا ديرەكتورىنىڭ مىندەتىن اتقارۋشى ەسبول ساتاەۆ بۇل ماسەلەگە مەملەكەتتەن سۋبسيديا مەن كومپەنساتسيا تولەنبەۋى سەبەپ دەيدى. تاڭعى بەستە باستالعان ەرەۋىلگە ساعات 9-دار كەزىندە كەلگەن اقتوبە قالاسىنىڭ اكىمى اسحات شاحاروۆ «ماسەلەنى شەشەمىن» دەپ ۋادە بەردى. بىراق قالاي شەشەتىنىن ايتپادى.

قازاقستاندا الەۋمەتتىك جانە ەڭبەك ساياساتى جەتىلمەگەندىكتەن، ەلدىڭ ءار ايماعىندا ءتۇرلى سالاداعى ماماندار ءجيى نارازىلىققا شىعىپ، لاجسىز پرەزيدەنت اتىنا ۇندەۋ جاساپ جاتادى. جۋىردا عانا شىمكەنتتە Shymkent bus,  اقتوبەدە «ساعىز پەترولۋەم»، «كمك مۇناي» مەن «امك مۇناي» كومپانيالارىنىڭ جۇمىسشىلارى ەرەۋىلدەتكەن. بۇعان دەيىن قازاقستاننىڭ جاڭا تاريحىندا بيلىكتىڭ ءوز ازاماتتارىنا وق اتۋىمەن اياقتالعان 2011 جىلعى جاڭاوزەن قاندى وقيعاسى دا ەڭبەك داۋىنان باستالعان ەدى.

"The Qazaq Times"