Qazaqstan prezidenti Qasım-Jomart Toqaev. Foto: www.inform.kz

Qasım-Jomart Toqaev Ükimettiñ keñeytilgen otırısında Densaulıq saqtau ministrligine halıqtı koronavirusqa qarsı vakcinaciyalaudıñ egjey-tegjeyli josparı boluı qajettigin eskertti. Vakcinaciya eldegi epidemiologiyalıq jağdaydı tüzetuge kömektesedi dep ümit bildirgen Toqaev «otandıq ekpe qabıldaytının» da ayttı.

«Birinşi mäsele – medicinalıq mekemelerdiñ vakcinaciya jürgizuge dayındığı. Ekinşisi – densaulıq saqtau ministrligi men memlekettik organdardıñ ne istep jatqanın tüsindiru jwmıstarı. Azamattardı vakcinaciyalau boyınşa bayıptı, egjey-tegjeyli jwmıs josparı qajet. Vakcinaciya – bwl özekti mäsele. Bizge vakcina egu boyınşa mwqiyat qarastırılğan iri jospar kerek. Haosqa jol bermes üşin köptegen nyuanstardı eskeru qajet. Vakcinaciya epidemiologiyalıq jağdaydı tüzetui kerek», –  dedi Toqaev.

Medicinalıq mekemeler barlığı dayın dep sendirgen ministr Coydıñ aytuınşa, eldegi alğaşqı vakcina «Sputnik-V» boladı. Sonımen qatar, klinikalıq sınaqtıñ üşinşi kezeñinde sınalıp jatqan qazaqstandıq QazCovid-in vakcinası da qoldanılmaq. Ol 19 jeltoqsannan bastap 3 mıñ eriktige salına bastağan.

DenMin jıl ayağına deyin 6 million adamğa vakcina saludı josparlap otır. YAğni ekpe birinşi kezekte infekciyalıq auruhana, jedel järdem, reanimaciya bölimi, auruhananıñ qabıldau bölmesinde isteytin qızmetkerlerge salınbaq. Al säuirden bastap jalpı bilim beretin mektep, joğarı oqu orındarı, medicinalıq qızmet körsetetin mekeme mamandarına vakcina egiledi.

Tamızda qazaqstandıq «SK-Farmaciya» sınaqtıñ soñğı üşinşi kezeñinen tolıq ötpegen Reseydiñ tike investiciya qorımen koronavirus vakcinasın alu turalı kelisimge qol qoyğan. Sol kezde Vladimir Putin Reseydiñ älemde birinşi bolıp koronavirus infekciyasına qarsı vakcinanı tirkegenin habarlağan edi. Putin sözinde ekpeniñ öte tiimdi jwmıs isteytinin, twraqtı immundıq jüyeni qalıptastıratının jäne barlıq qajetti tekserulerden ötkenin atap ötti.

Biraq keybir batıs sarapşıları men jergilikti mamandar sınaqtan tolıq ötpegen vakcinanıñ qauipsizdigine kümän keltirgen bolatın. Sonımen qatar Reuters agenttigi preparat virustıñ mutaciyalanuına jol aşuı mümkin degen. Biraq Resey tarapı bwl aqpardı joqqa şığardı.

"The Qazaq Times"