قاسىم-جومارت توقاەۆ ۇكىمەتتىڭ كەڭەيتىلگەن وتىرىسىندا دەنساۋلىق ساقتاۋ مينيسترلىگىنە حالىقتى كوروناۆيرۋسقا قارسى ۆاكتسيناتسيالاۋدىڭ ەگجەي-تەگجەيلى جوسپارى بولۋى قاجەتتىگىن ەسكەرتتى. ۆاكتسيناتسيا ەلدەگى ەپيدەميولوگيالىق جاعدايدى تۇزەتۋگە كومەكتەسەدى دەپ ءۇمىت بىلدىرگەن توقاەۆ «وتاندىق ەكپە قابىلدايتىنىن» دا ايتتى.
«ءبىرىنشى ماسەلە – مەديتسينالىق مەكەمەلەردىڭ ۆاكتسيناتسيا جۇرگىزۋگە دايىندىعى. ەكىنشىسى – دەنساۋلىق ساقتاۋ مينيسترلىگى مەن مەملەكەتتىك ورگانداردىڭ نە ىستەپ جاتقانىن ءتۇسىندىرۋ جۇمىستارى. ازاماتتاردى ۆاكتسيناتسيالاۋ بويىنشا بايىپتى، ەگجەي-تەگجەيلى جۇمىس جوسپارى قاجەت. ۆاكتسيناتسيا – بۇل وزەكتى ماسەلە. بىزگە ۆاكتسينا ەگۋ بويىنشا مۇقيات قاراستىرىلعان ءىرى جوسپار كەرەك. حاوسقا جول بەرمەس ءۇشىن كوپتەگەن نيۋانستاردى ەسكەرۋ قاجەت. ۆاكتسيناتسيا ەپيدەميولوگيالىق جاعدايدى تۇزەتۋى كەرەك»، – دەدى توقاەۆ.
مەديتسينالىق مەكەمەلەر بارلىعى دايىن دەپ سەندىرگەن مينيستر تسويدىڭ ايتۋىنشا، ەلدەگى العاشقى ۆاكتسينا «سپۋتنيك-V» بولادى. سونىمەن قاتار، كلينيكالىق سىناقتىڭ ءۇشىنشى كەزەڭىندە سىنالىپ جاتقان قازاقستاندىق QazCovid-in ۆاكتسيناسى دا قولدانىلماق. ول 19 جەلتوقساننان باستاپ 3 مىڭ ەرىكتىگە سالىنا باستاعان.
دەنمين جىل اياعىنا دەيىن 6 ميلليون ادامعا ۆاكتسينا سالۋدى جوسپارلاپ وتىر. ياعني ەكپە ءبىرىنشى كەزەكتە ينفەكتسيالىق اۋرۋحانا، جەدەل جاردەم، رەانيماتسيا ءبولىمى، اۋرۋحانانىڭ قابىلداۋ بولمەسىندە ىستەيتىن قىزمەتكەرلەرگە سالىنباق. ال ساۋىردەن باستاپ جالپى ءبىلىم بەرەتىن مەكتەپ، جوعارى وقۋ ورىندارى، مەديتسينالىق قىزمەت كورسەتەتىن مەكەمە ماماندارىنا ۆاكتسينا ەگىلەدى.
تامىزدا قازاقستاندىق «سك-فارماتسيا» سىناقتىڭ سوڭعى ءۇشىنشى كەزەڭىنەن تولىق وتپەگەن رەسەيدىڭ تىكە ينۆەستيتسيا قورىمەن كوروناۆيرۋس ۆاكتسيناسىن الۋ تۋرالى كەلىسىمگە قول قويعان. سول كەزدە ۆلاديمير پۋتين رەسەيدىڭ الەمدە ءبىرىنشى بولىپ كوروناۆيرۋس ينفەكتسياسىنا قارسى ۆاكتسينانى تىركەگەنىن حابارلاعان ەدى. پۋتين سوزىندە ەكپەنىڭ وتە ءتيىمدى جۇمىس ىستەيتىنىن، تۇراقتى يممۋندىق جۇيەنى قالىپتاستىراتىنىن جانە بارلىق قاجەتتى تەكسەرۋلەردەن وتكەنىن اتاپ ءوتتى.
بىراق كەيبىر باتىس ساراپشىلارى مەن جەرگىلىكتى ماماندار سىناقتان تولىق وتپەگەن ۆاكتسينانىڭ قاۋىپسىزدىگىنە كۇمان كەلتىرگەن بولاتىن. سونىمەن قاتار Reuters اگەنتتىگى پرەپارات ۆيرۋستىڭ مۋتاتسيالانۋىنا جول اشۋى مۇمكىن دەگەن. بىراق رەسەي تاراپى بۇل اقپاردى جوققا شىعاردى.
الماتى وبل پركۋراتۋراسى. بەلسەندىلەر: «جالعان جالامەن قاماۋداعى ايگەرىم مەن دۋمانعا بوستاندىق!»
ارمان الىمبەكوۆ: مەن ول جەردىڭ رەزيدەنتسيا ەكەنىن بىلمەدىم. ەشنارسە بۇلدىرمەدىم.
قوساي ماحامباەۆ: وق تيگەن ادامدى قۇتقارام دەگەندە ءوزىمدى اتىپ تاستادى
رەزيدەنتسيا ءىسى. ورىنعازى سەرىكبول: بەيبىت شەرۋگە شىقتىم. ال، 269 باپتى مويىندامايمىن
كيبەرشابۋىلعا ۇشىراعان باق وكىلدەرى قۇقىق قورعاۋ ورگاندارىنا ارىز ءتۇسىردى