Foto: www.putin-today.ru

AQŞ Reseyge engizilgen sankciyalar tizimin keñeytti. Atap aytqanda, «Soltüstik ağın-2» gaz qwbırın saluğa qatısatın «Fortuna» kemesine jäne onıñ iesi «KVT-Rus» kompaniyasına qarsı şekteuler engizdi. Bwl turalı AQŞ Qarjı ministrligi habarladı.

AQŞ resmi ökilderiniñ oyınşa, gaz qwbırı ekonomikalıq jobadan göri, sayasi qwralğa qattıraq wqsaydı; bwl qwral Kreml'ge Ukraina mäselesin aynalıp ötip, Europanı qaq jaruğa mümkindik beredi. Al Resey AQŞ-tıñ özin ayıptap, sankciyanı «qaru» retinde paydalanıp, öz gazı men mwnayına jaña narıq aşqısı keledi deydi.

«Sankciyalar arqılı Amerikanıñ qarsılastarına qarsı twru turalı» (CAATSA) zañ boyınşa jüzege aspaq. YAğni qara tizimge enu – AQŞ-tağı aktivterdi toqtatu jäne reseylik käsipkerlermen baylanısqa tıyım salınadı degen söz.

Bastapqıda 2020 jıldıñ basında ayaqtaluı tiis bolğan gaz qwbırınıñ qwrılısı bir jıl bwrın AQŞ biliginiñ sankciyasınan keyin toqtap qalğan. Qwbır töseumen aynalısıp jatqan şeteldik kemeler sankciya tizimine kiruden qorqıp, jobanı jalğastırudan bas tartqan. Qwnı birneşe milliard dollar bolatın bwl joba Reseyden Germaniyağa baratın gazdıñ kölemin eki ese arttıra aladı.

Sonımen qatar, AQŞ biligi seysenbide jeke jäne zañdı twlğalardı da sankciya tizimine qostı. Reseyde ornalasqan «Rustanker» kompaniyası, oğan tiesili «S'erra» tankeri, sonday-aq «Maksim Gor'kiy» tankerine de şekteu engizildi.

«Fortuna» barjası 15 qañtardan bastap Germaniyanıñ «Rostok» portına qoyılğan. Bwğan deyin Daniya teñiz basqarması «Fortuna» barjası, «Baltıq zertteuşisi» jabdıqtau kemesi jäne «Murman» kemesi 15 qañtardan bastap Daniyada gaz qwbırınıñ qwrılısın bastaydı dep habarlağan bolatın. 2020 jıldıñ jeltoqsanında Nord Stream 2 AG jobasınıñ operatorı «Fortuna» barjasınıñ kömegimen Germaniyanıñ erekşe ekonomikalıq aymağında 2,6 km qwbır saludı qayta bastağan. Qazirgi uaqıtta gaz qwbırınıñ 94%-ı salındı.

AQŞ biliginiñ sözinşe, Nord Stream 2 qwbırı Batıs pen Resey qarım-qatınası qiındağan twsta Europanıñ energetikalıq qauipsizdigine qater töndiredi deydi. Qarım-qatınastıñ qiındauına Qırımdı annekciyalau, Kreml'diñ sınşısı Aleksey Naval'nıydı ulau isteri türtki bolıp otır.

5 jeltoqsanda AQŞ-tıñ Berlindegi elşiligi Germaniyanı gaz qwbırın saludı toqtatuğa şaqırğan.

«Soltüstik ağın» gaz jobasınıñ ekinşi kezeñiniñ salınuına Euroodaqtıñ birqatar elderi qarsı şığıp otır. Äsirese Ortalıq jäne Şığıs Europa elderi. Tipten bwl jobağa tıyım saluğa barın salıp jatır. Atap aytqanda, Pol'şa, Ukraina jäne Baltıq jağalauı elderi gaz qwbırına üzildi-kesildi qarsı şıqtı. Ukraina Nord Stream 2 qwbırı Resey gazın Europağa aynalma jolmen jetkizip, Ukrainanı tranzit aqısınan ayıradı deydi. Qazir Resey gazı Ukraina territoriyasınan ötedi. Kiev osı üşin aqı aladı.

"The Qazaq Times"