Foto: Politobzor.net

AQŞ Kongresi ökilderiniñ palatası kelesi jılğa arnalğan byudjet jobasın bekitti. Qwjatta Qıtay men Reseyge qarsı birqatar jobalar, reseylik «Soltüstik ağın-2», «Türik ağını» gaz qwbırlarına qatıstı sankciyalardı küşeytu sındı bölimder bar. Jospar 1 qazannan bastaladı. Dauıs beru zañ şığaruşı organnıñ tömengi palatasınıñ saytında jürgizildi.

Kongressmenderdiñ 295-i $740,5 mlrd byudjet jobasın qoldap dauıs berse, 125-i qarsı şıqtı. Qwjat Uaşington äkimşiliginiñ «Soltüstik ağın-2» reseylik gaz qwbırına qatıstı qoldanıstağı sankciyaların küşeytedi. 2019 jıldıñ jeltoqsanında AQŞ prezidenti Donal'd Tramp reseylik jobalarğa qatıstı sankciyalar engizu turalı äskeri byudjetke qol qoyğan. Endi «Soltüstik ağın-2» jäne «Türik ağını» qwrılısına arnalğan qwbırlardı salu üşin kömektesetin şeteldik twlğalarğa qarsı sankciya engiziledi.

Kelesi jılğa qarastırılğan byudjet kölemine zer salsaq. Uaşington qabıldağan jobadağı «Reseydi tejeu» bölimi boyınşa 3,8 mlrd dollar bölingen. Sonımen qatar kelesi jılı Amerika Ukrainağa 250 mln dollar köleminde äskeri kömek bermek.

Zañ şığaruşılar «Ündi jäne Tınıq mwhitı aymağındağı Qıtay ıqpalın tejeu» maqsatında 3,6 mlrd dollar bölmek. Bwl Qıtaydıñ birqatar jobalarına, yadrolıq sınaqtar jürgizu qadamdarına qarsı bağıttalğan. Sonımen qatar Kongressmender eldiñ memlekettik organdarınıñ elektrondıq qwrılğılarında TikTok qosımşasın paydalanuğa tıyım saldı. Al koronavirus pandemiyasımen küresuge Pentagonğa byudjetten $1 mlrd qarastırılğan.

Reseylik «Gazprom» «Soltüstik ağıs-2» konsorciumın basqaradı. 11 mlrd dollar bolatın qwrılıs bıltır ayaqtaluı kerek edi. Qwbır jwmıstarı Resey gazınıñ Germaniyağa Ukraina aumağın aynalıp ötu kölemin eki ese arttıru maqsatında qolğa alınğan. Biraq joba Amerika sankciyasınan keyin uaqıtşa toqtatıldı. Qwrılıs tolığımen ayaqtaluı üşin äli 100 şaqırımnan astam jerge qwbır jürgizu kerek. Bwğan deyin Resey biligi 2020 jıldıñ soñı nemese 2021 jıldıñ ayağında jobanıñ qwrılısı ayaqtaladı dep habarlağan.

Prezident vetosı

Seysenbide Aq üy habarlağanday, Tramp birqatar erejelerge baylanıstı qwjatqa veto qoymaq. Bwl rette birinşi kezekte AQŞ-ta azamattıq soğıs kezeñinde (1861-1865) qwl ielenuşilik bolğan oñtüstik ştattar Konfederaciyası qayratkerleriniñ qwrmetine atalğan äskeri ob'ektilerdi qayta atau turalı tarmaq bar.

«Biliktiñ atqaruşı tarmağı ökilettikterin baqılauğa, Auğanstandağı qarajattı paydalanuğa qatañ şekteuler engizuge, prezidenttiñ wlttıq müddelerdi qorğau jönindegi ökilettikterin özgeşe türde şekteuge bağıttalğan zañ jobasınıñ erejelerine qatıstı mañızdı mäseleler bar», – dep atap ötti Aq üy äkimşiligi. Bwl jerde äñgime prezidenttiñ Auğanstan, Germaniya, Koreya Respublikası, Afrika elderinen äskerlerdi şığaru jönindegi ökilettikterin şekteu turalı bolıp otır.

Negizinen AQŞ-tıñ äskeri byudjet jobası äli de tolıq bekitilgen joq. Osı aptada jobanıñ nwsqasın Kongress Senatı maqwldauı kerek. Keyinnen eki jobanıñ ereje-talaptarın retteu üşin arnayı komissiya şaqırıladı.

Qos palata da kelisilgen qwjatqa qaytadan dauıs berui tiis, sodan keyin ol Aq üy basşısına qol qoyuğa jiberiledi. Bwl process ädette küzge deyin sozıladı.

"The Qazaq Times"