فوتو: www.putin-today.ru

اقش رەسەيگە ەنگىزىلگەن سانكتسيالار ءتىزىمىن كەڭەيتتى. اتاپ ايتقاندا، «سولتۇستىك اعىن-2» گاز قۇبىرىن سالۋعا قاتىساتىن «فورتۋنا» كەمەسىنە جانە ونىڭ يەسى «كۆت-رۋس» كومپانياسىنا قارسى شەكتەۋلەر ەنگىزدى. بۇل تۋرالى اقش قارجى مينيسترلىگى حابارلادى.

اقش رەسمي وكىلدەرىنىڭ ويىنشا، گاز قۇبىرى ەكونوميكالىق جوبادان گورى، ساياسي قۇرالعا قاتتىراق ۇقسايدى; بۇل قۇرال كرەملگە ۋكراينا ماسەلەسىن اينالىپ ءوتىپ، ەۋروپانى قاق جارۋعا مۇمكىندىك بەرەدى. ال رەسەي اقش-تىڭ ءوزىن ايىپتاپ، سانكتسيانى «قارۋ» رەتىندە پايدالانىپ، ءوز گازى مەن مۇنايىنا جاڭا نارىق اشقىسى كەلەدى دەيدى.

«سانكتسيالار ارقىلى امەريكانىڭ قارسىلاستارىنا قارسى تۇرۋ تۋرالى» (CAATSA) زاڭ بويىنشا جۇزەگە اسپاق. ياعني قارا تىزىمگە ەنۋ – اقش-تاعى اكتيۆتەردى توقتاتۋ جانە رەسەيلىك كاسىپكەرلەرمەن بايلانىسقا تىيىم سالىنادى دەگەن ءسوز.

باستاپقىدا 2020 جىلدىڭ باسىندا اياقتالۋى ءتيىس بولعان گاز قۇبىرىنىڭ قۇرىلىسى ءبىر جىل بۇرىن اقش بيلىگىنىڭ سانكتسياسىنان كەيىن توقتاپ قالعان. قۇبىر توسەۋمەن اينالىسىپ جاتقان شەتەلدىك كەمەلەر سانكتسيا تىزىمىنە كىرۋدەن قورقىپ، جوبانى جالعاستىرۋدان باس تارتقان. قۇنى بىرنەشە ميلليارد دوللار بولاتىن بۇل جوبا رەسەيدەن گەرمانياعا باراتىن گازدىڭ كولەمىن ەكى ەسە ارتتىرا الادى.

سونىمەن قاتار، اقش بيلىگى سەيسەنبىدە جەكە جانە زاڭدى تۇلعالاردى دا سانكتسيا تىزىمىنە قوستى. رەسەيدە ورنالاسقان «رۋستانكەر» كومپانياسى، وعان تيەسىلى «سەررا» تانكەرى، سونداي-اق «ماكسيم گوركي» تانكەرىنە دە شەكتەۋ ەنگىزىلدى.

«فورتۋنا» بارجاسى 15 قاڭتاردان باستاپ گەرمانيانىڭ «روستوك» پورتىنا قويىلعان. بۇعان دەيىن دانيا تەڭىز باسقارماسى «فورتۋنا» بارجاسى، «بالتىق زەرتتەۋشىسى» جابدىقتاۋ كەمەسى جانە «مۋرمان» كەمەسى 15 قاڭتاردان باستاپ دانيادا گاز قۇبىرىنىڭ قۇرىلىسىن باستايدى دەپ حابارلاعان بولاتىن. 2020 جىلدىڭ جەلتوقسانىندا Nord Stream 2 AG جوباسىنىڭ وپەراتورى «فورتۋنا» بارجاسىنىڭ كومەگىمەن گەرمانيانىڭ ەرەكشە ەكونوميكالىق ايماعىندا 2,6 كم قۇبىر سالۋدى قايتا باستاعان. قازىرگى ۋاقىتتا گاز قۇبىرىنىڭ 94%-ى سالىندى.

اقش بيلىگىنىڭ سوزىنشە، Nord Stream 2 قۇبىرى باتىس پەن رەسەي قارىم-قاتىناسى قيىنداعان تۇستا ەۋروپانىڭ ەنەرگەتيكالىق قاۋىپسىزدىگىنە قاتەر توندىرەدى دەيدى. قارىم-قاتىناستىڭ قيىنداۋىنا قىرىمدى اننەكتسيالاۋ، كرەملدىڭ سىنشىسى الەكسەي ناۆالنىيدى ۋلاۋ ىستەرى تۇرتكى بولىپ وتىر.

5 جەلتوقساندا اقش-تىڭ بەرليندەگى ەلشىلىگى گەرمانيانى گاز قۇبىرىن سالۋدى توقتاتۋعا شاقىرعان.

«سولتۇستىك اعىن» گاز جوباسىنىڭ ەكىنشى كەزەڭىنىڭ سالىنۋىنا ەۋرووداقتىڭ بىرقاتار ەلدەرى قارسى شىعىپ وتىر. اسىرەسە ورتالىق جانە شىعىس ەۋروپا ەلدەرى. تىپتەن بۇل جوباعا تىيىم سالۋعا بارىن سالىپ جاتىر. اتاپ ايتقاندا، پولشا، ۋكراينا جانە بالتىق جاعالاۋى ەلدەرى گاز قۇبىرىنا ءۇزىلدى-كەسىلدى قارسى شىقتى. ۋكراينا Nord Stream 2 قۇبىرى رەسەي گازىن ەۋروپاعا اينالما جولمەن جەتكىزىپ، ۋكراينانى ترانزيت اقىسىنان ايىرادى دەيدى. قازىر رەسەي گازى ۋكراينا تەرريتورياسىنان وتەدى. كيەۆ وسى ءۇشىن اقى الادى.

"The Qazaq Times"