Körneki suret. Foto: aşıq derekköz

Qazaqstanda 24 jeltoqsan koronavirus jwqqan 736 adam, 23 jeltoqsan koronavirus pnevmoniyasına şaldıqqan 154 adam anıqtalğan. Qazir elde 23 mıñnan astam adam (U07.1 nemese KVI+ boyınşa 11 604, U07.2 nemese KVI- boyınşa 12 023) auırıp jatır. 

#U07.1 Koronavirus PTR testi arqılı tabılğan jaña keysterdiñ eñ köbi – Almatı qalası (95), Pavlodar (93), Qostanay (65), Atırau (62), ŞQO, Almatı jäne SQO (ärqaysı 61-den), Aqmola (58) öñirlerinen. Ötken täulikte 1302 adam auruınan ayğıp şığıp üyine jiberilgen, sonday-aq 11 adam ömirden ötken.

#U07.2  Aldıñğı küni, yağni jeltoqsannıñ 23-i koronavirus pnevmoniyasına jatatın 154 nauqas jäne 3 ölim jağdayı tirkelgen. Oğan qosa, särsenbi küni 73 adam emdelip şıqqan.

#Jalpı  DenMin-niñ resmi mälimetinşe, emdelip jatqan 23 627 nauqastıñ 4738-i auruhanada, 18 889-ı ambulatorlıq baqılauda. Ministrlik resmi habarlamanı jañarttı. Onda auırıp jatqan balalar turalı aqparat alınıp tastalğan. Jäne koronavirus pnevmoniyasınıñ merzimine baylanıstı aylap qoldanılğan qatelik tüzetilmegen.

Ahualı naşar 243 nauqastıñ arasında 44 adamnıñ jağdayı qattı qiındağan. Jäne 39  sırqat ökpeni jasandı jeldetu apparatımen tınıstap jatır.

Qazaqstanda koronavirus pnevmoniyası («KVI-» – QT) bir künge keşigip jariyalanğanına qaramastan, «ötken täuliktegi» derek dep beriledi. Mısalı, särsenbi küni tañda koronavirus siyaqtı seysenbiniñ emes, düysenbi künge tiesili mälimet beriledi. Biraq nege ekeni belgisiz «aldıñğı» dep berudiñ ornına resmi aqparattarda «ötken täulikte» dep jazıladı. Osığan deyin eldegi koronavirus jağdayı turalı resmi aqparat közi bolıp sanalatın coronavirus2020.kz saytı men Densaulıq saqtau ministrliginiñ aqparat resurstarında jariyalanğan derekter tört aydan beri qate berilip kelgeni jaylı wstanımımızdı bölisip, aqparat qwraldarına eskertkenbiz. Degenmen äli künge deyin keybir basılımdar eki künge tiesili derekti bir datağa telip habarlap keledi. Pandemiya moderatorı – ministrlik tek senbi-jeksenbide ğana emes, mereke künderi de statistikanı tolıqtay jürgizuge qauqarsız. Mäselen, jeltoqsan ayınıñ 1, 16, 17, 18-i jän 19-ına tiesili derekter eselep kemigen. Küzdiñ ortasında sol kezdegi DenMin-niñ resmi-erikti ökili Bağdat Qojahmetov ekinşi tolqında demalıs künine qaramastan statistikanı tolıq kölemde jürgizuge uäde bergen edi. Biraq is jüzinde olay bolmay şıqtı. Künine jüzden oñ nätijeli koronavirus anıqtalıp jatsa da vedomstvo tolıq ştatqa köşkisi joq.

Densaulıq saqtau ministrliginiñ baspasöz qızmetiniñ hatşısı Äsel Artıqşinova redakciya tilşisine 26 jeltoqsannan bastap koronavirus pnevmoniyasınıñ datasına qatıstı qate berilip kelgen format tüzetilgen nwsqada jariyalana bastaytının habarladı.

«Sizderdiñ redakciya eskertpesi boyınşa apta basında ministrlik basşılığı wsınımdı maqwldadı. Endi erteñnen bastap kündelikti habarlamanıñ jaña ülgide beriledi. Qazir mamandar tolıqtırıp, dayındap jatır. KVI- diagnozına baylanıstı anıqtalğan nauqastardıñ sanınıñ qasına jaqşanıñ işinde data naqtı körsetiletin boladı. KVI+ 25 jeltoqsan delinse, KVI- 24 jeltoqsanğa tiesili dep körsetiledi», – dedi ol.

The Qazaq Times redakciyası tömendegi kesteni eñ şınayı nwsqa dep sanaydı.

9 jeltoqsan densaulıq saqtau vice-ministri, bas memlekettik sanitar-därigeri Erlan Qiyasov Qazaqstanda koronavirus infekciyasın jwqtırudıñ şarıqtau kezeñi turalı jaña boljamın bölisken. Onıñ aytuınşa, ekinşi tolqınnıñ şarıqtau kezeñi 2021 jıldıñ qañtar jäne aqpan aylarına säykes keledi.

13 naurızdan beri COVID-19 infekciyasın jwqtırğandar qatarı 150 mıñğa, 1 tamızdan bergi koronavirus pnevmoniyası 45 mıñğa jetken. DDSW mälimetinşe, Qazaqstanda auırğandardıñ sanı 194,5 mıñnan, al Wlttıq statistikada 195 mıñnan asqan. Degenmen Ükimet koronavirus pen onıñ pnevmoniyasın eki bölek esepteydi. Halıqaralıq wyım tuıstas derttiñ qaupi birdey ekenine basa nazar audarsa da Qazaqstannıñ Densaulıq saqtau ministrligi koronavirus pen onıñ pnevmoniyalıq türine eki türli közqaraspen qaraydı. Onıñ anıq däleli – KVI+ diagnozı boyınşa jaña anıqtalğan nauqastar men qaytqandar, ayığıp şıqqandardıñ aymaqtardağı körsetkişi kündelikti jariyalanadı, al KVI- deregi tek jiıntıq mände beriledi. Koronavirus pnevmoniyasınıñ aymaqtarğa taraluı jönindegi esep ministr o basta aytqanday kündelikti ne aptasına emes, on künde bir ret, onıñ özinde vedomstvo saytına fayl formatında jüktelip keledi.

Pandemiya bastalğalı jalpı virus jwqqandardıñ 3479-ı (KVI+ / U07.1 – 2229, KVI- / U07.2 – 486, ilespe aurulardan – 764) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingen 764 adamdı jalpı statistikağa qosıp eseptemeydi. Sarapşılar bwğan qarsı. Olardıñ aytuınşa, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Äzirge virus taralu qateri jağınan Atırau oblısı – qızıl aymaqta, astana men Almatı qalası, SQO, Aqmola, Qostanay, Pavlodar öñirleri – sarı aymaqta twr. Respublika sarı aumaqqa engen.

Qoğamda biılğı 256 mıñ pnevmoniya jağdayın esepke qospay, jalpı statistikanı «mausım-şilde qırğınan» keyin jürgize bastağan Ükimettiñ esebine kümänmen qaraytındar köbeygen.

Qazaqstan virus taraluı boyınşa älemde Worldometers derekqorı jäne DDSW tiziminde 49-şı orında twr.

"The Qazaq Times"