قازاقستاندا 24 جەلتوقسان كوروناۆيرۋس جۇققان 736 ادام، 23 جەلتوقسان كوروناۆيرۋس پنەۆمونياسىنا شالدىققان 154 ادام انىقتالعان. قازىر ەلدە 23 مىڭنان استام ادام (U07.1 نەمەسە كۆي+ بويىنشا 11 604, U07.2 نەمەسە كۆي- بويىنشا 12 023) اۋىرىپ جاتىر. 

#U07.1 كوروناۆيرۋس پتر تەستى ارقىلى تابىلعان جاڭا كەيستەردىڭ ەڭ كوبى – الماتى قالاسى (95), پاۆلودار (93), قوستاناي (65), اتىراۋ (62), شقو، الماتى جانە سقو (ارقايسى 61-دەن), اقمولا (58) وڭىرلەرىنەن. وتكەن تاۋلىكتە 1302 ادام اۋرۋىنان ايعىپ شىعىپ ۇيىنە جىبەرىلگەن، سونداي-اق 11 ادام ومىردەن وتكەن.

#U07.2  الدىڭعى كۇنى، ياعني جەلتوقساننىڭ 23-ءى كوروناۆيرۋس پنەۆمونياسىنا جاتاتىن 154 ناۋقاس جانە 3 ءولىم جاعدايى تىركەلگەن. وعان قوسا، سارسەنبى كۇنى 73 ادام ەمدەلىپ شىققان.

#جالپى  دەنمين-ءنىڭ رەسمي مالىمەتىنشە, ەمدەلىپ جاتقان 23 627 ناۋقاستىڭ 4738-ءى اۋرۋحانادا، 18 889-ى امبۋلاتورلىق باقىلاۋدا. مينيسترلىك رەسمي حابارلامانى جاڭارتتى. وندا اۋىرىپ جاتقان بالالار تۋرالى اقپارات الىنىپ تاستالعان. جانە كوروناۆيرۋس پنەۆمونياسىنىڭ مەرزىمىنە بايلانىستى ايلاپ قولدانىلعان قاتەلىك تۇزەتىلمەگەن.

احۋالى ناشار 243 ناۋقاستىڭ اراسىندا 44 ادامنىڭ جاعدايى قاتتى قيىنداعان. جانە 39  سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

قازاقستاندا كوروناۆيرۋس پنەۆمونياسى («كۆي-» – QT) ءبىر كۇنگە كەشىگىپ جاريالانعانىنا قاراماستان، «وتكەن تاۋلىكتەگى» دەرەك دەپ بەرىلەدى. مىسالى، سارسەنبى كۇنى تاڭدا كوروناۆيرۋس سياقتى سەيسەنبىنىڭ ەمەس، دۇيسەنبى كۇنگە تيەسىلى مالىمەت بەرىلەدى. بىراق نەگە ەكەنى بەلگىسىز «الدىڭعى» دەپ بەرۋدىڭ ورنىنا رەسمي اقپاراتتاردا «وتكەن تاۋلىكتە» دەپ جازىلادى. وسىعان دەيىن ەلدەگى كوروناۆيرۋس جاعدايى تۋرالى رەسمي اقپارات كوزى بولىپ سانالاتىن coronavirus2020.kz سايتى مەن دەنساۋلىق ساقتاۋ مينيسترلىگىنىڭ اقپارات رەسۋرستارىندا جاريالانعان دەرەكتەر ءتورت ايدان بەرى قاتە بەرىلىپ كەلگەنى جايلى ۇستانىمىمىزدى ءبولىسىپ، اقپارات قۇرالدارىنا ەسكەرتكەنبىز. دەگەنمەن ءالى كۇنگە دەيىن كەيبىر باسىلىمدار ەكى كۇنگە تيەسىلى دەرەكتى ءبىر داتاعا تەلىپ حابارلاپ كەلەدى. پاندەميا مودەراتورى مينيسترلىك تەك سەنبى-جەكسەنبىدە عانا ەمەس، مەرەكە كۇندەرى دە ستاتيستيكانى تولىقتاي جۇرگىزۋگە قاۋقارسىز. ماسەلەن، جەلتوقسان ايىنىڭ 1, 16, 17, 18-ءى ءجان 19-ىنا تيەسىلى دەرەكتەر ەسەلەپ كەمىگەن. كۇزدىڭ ورتاسىندا سول كەزدەگى دەنمين-ءنىڭ رەسمي-ەرىكتى وكىلى باعدات قوجاحمەتوۆ ەكىنشى تولقىندا دەمالىس كۇنىنە قاراماستان ستاتيستيكانى تولىق كولەمدە جۇرگىزۋگە ۋادە بەرگەن ەدى. بىراق ءىس جۇزىندە ولاي بولماي شىقتى. كۇنىنە جۇزدەن وڭ ناتيجەلى كوروناۆيرۋس انىقتالىپ جاتسا دا ۆەدومستۆو تولىق شتاتقا كوشكىسى جوق.

دەنساۋلىق ساقتاۋ مينيسترلىگىنىڭ ءباسپاسوز قىزمەتىنىڭ حاتشىسى اسەل ارتىقشينوۆا رەداكتسيا تىلشىسىنە 26 جەلتوقساننان باستاپ كوروناۆيرۋس پنەۆمونياسىنىڭ داتاسىنا قاتىستى قاتە بەرىلىپ كەلگەن فورمات تۇزەتىلگەن نۇسقادا جاريالانا باستايتىنىن حابارلادى.

«سىزدەردىڭ رەداكتسيا ەسكەرتپەسى بويىنشا اپتا باسىندا مينيسترلىك باسشىلىعى ۇسىنىمدى ماقۇلدادى. ەندى ەرتەڭنەن باستاپ كۇندەلىكتى حابارلامانىڭ جاڭا ۇلگىدە بەرىلەدى. قازىر ماماندار تولىقتىرىپ، دايىنداپ جاتىر. كۆي- دياگنوزىنا بايلانىستى انىقتالعان ناۋقاستاردىڭ سانىنىڭ قاسىنا جاقشانىڭ ىشىندە داتا ناقتى كورسەتىلەتىن بولادى. كۆي+ 25 جەلتوقسان دەلىنسە، كۆي- 24 جەلتوقسانعا تيەسىلى دەپ كورسەتىلەدى»، – دەدى ول.

The Qazaq Times رەداكتسياسى تومەندەگى كەستەنى ەڭ شىنايى نۇسقا دەپ سانايدى.

9 جەلتوقسان دەنساۋلىق ساقتاۋ ۆيتسە-ءمينيسترى، باس مەملەكەتتىك سانيتار-دارىگەرى ەرلان قياسوۆ قازاقستاندا كوروناۆيرۋس ينفەكتسياسىن جۇقتىرۋدىڭ شارىقتاۋ كەزەڭى تۋرالى جاڭا بولجامىن بولىسكەن. ونىڭ ايتۋىنشا، ەكىنشى تولقىننىڭ شارىقتاۋ كەزەڭى 2021 جىلدىڭ قاڭتار جانە اقپان ايلارىنا سايكەس كەلەدى.

13 ناۋرىزدان بەرى COVID-19 ينفەكتسياسىن جۇقتىرعاندار قاتارى 150 مىڭعا، 1 تامىزدان بەرگى كوروناۆيرۋس پنەۆمونياسى 45 مىڭعا جەتكەن. ددسۇ مالىمەتىنشە، قازاقستاندا اۋىرعانداردىڭ سانى 194,5 مىڭنان، ال ۇلتتىق ستاتيستيكادا 195 مىڭنان اسقان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى. حالىقارالىق ۇيىم تۋىستاس دەرتتىڭ قاۋپى بىردەي ەكەنىنە باسا نازار اۋدارسا دا قازاقستاننىڭ دەنساۋلىق ساقتاۋ مينيسترلىگى كوروناۆيرۋس پەن ونىڭ پنەۆمونيالىق تۇرىنە ەكى ءتۇرلى كوزقاراسپەن قارايدى. ونىڭ انىق دالەلى – كۆي+ دياگنوزى بويىنشا جاڭا انىقتالعان ناۋقاستار مەن قايتقاندار، ايىعىپ شىققانداردىڭ ايماقتارداعى كورسەتكىشى كۇندەلىكتى جاريالانادى، ال كۆي- دەرەگى تەك جيىنتىق ماندە بەرىلەدى. كوروناۆيرۋس پنەۆمونياسىنىڭ ايماقتارعا تارالۋى جونىندەگى ەسەپ مينيستر و باستا ايتقانداي كۇندەلىكتى نە اپتاسىنا ەمەس، ون كۇندە ءبىر رەت، ونىڭ وزىندە ۆەدومستۆو سايتىنا فايل فورماتىندا جۇكتەلىپ كەلەدى.

پاندەميا باستالعالى جالپى ۆيرۋس جۇققانداردىڭ 3479-ى (كۆي+ / U07.1 – 2229, كۆي- / U07.2 – 486, ىلەسپە اۋرۋلاردان – 764) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 764 ادامدى جالپى ستاتيستيكاعا قوسىپ ەسەپتەمەيدى. ساراپشىلار بۇعان قارسى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

ازىرگە ۆيرۋس تارالۋ قاتەرى جاعىنان اتىراۋ وبلىسى – قىزىل ايماقتا، استانا مەن الماتى قالاسى، سقو، اقمولا، قوستاناي، پاۆلودار وڭىرلەرى – سارى ايماقتا تۇر. رەسپۋبليكا سارى اۋماققا ەنگەن.

قوعامدا بيىلعى 256 مىڭ پنەۆمونيا جاعدايىن ەسەپكە قوسپاي، جالپى ستاتيستيكانى «ماۋسىم-شىلدە قىرعىنان» كەيىن جۇرگىزە باستاعان ۇكىمەتتىڭ ەسەبىنە كۇمانمەن قارايتىندار كوبەيگەن.

قازاقستان ۆيرۋس تارالۋى بويىنشا الەمدە Worldometers دەرەكقورى جانە ددسۇ تىزىمىندە 49-شى ورىندا تۇر.

"The Qazaq Times"