Aleksey Naval'nıy jäne Dmitriy Peskov. Foto: censor

Aleksey Naval'nıy Resey prezidentiniñ baspasöz hatşısı Dmitriy Peskovtı sotqa berdi. Şağımdı Mäskeudiñ Presnenskiy sotınıñ baspasöz qızmeti rastadı.

Naval'nıy Peskovtıñ eki mälimdemesin orınsız jäne abıroyğa nwqsan keltiredi dep tanudı talap etip otır. Birinşi mälimdeme: «CRU mamandarı nauqaspen jwmıs isteytinin eskersek, Naval'nıy sol wyımmen tığız baylanısta». Ekinşi: «Bwl wyım Naval'nıy arqılı emes, bizben tikeley dialog jürgizui kerek».

1 qazanda Peskov oppozicionerdiñ Amerika Qwrama Ştattarınıñ Ortalıq barlau basqarmasımen (CRU) jwmıs isteytinin habarlap, joğarıda keltirilgen mälimdemelerdi aytqan.

Naval'nıy mwnı «külkili ayıptau» dep, Kreml' ökilin sotqa berdi. äzirge, Resey prezidentiniñ baspasöz hatşısı oppozicionerdiñ şağımına tüsinik beruden bas tartıp otır.

2017 jılı Aleksey Naval'nıy Dmitriy Peskovtıñ wlı jayında beynerolik jariyalağan. Aleksey Naval'nıydıñ sözinşe, Peskovtıñ osı uaqıtqa deyin Wlıbritaniyada twrıp kelgen Nikolay Çoulz esimdi wlı Reseyge qaytıp oralğan. Biraq ol resmi türde eşqanday jerde jwmıs istemese de qwnı 10 million rubl' twratın Tesla avtoköligin minip, Mäskeudiñ qaq ortasında 110 şarşı metrlik päterde twrıp jatır.

Naval'nıydıñ Jemqorlıqqa qarsı qorınıñ zertteuleri boyınşa, Peskovtıñ wlı Nikolay Çoulz  Reseyde 116 ret  jol erejesin bwzğan jäne eşqanday jazağa tartılmağan. Al Wlıbritaniyada jürgen kezinde bir jılğa türmege qamalğan. Qazirgi uaqıtta Nikolay Çouzdıñ ieliginde Tesla avtoköliginen basqa Mäskeudiñ Rublevka audanında päteri men soñğı ülgidegi Reyndj rover, Ferrari kölikteri bar.

Esteriñizge salayıq, Aleksey Naval'nıydıñ Jemqorlıqqa qarsı qorı bwğan deyin Resey prem'er-ministri Dmitriy Medvedevtıñ menşigindegi dünie-mülik jayında «On vam ne Dimon» fil'min jariyalağan bolatın.

"The Qazaq Times"