Statistika astarı: 656 adam auırğan

Resmi derek boyınşa, Qazaqstanda 8 qaraşa 610 adamnan koronavirus, al senbide 46  adamnan koronavirus pnevmoniyası anıqtaldı. Virus jwqtırıp qaytıs bolğandar men ahualı qiındağandar köbeyip jatır.

#Koronavirus Jeksenbi, qaraşanıñ 8-i koronavirus jwqtırğan 175 adam ayığıp şıqsa, 6 adam ömirden ötken. Jañadan tirkelgen nauqastardıñ eñ köbi –  ŞQO (254) jäne Pavlodar (61), Qostanay (60), BQO (45), Aqmola men SQO (ärqaysında 42) oblıstarında. Mañğıstau jäne Qızılorda oblıstarında birde-bir nauqas anıqtalmağan. Birneşe apta boyı jwqtırğandar sanı boyınşa alda köringen Şığıs Qazaqstan oblısındağı epidemiyalıq ahual uşığıp, öñir tolıqtay oqşaulanğan. Öñir (12 mıñ) virus jwqtırğandar boyınşa Almatı qalası (14,9 mıñ) men astanadan (14,8 mıñ) keyingi üştikte twr. Jergilikti atqaruşı bilik ökilderi mwnıñ sebebin sanitarlıq talaptardıñ tiisinşe saqtalmauımen jäne şekaralıq aymaq boluımen baylanıstıradı.

DenMin-niñ resmi mälimetinşe, emdelip jatqan 7 mıñnan astam nauqastıñ 2,8 mıñı auruhanada. Tağı 4217 adam ambulatorlıq terapiyada. Olardıñ arasında 375 bala emdelip jatır.

Ahualı naşar 190 nauqastıñ arasında 20 adamnıñ jağdayı qattı qiındağan. Jäne 27 sırqat ökpeni jasandı jeldetu apparatımen tınıstap jatır.

Respublika boyınşa barlığı 116 772 adam koronavirus infekciyasın jwqtırsa, emdelip jazılğandarı – 107 843 adam. Bwl jalpı nauqastardıñ 95%-dan astamı. Qazan ayınıñ alğaşqı aptasınan bastap elde koronavirus qayta köbeygen.

#Koronavirus_pnevmoniyası Sonımen qosa, koronavirus pnevmoniyasına şaldıqqan 46 adam tirkelgen. Tağı 44 adam ayığıp şıqqan. Biraq olardıñ qanşası qay aymaqtan ekeni belgisiz. PTR testi teris qorıtındı körsetkenimen, koronavirus saldarınan qabınğan aqökpe auruınıñ aymaqtarğa taralu deregin twraqtı türde jariyalauğa uäde etken ministr Aleksey Coy da, onıñ kömekşisi, vedomstvonıñ resmi ökili Bağdat Qojahmetov te sözin bwrmalap, är on kün sayın jariyalauğa köşken. Koronavirus pnevmoniyasınıñ öñirlerdegi kündelikti dinamikası belgisiz. Pnevmoniyağa şaldıqqan 38 mıñnan artıq adamnıñ 29 mıñğa juığı jazılıp şıqqan. Keybir derekközder, anığıraq aytqanda DenMin ökiliniñ aytuına qarağanda, düysenbi jäne seysenbi künderi demalıs küngi, yağni senbi men jeksenbidegi mälimet beriledi. Koronavirus jağdayın ötken täuliktiñ erteñine jüyelep jariyalau jolğa qoyılğanımen, koronavirus pnevmoniyası turalı mälimet eki künge keşigip jinaqtaladı. Düysenbi deregi särsenbide bir-aq beriledi. Sondıqtan «ötken küni» dep jazılatın resmi aqparat kümändi. Eki kün keşikse de vedomstvonıñ baspasöz qızmeti «ötken küngi» derek dep jariyalaydı. Apta sayın eki küngi körsetkiş tömendep sala beredi. Ministrlik mwnı medicina wyımdarı men vedomstvoda demalıs küni ekendigimen tüsindiredi. Dese de koronavirus jönindegi aqparattı jinaqtau-öñdeu isi üzdiksiz jürgiziledi.  DDSW tuıstas derttiñ qaupi birdey ekenine basa nazar audarsa da Qazaqstannıñ Densaulıq saqtau ministrligi koronavirus pen onıñ pnevmoniyalıq türine eki türli közqaraspen qaraydı. Onıñ anıq däleli – KVI+ turalı aqparattıq indikatorlar (aymaqtarğa taraluı, nauqastardıñ ahualı, onıñ işindegi stacionar men ambulatorlıq baqılaudağılar sanı, balalar sanı, ÖJJA-men tınıstap jatqandar, ayıqqandar, jaña keyster, qaytqandar) kündelikti jariyalansa, al KVI- deregi soñğı üş körsetkişten özge mälimet berilmeydi. Al koronavirus pnevmoniyasınıñ aymaqtarğa taraluı jönindegi deregi ministr o basta aytqanday kündelikti ne aptasına emes, endi on künde bir-aq beriletin boldı. Onıñ özinde qwjat formatında saytqa jüktep otıradı, vedomstvo saytında aşıq äri tüsinikti tilde taldap jariyalamaydı.

Qoğamda biılğı 256 mıñ pnevmoniya jağdayın esepke qospay, jalpı statistikanı şildedegi qırğınnan keyin jürgize bastağan Ükimettiñ esebine kümänmen qaraytındar köbeygen.

#Söytse... Qazaqstanda koronavirus ölimi azaymay twr. Resmi derekke säykes, qazan ayında koronavirus jwqtırğan 4439 adam anıqtalıp, 118 adam qaytıs bolğan. Däl osı uaqıtta koronavirus pnevmoniyasına 4984 adam şaldığıp, 47 adam qaytqan.

Osılayşa jazğı tolqınnıñ şarıqtau şeginen keyin tamız ayınan beri Qazaqstanda koronavirus jwqtırğandar 21 mıñnan, al koronavirus pnevmoniyasına şaldıqqandar 38 mıñnan asqan. Ekeuin qosa eseptegende, keyingi üş ayda indetten 1,2 mıñday adam ömirden ötken. Sonımen birge, tamız-qırküyek JRVI aurularımen 418 mıñnan, pnevmoniyanıñ basqa türlerimen 82 mıñnan astam jağday tirkelgen.

7 qazan densaulıq saqtau ministri Aleksey Coydıñ koronavirus epidemiyası turalı boljaldı scenariydiñ üş nwsqasın tanıstırğan. Onıñ  aytuınşa, boljamğa apta sayın tüzetuler engizilip otıradı. Aleksey Coy wsınğan pessimistik scenariy boyınşa, qazan-jeltoqsanda 190 mıñ adam virus jwqtırıp, 65 mıñ adamdı auruhanağa jatqızuğa «tura keledi». Mwnday jağdayda «jeltoqsannıñ ortasında lokdaun engizilui ıqtimal».

Tağı bir nwsqa realistik scenarige säykes, qazan-jeltoqsanda 90 mıñday adam virus jwqtırıp, 30 mıñın auruhanağa jatqızuğa «tura keledi». Bwl jağdayda «lokdaun qañtarda engizilui mümkin». Coy eger jwrt tügel maska tağıp jürse, qatañ karantin bolmaytının, qazan-jeltoqsanda şamamen 40 mıñ adamğa virus jwğıp, 15 mıñ adam auruhanağa tüsetinin aytadı.

Pandemiya kezindegi moderator vedomstvonıñ basşısı karantinniñ bastı indikatorı retinde eldegi auruhanalardıñ 70%-ı tolsa, qatañ lokdaun jariyalau kerektigin mälimdegen.

Karantin şarasın birde küşeytip, birde bosañsıtıp jatqan aymaq sanitarlarınıñ äreketi tüsiniksiz. Ükimet ötken aptanıñ basında ekinşi toqsannan bastap 300 oquşısı bar mektepterge dästürli formatta oquğa, bilim oşaqtarında 5 sınıpqa, halıqaralıq mektepterde 7 sınıpqa deyin kezekşi sınıptarda oquğa, meşitter men kinoteatrlardıñ jwmısına rwqsat beretin şeşim qabıldağan. Älemniñ soltüstik jartı şarındağı elderde küzgi tolqın bastalıp, DDSW jetekşisi aldağı birneşe ay eñ qauipti kez boların eskertkenine qaramastan, Qazaqstan Ükimeti «jeñildetuge» qadam jasadı.

Pnevmoniyanıñ koronavirustan basqa türlerine şaldıqqandar sanı 340 mıñğa jaqındadı. Jiıntıq esebi, 13 naurızdan beri COVID-19 infekciyasın jwqtırğandar qatarı 117 mıñğa juıqtap, 1 tamızdan bergi koronavirus pnevmoniyası 39 mıñnan asqan. DDSW mälimetinşe, Qazaqstanda auırğandardıñ sanı 155 mıñğa jetken. Degenmen Ükimet koronavirus pen onıñ pnevmoniyasın eki bölek esepteydi. Pandemiya bastalğalı jalpı virus jwqqandardıñ 3017-si (KVI+ / U07.1 – 1899, KVI- / U07.2 – 409, ilespe aurulardan – 709) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingen 672 adamdı jalpı statistikağa qosıp eseptemeydi. Sarapşılar bwğan qarsı. Olardıñ aytuınşa, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

"The Qazaq Times"