Resmi derek boyınşa, Qazaqstanda 26 qazan küni 142 adamnan koronavirus, al jeksenbide 10 adamnan koronavirus pnevmoniyası anıqtaldı. Keyingi kezde koronavirustan auırğan balalar qatarı kürt köbeygen. 

#Koronavirus  Düysenbide, qazannıñ 26-sı koronvirus jwqtırğan 91 adam ayığıp şıqsa, 5 adam ömirden ötken. Jañadan tirkelgen nauqastardıñ eñ köbi –  ŞQO (30) jäne astana (20), Pavlodar (14), Aqmola (12), SQO (11), Qarağandı oblısı men Almatı qalasında (10). Al Türkistan jäne Qızılorda oblıstarında birde-bir nauqas anıqtalmağan.

DenMin-niñ resmi mälimetinşe, emdelip jatqan 3088 adamnıñ 2333-i auruhanada. Al qalğan 755 nauqas ambulatorlıq terapiyada. Olardıñ arasında 248 bala emdelip jatır.

Ahualı naşar 115 nauqastıñ arasında 10 adamnıñ jağdayı qattı qiındağan. Jäne 16 sırqat ökpeni jasandı jeldetu apparatımen tınıstap jatır. Keyingi kezde ambulatorlıq baqılauda bolatın pacientterdiñ sanı kemip, kerisinşe satcionarda emdeluşiler men ÖJJA qwrılğısına qosılğandar qatarı artqan.

Respublika boyınşa barlığı 110 684 adam koronavirus infekciyasın jwqtırsa, emdelip jazılğandarı – 105 766 adam. Bwl jalpı nauqastardıñ 95%-dan astamı. Qazan ayınıñ ortasınan beri Qazaqstanda koronavirus köbeygen edi.

#Koronavirus_pnevmoniyası Sonımen qosa, koronavirus pnevmoniyasına şaldıqqan 10 adam, bir ölim jağdayı tirkelgen. Tağı 17 adam ayığıp şıqqan. Biraq olardıñ qanşası qay aymaqtan ekeni belgisiz. PTR testi teris qorıtındı körsetkenimen, koronavirus saldarınan qabınğan aqökpe auruınıñ aymaqtarğa taralu deregin twraqtı türde jariyalauğa uäde etken ministr Aleksey Coy da, onıñ kömekşisi, vedomstvonıñ resmi ökili Bağdat Qojahmetov te sözin bwrmalap, är on kün sayın jariyalauğa köşken. Koronavirus pnevmoniyasınıñ öñirlerdegi kündelikti dinamikası belgisiz. Pnevmoniyağa şaldıqqan 37 mıñday adamnıñ 28,5 mıñı jazılıp şıqqan. Keybir derekközderge, anığıraq aytqanda DenMin ökiliniñ aytuına qarağanda, düysenbi jäne seysenbi künderi demalıs küngi, yağni senbi men jeksenbidegi mälimet beriledi. Koronavirus jağdayın ötken täuliktiñ erteñine jüyelep jariyalau jolğa qoyılğanımen, koronavirus pnevmoniyası turalı mälimet eki künge keşigip jinaqtaladı. Düysenbi deregi särsenbide bir-aq beriledi. Sondıqtan «ötken küni» dep jazılatın resmi aqparat kümändi. Eki kün keşikse de vedomstvonıñ baspasöz qızmeti «ötken küngi» derek dep jariyalaydı. Apta sayın eki küngi körsetkiş tömendep sala beredi. Ministrlik mwnı medicina wyımdarı men vedomstvoda demalıs küni ekendigimen tüsindiredi. Dese de koronavirus jönindegi aqparattı jinaqtau-öñdeu isi üzdiksiz jürgiziledi.  DDSW tuıstas derttiñ qaupi birdey ekenine basa nazar audarsa da Qazaqstannıñ Densaulıq saqtau ministrligi koronavirus pen onıñ pnevmoniyalıq türine eki türli közqaraspen qaraydı. Onıñ anıq däleli – KVI+ turalı aqparattıq indikatorlar (aymaqtarğa taraluı, nauqastardıñ ahualı, onıñ işindegi stacionar men ambulatorlıq baqılaudağılar sanı, balalar sanı, ÖJJA-men tınıstap jatqandar, ayıqqandar, jaña keyster, qaytqandar) kündelikti jariyalansa, al KVI- deregi soñğı üş körsetkişten özge mälimet berilmeydi. Al koronavirus pnevmoniyasınıñ aymaqtarğa taraluı jönindegi deregi ministr o basta aytqanday kündelikti ne aptasına emes, endi on künde bir-aq beriletin boldı. Onıñ özinde qwjat formatında saytqa jüktep otıradı, vedomstvo saytında aşıq äri tüsinikti tilde taldap jariyalamaydı.

Qoğamda biılğı 256 mıñ pnevmoniya jağdayın esepke qospay, jalpı statistikanı şildedegi qırğınnan keyin jürgize bastağan Ükimettiñ esebine kümänmen qaraytındar köbeygen.

#Söytse... Qazaqstanda koronavirus ölimi azaymay twr. Soñğı kezderi resmi derekke säykes, qazan ayında koronavirus jwqtırğan 2362 adam anıqtalıp, 87 adam qaytıs bolğan. Däl osı uaqıtta koronavirus pnevmoniyasına 3612 adam şaldığıp, 37 adam qaytqan. Pnevmoniyadan auırğandardıñ sanı koronavirusqa qarğanda eki ese köp bolğanımen, – qaytıs bolğandar PTR arqılı rastalğan kovidten eki ese az.

Ötken tamız jäne qırküyek aylarında Qazaqstanda koronavirus jwqtırğandar 17 mıñnan, al koronavirus pnevmoniyasına şaldıqqandar 34 mıñnan asqan. Ekeuin qosa eseptegende, keyingi eki ayda indetten 600-dey qazaqstandıq ömirden ötken. Sonımen birge, osı aralıqta (tamız-qırküyek) JRVI aurularımen 418 mıñnan, pnevmoniyanıñ basqa türlerimen 82 mıñnan astam jağday tirkelgen.

7 qazan densaulıq saqtau ministri Aleksey Coydıñ koronavirus epidemiyası turalı boljaldı scenariydiñ üş nwsqasın tanıstırğan. Onıñ  aytuınşa, boljamğa apta sayın tüzetuler engizilip otıradı. Aleksey Coy wsınğan pessimistik scenariy boyınşa, eger jwrttıñ 60 payızı ğana maska taqsa, 2020 jıldıñ qazan-jeltoqsanında 190 mıñ adam virus jwqtırıp, 65 mıñ adamdı auruhanağa jatqızuğa «tura keledi». Mwnday jağdayda «jeltoqsannıñ ortasında lokdaun engizilui ıqtimal».

Tağı bir nwsqa realistik scenarige säykes, jwrt araqaşıqtıq saqtap, 70 payızı maska taqsa, qazan-jeltoqsanda 90 mıñday adam virus jwqtırıp, 30 mıñın auruhanağa jatqızuğa «tura keledi». Bwl jağdayda «qañtarda lokdaun engizilui mümkin».

Coy eger jwrttıñ 100 payızı maska tağıp jürse, qatañ karantin bolmaytının, qazan-jeltoqsanda şamamen 40 mıñ adamğa virus jwğıp, 15 mıñ adam auruhanağa tüsetinin aytadı.

Pandemiya kezindegi moderator vedomstvonıñ basşısı karantinniñ bastı indikatorı retinde eldegi auruhanalardıñ 70 payızı tolsa, qatañ lokdaun jariyalau kerektigin mälimdedi.

Karantin şarasın birde küşeytip, birde bosañsıtıp jatqan aymaq sanitarlarınıñ äreketi tüsiniksiz. Derttiñ taralu körsetkişi edäuir az öñirde karantin şekteui  küşeygeni köptiñ kökeyinde swraq tuğızğan. Düysenbi küni Ükimet ekinşi toqsannan bastap 300 oquşısı bar mektepterge dästürli formatta oquğa, bilim oşaqtarında 1 sınıptan 5 sınıpqa deyin, halıqaralıq mektepterde 7 sınıpqa deyin kezekşi sınıptarda oquğa, meşitter men kinoteatrlardıñ jwmısına rwqsat beretin şeşim qabıldadı. Älemniñ soltüstik jartı şarındağı elderde küzgi tolqın bastalıp, DDSW jetekşisi aldağı birneşe ay eñ qauipti kez boların eskertkenine qaramastan, Qazaqstan Ükimeti «jeñildetuge» qadam jasadı. Mwnıñ soñı «mausım-şilde qırğınınıñ» qaytalanuına äkelmesine eşkim kepil emes.

Pnevmoniyanıñ koronavirustıq türinen basqa aurularımen auırğandar sanı 340 mıñğa jaqındadı. Sonday-aq, 13 naurızdan beri COVID-19 infekciyasın jwqtırğandar qatarı 110 mıñnan assa, 1 tamızdan bergi koronavirus pnevmoniyası 37 mıñğa juıqtağan. DDSW mälimetinşe, Qazaqstanda auırğandardıñ sanı 146,6 mıñ. Degenmen Ükimet koronavirus pen onıñ pnevmoniyasın eki bölek esepteydi. Pandemiya bastalğalı jalpı jiını virus jwqqandardıñ 2987-ci (KVI+ / U07.1 – 1830, KVI- / U07.2 – 395, ilespe aurulardan – 672) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingen 672 adamdı jalpı statistikağa qosıp eseptemeydi. Sarapşılar bwğan qarsı. Olardıñ aytuınşa, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

"The Qazaq Times"