AQŞ-Qıtay şielenisi uşığıp twrğanına qaramastan, Qıtay basşısı halıqtı AQŞ-qa qarsı küresuge şaqıratın mälimdeme jasadı. Ol Korey soğısı kezindegi Qıtaydıñ «AQŞ qarsı twru, Koreyağa kömek beru» wranın eske salıp, Soltüstik Koreya üşin kürestiñ auır bağıtı men «wlı jeñisin» wmıtpauğa, batıl äri küresker boluğa şaqırğan.

Bügin, 23 qazan Qıtay astanası Beyjiñdegi «Halıq sarayında» tarihi däuirdi ese alu taqırıbında jiın ötti. Korey soğısınıñ 70 jıldığı qarsañındağı bwl jiın Qıtay Kommunistik partiyasınıñ AQŞ-qa qarsı «demonstraciya wyımdastıru» äreketteriniñ eñ qızu nüktesi bolğanday.

Qıtay basşısı Şi Jinpiñ bügingi jiında: «Auır şayqastardan keyin qıtay-korey jauıngerleri AQŞ äskeri jeñilmeydi degen mirfti bwzdı», – dedi. Ol sonday-aq, Qıtaydıñ «AQŞ-qa qarsı twru, Koreyağa kömek beru» soğısı älemge ädilettiliktiñ saltanat qwratının äygiledi dep üstedi.

Qıtay basşısı: «Kez-kelgen birjaqtılıq, protekcionizm, şekten tıs özimşildik, kez-kelgen bopsalau, blokada jäne qısım jasaudıñ ädisteri bügingi älem üşin müldem praktikalıq qwnı joq, onıñ soñı twyıqqa tireldi», – degen sözderimen AQŞ-tı sınğa alğanday boldı. Ol sözinde tikeley AQŞ-tı körsetpegenimen, Qıtay biligi AQŞ-tı birjaqtı protekcionizm, embargo jäne keybir qıtaylıq kompaniyalarğa salınğan sankciyalar üşin sınap kele jatqanı belgili. Aytalıq, bügin Qıtaydıñ SİM basşısı Uañ I Marokkonıñ sırtqı ister ministrine kezdesken kezde AQŞ-tı «Birjaqtı qorqıtu jäne özimşildik» wstanadı dep aşıq ayıptadı.

QKP-nıñ resmi basılımdarınıñ biri sanalatın Global Times basılımı da bügin Qıtay basşısınıñ sözine wqsas redakciyalıq maqala jariyaladı. Onda «Qıtay ekonomikalıq älsiz keziniñ özinde (Korey soğısında AQŞ-qa qarsı soğısqanın meñzep otır. Q.T.) AQŞ-tan qorıqpağan, büginde küşeyip kele jatqan Qıtay AQŞ-tıñ qısımınan qorqa ma?!» degen mätinder kezdesedi.

AQŞ-Qıtay qatınası eki jıldan beri şielenisti küyde twrsa, biıl jıl basınan bastap Qıtaydıñ Europa jäne Aziya-Tınıq mwhitındağı keybir eldermen bolğan qarım-qatınası kürt tömendedi. Bwğan alıp kelgen Qıtayda bastalğan indet, Şıñjañdağı az sandı wlttarğa jasalğan qısımdar jäne Gonkong mäselesi boldı. Al, tap osınday qısımdar kezinde Qıtay basşısınıñ AQŞ-qa qarsı küresti söz etuin eki türli tüsindiruge boladı.

Birinşiden, Qıtay basşısınıñ bwnday mälimdeme jasauı Qıtay Kommunistik rejiminiñ aldında twrğan qolaysız halıqaralıq jağdaydı körsetedi. Ekinşiden, Qıtay basşısı osı orayda el işindegi barlıq taraptardı AQŞ-qa qarsı küreske jwmıladı dep ümittenip otır. Bılayşa aytqanda, Şi Jinpiñ Qıtay işindegi barlıq frakciyalardı jwmıldıru üşin Korey soğısındağı QKP men AQŞ-tıñ tarihi qaqtığısın paydalanıp otır.

Bwl qırküyekte Pentagon taratqan Qıtay turalı eseptegi keybir däyektemelerdi eske saladı. Onda Mark Esper: «Qıtay küş tepe-teñdigin özine tiimdi jaqqa bwru üşin zoreker ekonomikanı, sayasi diversiyanı jäne äskeri quattı paydalanıp, köbinese basqalardıñ esebinen özgertuge tırısadı», – degen bolatın. Ärine, Qıtay öziniñ äskeri quatın qısqa uaqıtta köterdi. Biraq, Qwrama Ştattıñ äskeri quatınan bölek, onıñ Qıtaydı qorşap twrğan seriktes, odaqtastarına qarsı balama küşti Qıtay da, Resey de tap qazirgi kezeñde toltıra alması belgili.

“The Qazaq Times”