«رەفورمالانىپ جاتقان ءىىم» – «ەستۋشى مەملەكەتتىڭ» پوليتسيا بولىمشەسىندە ادام قايتىس بولدى

كەشە، 19 قازاندا شىعىس قازاقستان وبلىسى ءۇرجار اۋدانى ماقانشى اۋىلدىق وكرۋگىنە قاراستى قاراتۇما اۋىلىنىڭ 33 جاستاعى تۇرعىنى ازامات ورازالى پوليتسيا بولىمشەسىندە قايتىس بولعانى حابارلانعان.

پوليتسيانىڭ رەسمي مالىمدەمەسىنە قارعاندا، ول بولىمشەگە مال ۇرلاۋ ءىسى بويىنشا كۇدىكتى رەتىندە جەتكىزىلگەن.

قايتىس بولعان ادامنىڭ تۋىستارى «مارقۇمنىڭ دەنەسىندە سوققىنىڭ ءىزى بولعانىن» ايتادى. 33 جاستاعى ەر ادامنىڭ قايتىس بولعانىن ەستىگەن اۋىل تۇرعىندارى اۋداندىق پوليتسيا دەپارتامەنتىنە باسىپ كىرگەن. حالىق  ادام ولىمىنە قاتىستى كۇدىكتىنى ۇستاۋعا كەشكى ساعات 21:00-گە دەيىن مۇرسات بەرگەن. سونىمەن قاتار، پوليتسيا بولىمشەسىندەگى بارلىق قىزمەتكەردىڭ تولىقتاي قىزمەتتەن كەتۋىن تالاپ ەتكەن. كۋاگەرلەر مەن تۋىستارى ورازالىنىڭ پوليتسيا بولىمىندە ازاپتاپ ولتىرىلگەنىنە سەنىمدى.

وقيعا ورنىنا بارعان وبلىستىق پوليتسيا دەپارتامەنتىنىڭ باستىعى ساعات ماديەۆ اتالعان ءىس بويىنشا سوتقا دەيىنگى تەرگەۋ باستالعانىن جەتكىزدى. جاعدايدى ءجىتى باقىلاۋعا العانىن جانە قاجەتتى ساراپتامالار، پاتالوگواناتوميالىق زەرتتەۋلەر جۇرگىزىلگەنىن ايتتى.

اشىق اقپاراتتارعا سۇيەنسەك، ازامات ورازالىنى پوليتسيا قىزمەتكەرلەرى وتكەن سەنبىدە، ياعني قازاننىڭ 17-ءسى «مال جايىپ جۇرگەن جەرىنەن ۇستاپ اكەتكەن». ءبىر قىزىعى، جاقىندارىنىڭ سوزىنشە، ونىڭ اتىنا پوليتسياعا ەشبىر شاعىم تۇسپەگەن.

بۇگىن اۋىلدىق پوليتسيا ءبولىمىنىڭ قىزمەتكەرى الىبەك قاسەنوۆ ازاتتىق تىلشىسىنە بەرگەن پىكىرىندە 6 قىزمەتكەر جۇمىستان شىعارىلعانىن مالىمدەگەن. ولاردىڭ ۇشەۋى قاماۋعا الىندى. ناقتىراق ايتقاندا، ءبىر جەدەل ۋاكىل جانە ەكى ۋچاسكەلىك پوليتسيا ينسپەكتورى قامالعان. سايكەسىنشە قىلمىستىق كودەكستىڭ «ازاپتاۋ» بابى بويىنشا قىلمىستىق ءىس قوزعالعان.

قازاقستانداعى تۇتقىنداردى ازاپتاۋ قالىپتى جاعدايعا اينالعانى تۋرالى وتاندىق جانە شەتەلدىك قۇقىق قورعاۋشىلار مەن حالىقارالىق ۇيىمدار ءجيى سىنايدى. اقپارات اعىنىندا دا وقتىن-وقتىن اباقتىداعى زاڭسىزدىقتار قوعامدىق رەزونانس تۋدىرىپ جاتادى. دەگەنمەن بيلىك ىشكى ىستەر جۇيەسىن رەفورمالاۋدى پوليتسەيلەردىڭ فورماسىن وزگەرتۋمەن باستاسا دا، جۇيەلى ماسەلەنى شەشۋدە ناتيجە كورسەتە الماي كەلەدى.

ەۋروپارلامەنت بىلتىر ناۋرىزداعى قارارىندا قازاقستاندا «تۇتقىندار مەن كۇدىكتىلەردى ازاپتاۋ» نورماعا اينالۋىن، قاماۋ ورىندارىنداعى قىزمەتكەرلەردىڭ بىلىكسىز ەكەنىن، پوليتسيا بولىمشەلەرىندەگى زورلىق-زومبىلىق تيىلماعانىن، ەڭ باستىسى، ءبىر دە ءبىر تۇرمەگە تاۋەلسىز حالىقارالىق مونيتورينگ جاسالماعانىن ايىپتاعان. مۇنى اقش مەملەكەتتىك دەپارتامەنتى الەمدەگى ادام قۇقىعىنىڭ احۋالى تۋرالى بيىل جاريالاعان جيىنتىق بايانداماسىندا راستاعان.

“The Qazaq Times”