Seysenbide, 39 eldiñ BWW-dağı diplomattarı Qıtay ükimeti Şıñjañdağı az sandı wlttarğa jasap jatqan qısımın ayıptadı. Bwnday auqımdı qarsılıqqa Beyjiñ tarabı aşulı jauap qaytardı, äri narazılıqtıñ artında Amerika Qwrama Ştattarı twrğanın aytıp şağındı.

39 eldiñ atınan söylegen Germaniyanıñ BWW janındağı twraqtı ökili Kristof Heyzgen boldı. Ol BWW Bas Assambleyasındağı äleumettik, gumanitarlıq jäne mädeni mäselelerdi talqığa salğan üşinşi sekciyasında Qıtaydıñ Şıñjañ men Tibet jerindegi etnikalıq jäne dini azşılıqtarğa jasağan qısımın sınğa aldı. «Biz Qıtaydı adam qwqıqtarın qwrmetteuge, äsirese Şıñjañ men Tibet avtonomiyasındağı etinikalıq jäne dini azşılıqtardıñ qwqığın qwrmetteuge şaqıramız», – dedi Kristof Heyzgen sözinde.

Germaniya ökili Şıñjañda adam qwqıqtarınıñ bwzıluı turalı mälimetterdiñ jiilegenine alañdauşılıq bildirdi. «Şıñjañda dini nanım-senim men wlttıq salt-sanağa, jürip-twru erkindigine qatañ şekteuler bar. Keñ auqımdı qadağalaular wyğır jäne özgede az sandı wlttardı nısanağa aluda. Mäjbürli eñbekten tıs, sterilizaciya jäne jüktilikti baqılauğa alu sındı öreskel jağdaylar köbeyude», – dedi Heyzgen sözinde.

Bas Assambleyanıñ otırısınan keyingi baspasöz jiınında Kristof Heyzgen Beyjiñdi Şıñjañ men Tibet jerindegi lagerlerdi jabuğa şaqırdı. Bıltır Şıñjañ mäselesine alañdauşılıq bildirip, Beyjiñdi az sandı wlttarğa qısımdı toqtatuğa şaqırğan elder sanı 23 bolsa, biıl eki esege juıq köbeygen. Germaniya ökili Beyjiñge bwnı «ayqın belgi» dep eskertti. «Beyjiñniñ Şıñjañğa degen sayasatı barğan sayın nazar audartıp, älemniñ alañdauşılığın tudıruda. Men atap ötken sandar maqsattı türde sandardı zoraytıp körsetu emes, 39 el Qıtayğa aldın ala signal joldadı dese de boladı. Bwl signal arqılı biz Qıtaydı Şıñjañdağı lagerlerdi jabuğa, meşitter men dini orındardı bwzudı toqtatuğa, mäjbürli eñbekti toqtatudı jäne bosanudı küşpen basqarudı toqtatuğa talap etemiz», – dedi.

Germaniyamen qatar Britan ökili de Qıtaydı täuelsiz halıqaralıq komissiyanıñ Şıñjañğa baruın qabıldaudı swrağan. Bwğan qosa baspasöz jiını kezinde Qıtaydıñ 30 mausımda qabıldağan daulı Wlttıq qauipsizdik turalı jaña zañı da sınğa alındı. Britan ökili bwl zañ Gonkongtıñ avtonomiya qwqığın şektep, qala twrğındarınıñ narazılığın basıp-janşuğa mümkindik berdi dep ayıptadı.

“The Qazaq Times”