Foto: https://ortcom.kz

Tayauda Euroodaq BWW-nıñ Liviyadağı qaru-jaraq embargosın bwzğanı üşin qazaqstandıq «Sigma Airlines» kompaniyasına qarsı sankciya engizdi. Odaq engizgen sankciya boyınşa atalğan wyımnıñ aktivteri toqtatılıp, kompaniyağa EO-dan aqşa audaruğa tıyım salınadı.

EO Keñesiniñ saytında qatañ qaulılar Liviyadağı adam qwqıqtarın bwzuğa jauaptı eki adamğa jäne BWW-nıñ osı elge qaru-jaraq embargosın bwzuğa qatısı bar üş wyımğa bağıttalğanı aytılğan. Olar Liviya qaqtığısına baylanıstı şekteu şaraları qoldanılatın jeke jäne zañdı twlğalardıñ tizimine qosıladı.

Sankciya tiziminde jük tasımaldaumen aynalısatın qazaqstandıq «Sigma Airlines» aviakompaniyası, «Avrasya Shipping» türik kompaniyası jäne Iordaniyalıq «med Wave Shipping» kompaniyaları bar.

Resmi qwjatta: «Birikken wlttar wyımı «Sigma Airlines» aviakompaniyasın wyımnıñ Liviyağa äskeri tehnikanı beru embargosına qayşı keletin kommerciyalıq jük äue tasımalın jetkizuşilerdiñ biri retinde anıqtadı. EO barlıq taraptardı adam qwqıqtarı men halıqaralıq qwqıqtı qwrmetteuge birneşe ret ündedi. BWW-nıñ Liviyağa qaru-jaraq embargosın tolıq saqtauğa bel budı  Endi zañ bwzuşılardı jauapqa tartadı», – delingen.

Europalıq odaqtıñ Sırtqı ister jäne qauipsizdik sayasatı jönindegi joğarı ökili Djozef Barrel': «Bügin sankciyalıq tizim bekitildi. Adam qwqığın bwzğan eki jeke twlğa jäne BWW-nıñ embargosın bwzğan üş äue kompaniyasına sankciya salındı. Europalıq odaq adam jäne halıqaralıq qwqıqtardı saqtamağandardı jauapkerşilikke tartuğa tırısadı. Sonday-aq, Liviyağa qaru-jaraq tasığandardı toqtatuğa küş saladı», – delingen.

Qatañ qaulı qarastırılğan jeke jäne zañdı twlğalar Euroodaq aumağına kire almaydı. Sonımen qatar EO-dan kelgen jeke jäne zañdı twlğalardıñ sankciya tizimine engizilgen azamattar men kompaniyalarğa qarajat beruine tıyım salınatındığı aytılğan.

Liviyadağı azamat soğısı 2011 jılı bastalğan bolatın. Sodan beri elde ükimettik küşter men wlttıq äsker arasındağı qaqtığıs tıyılmay twr. Qos tarapqa iri derjavalar qarudı äue, qwrlıq jäne teñiz joldarı arqılı tasımaldap keledi.

Biıl aqpanda BWW Qauipsizdik keñesi «Azee Air», «Sigma Airlines» jäne «Jenis Air» äue kompaniyalarına qatıstı tergeu bastap, olardı «Liviyağa qaru tasıdı, sol arqılı BWW qauipsizdik keñesiniñ şartın bwzdı» dep ayıptağan bolatın. Sonımen qatar Qazaqstannıñ Industriya jäne infraqwrılımdıq damu ministrligi de qwqıq qorğau organdarımen birlesip, BWW Qauipsizdik keñesiniñ embargosın bwzğan, Qazaqstanda tirkelgen üş äue kompaniyası boyınşa jwmıs jürgize kele, äue kemeleriniñ menşik ieleri Birikken Arab Ämirlikterinde («AGANYA LTD») jäne Britandıq Virgin araldarında («Infinitive Seal Inc.») tirkelgen şeteldik kompaniyalar ekenin anıqtağan.

"The Qazaq Times"