فوتو: https://ortcom.kz

تاياۋدا ەۋرووداق بۇۇ-نىڭ ليۆياداعى قارۋ-جاراق ەمبارگوسىن بۇزعانى ءۇشىن قازاقستاندىق «Sigma Airlines» كومپانياسىنا قارسى سانكتسيا ەنگىزدى. وداق ەنگىزگەن سانكتسيا بويىنشا اتالعان ۇيىمنىڭ اكتيۆتەرى توقتاتىلىپ، كومپانياعا ەو-دان اقشا اۋدارۋعا تىيىم سالىنادى.

ەو كەڭەسىنىڭ سايتىندا قاتاڭ قاۋلىلار ليۆياداعى ادام قۇقىقتارىن بۇزۋعا جاۋاپتى ەكى ادامعا جانە بۇۇ-نىڭ وسى ەلگە قارۋ-جاراق ەمبارگوسىن بۇزۋعا قاتىسى بار ءۇش ۇيىمعا باعىتتالعانى ايتىلعان. ولار ليۆيا قاقتىعىسىنا بايلانىستى شەكتەۋ شارالارى قولدانىلاتىن جەكە جانە زاڭدى تۇلعالاردىڭ تىزىمىنە قوسىلادى.

سانكتسيا تىزىمىندە جۇك تاسىمالداۋمەن اينالىساتىن قازاقستاندىق «Sigma Airlines» اۆياكومپانياسى، «Avrasya Shipping» تۇرىك كومپانياسى جانە يوردانيالىق «med Wave Shipping» كومپانيالارى بار.

رەسمي قۇجاتتا: «بىرىككەن ۇلتتار ۇيىمى «Sigma Airlines» اۆياكومپانياسىن ۇيىمنىڭ ليۆياعا اسكەري تەحنيكانى بەرۋ ەمبارگوسىنا قايشى كەلەتىن كوممەرتسيالىق جۇك اۋە تاسىمالىن جەتكىزۋشىلەردىڭ ءبىرى رەتىندە انىقتادى. ەو بارلىق تاراپتاردى ادام قۇقىقتارى مەن حالىقارالىق قۇقىقتى قۇرمەتتەۋگە بىرنەشە رەت ۇندەدى. بۇۇ-نىڭ ليۆياعا قارۋ-جاراق ەمبارگوسىن تولىق ساقتاۋعا بەل بۋدى  ەندى زاڭ بۇزۋشىلاردى جاۋاپقا تارتادى»، – دەلىنگەن.

ەۋروپالىق وداقتىڭ سىرتقى ىستەر جانە قاۋىپسىزدىك ساياساتى جونىندەگى جوعارى وكىلى دجوزەف باررەل: «بۇگىن سانكتسيالىق ءتىزىم بەكىتىلدى. ادام قۇقىعىن بۇزعان ەكى جەكە تۇلعا جانە بۇۇ-نىڭ ەمبارگوسىن بۇزعان ءۇش اۋە كومپانياسىنا سانكتسيا سالىندى. ەۋروپالىق وداق ادام جانە حالىقارالىق قۇقىقتاردى ساقتاماعانداردى جاۋاپكەرشىلىككە تارتۋعا تىرىسادى. سونداي-اق، ليۆياعا قارۋ-جاراق تاسىعانداردى توقتاتۋعا كۇش سالادى»، – دەلىنگەن.

قاتاڭ قاۋلى قاراستىرىلعان جەكە جانە زاڭدى تۇلعالار ەۋرووداق اۋماعىنا كىرە المايدى. سونىمەن قاتار ەو-دان كەلگەن جەكە جانە زاڭدى تۇلعالاردىڭ سانكتسيا تىزىمىنە ەنگىزىلگەن ازاماتتار مەن كومپانيالارعا قاراجات بەرۋىنە تىيىم سالىناتىندىعى ايتىلعان.

ليۆياداعى ازامات سوعىسى 2011 جىلى باستالعان بولاتىن. سودان بەرى ەلدە ۇكىمەتتىك كۇشتەر مەن ۇلتتىق اسكەر اراسىنداعى قاقتىعىس تىيىلماي تۇر. قوس تاراپقا ءىرى دەرجاۆالار قارۋدى اۋە، قۇرلىق جانە تەڭىز جولدارى ارقىلى تاسىمالداپ كەلەدى.

بيىل اقپاندا بۇۇ قاۋىپسىزدىك كەڭەسى «Azee Air»، «Sigma Airlines» جانە «Jenis Air» اۋە كومپانيالارىنا قاتىستى تەرگەۋ باستاپ، ولاردى «ليۆياعا قارۋ تاسىدى، سول ارقىلى بۇۇ قاۋىپسىزدىك كەڭەسىنىڭ شارتىن بۇزدى» دەپ ايىپتاعان بولاتىن. سونىمەن قاتار قازاقستاننىڭ يندۋستريا جانە ينفراقۇرىلىمدىق دامۋ مينيسترلىگى دە قۇقىق قورعاۋ ورگاندارىمەن بىرلەسىپ، بۇۇ قاۋىپسىزدىك كەڭەسىنىڭ ەمبارگوسىن بۇزعان، قازاقستاندا تىركەلگەن ءۇش اۋە كومپانياسى بويىنشا جۇمىس جۇرگىزە كەلە، اۋە كەمەلەرىنىڭ مەنشىك يەلەرى بىرىككەن اراب امىرلىكتەرىندە («AGANYA LTD») جانە بريتاندىق ۆيرگين ارالدارىندا («Infinitive Seal Inc.») تىركەلگەن شەتەلدىك كومپانيالار ەكەنىن انىقتاعان.

"The Qazaq Times"