Qazaqstan qoğamında jeke twlğalardıñ qılmısı azayğanımen, biraq şeneunikter jii wrınatın wyımdasqan ekonomikalıq qılmıs keyingi bes jılda bolmağan körsetkişke jetken.

21 qırküyek, düysenbi küni Ortalıq kommunikaciyalar qızmetinde ötken brifingte Qarjı monitoringi komietiniñ  profilaktika jwmısı jäne baqılau basqarmasınıñ asa mañızdı ister boyınşa tergeuşisi Erden Jwmanıñ mälimdeuinşe, biıl qañtar-tamız aralığındağı segiz ayda 1,4 mıñday  ekonomikalıq qılmıstıq is qozğalğan. Onıñ jartısı auır jäne asa auır qılmıstar. Nätijesinde qaytarılğan soması 20 payızğa artıp, äzirge 33 mlrd teñge bolğan.

Belgili bir qızmet atqarmaytın jauapkerşiligi şekteuli seriktestikterdiñ esepşotı arqılı ekinşi deñgeyli banktterden qarajattı zañsız şeşken 60-tan astam wyımdasqan qılmıstıq  top anıqtaldı. Olar 1200-den astam baqılausız kompaniya qwrğan. Sol arqılı 2 trln teñgeden astam aqşanı qoldı etken.

Juırda Qazaqstannıñ bas prokurorınıñ orınbasarı Marat Ahmetjanov biılğı segiz ayda ötken jıldıñ osı merzimimen salıs­tır­ğanda jasalğan qılmıstıq zañ bwzu­şı­lıqtar sanı 35%-ğa (bıltır – 174 mıñ, biıl – 113,6 mıñ) azayğanın habarlağan.

«Elimizde tirkeletin qılmıstıq qwqıqbwzuşılıqtar sanı azaydı. Osı jıldıñ 8 ayında qılmıstıq qwqıq bwzu deregi ötken jılmen salıstırğanda 35 payızğa azaydı. Wrlıq deregi 52 payızğa, qaraqşılıq 50 payızğa, bwzaqılıq 46 payızğa qısqardı», – degen Ahmetjanov 8 qırküyek küni OrtKomda ötken baspasöz mäslihatında.

Osılayşa iri oyınşılar men zañdı twlğalardıñ aralasuımen jüzege asatın ekonomikalıq qılmıs örşip twr.

"The Qazaq Times"