Soñğı kezde Qıtaydıñ İşki ister ministrliginde jemqorlıqpen nemese sayasi tärtipke qatıstı ayıptalğan lauazımdı twlğalar köbeydi. Şanhay qalasınıñ orınbasar äkimi, Şanhay qalalıq İşki ister departamentiniñ (Qıtayda Qoğam qauipsizdik departamenti dep ataladı) basşısı Goñ Dau-an partiya tärtibi men zañın öreskel bwzdı dep ayıptalıp, tergeuge alınğan.

QKP Ortalıq komiteti janındağı Tärtip tekseru komissiyasınıñ ğalamtordağı resmi paraqşasında Goñ Dau-annıñ qaşan tergeuge alınğanı turalı anıq mälimet joq. Şanhaydağı merzimdi basılımdarda da 31 şildeden beri qaray ol turalı eşqanday resmi mälimetter taratpağan. Resmi basılımdarda onıñ soñğı ret 31 şilde küni wlttıq qauipsizdik jönindegi jinalısqa qatısqanı turalı mälimet bar.

Goñ Dau-än Şanhay qalası äkiminiñ 8 orınbasarınıñ biri. Ol qalalıq İşki ister departamentin basqara otırıp, qoğamdıq qauipsizdik, sot äkimşiligi, twraqtılıqtı jäne jol qozğalısı qauipsizdigin saqtau sındı mindetteri bar. Sonday-aq, Şanhaydağı qauipsizdik küşter, türmelerden tartıp Sot policiyasına deyin Goñnıñ qol astına qaraydı. Bılayşay aytqanda, Şanhaydağı mañızdı toğız lauazımdınıñ biri. Al, Şanhay bolsa strategiyalıq mañızdılığı jağınan ortalıq qaladan kem emes.

Goñ Dau-an jıl basınan beri Qıtaydıñ qauipsizdik qızmetinen tergeuge alınğan üşinşi joğarı lauazımdı. Säuirde QKP OK müşesi, işki ister ministriniñ orınbasarı Sun Lijun de partiya tärtibi men zañdı öreskel bwzdı dep ayıptalıp, QKP Tärtip tekseru komissiyası jağınan tergeuge alınğan. Al, mausımda Çwñçin (Çuncin) qalası äkiminiñ orınbasarı, işki ister departamentiniñ basşısı Dıñ Hulin da osığan wqsas ayıppen qamalğan. Bwlardıñ üşeui de zañ men partiya tärtibin öreskel bwzdı dep ayıptalğan.

Bwl Qıtay basşısı Şi Jinpiñniñ sayasi tazalau äreketin jalğastırıp jatqanın anıq körsetedi. Provinciyalar men mañızdı qalalardağı qauipsizdik qızmetiniñ lauazımdıların qwlatu äreketterinde nayzanıñ wşı QKP Sayasi-qwqıqtıq komitetiniñ bwrınğı hatşısı Mıñ Jyanjuğa bağıttalğan dese de boladı. Qıtaydağı aqparat qwraldar Goñ Dau-an men Dıñ Hulin jäne Mıñ Jyanju üşeui arasında sıbaylastıq bolğanı turalı mälimetter tarağan. Şanhay qalalıq İşki ister departamentiniñ saytındağı mälimette Goñ Dau-annıñ ornına Şanhay qalalıq Mädeniet basqarmasınıñ beyzattıq mwralar jönindegi departamenttiñ jetekşisi qızmetindegi Çın Toñ tağayındalğan. Ol Qıtay biliginiñ endigi iegerleri sanalatın «70-şı jılğılar» tolqınınıñ ökili sanaladı. Bwl Qıtaydıñ bilik klandarı arasındağı keybir tartıstardan da habar beredi.

“The Qazaq Times”