سوڭعى كەزدە قىتايدىڭ ىشكى ىستەر مينيسترلىگىندە جەمقورلىقپەن نەمەسە ساياسي تارتىپكە قاتىستى ايىپتالعان لاۋازىمدى تۇلعالار كوبەيدى. شانحاي قالاسىنىڭ ورىنباسار اكىمى، شانحاي قالالىق ىشكى ىستەر دەپارتامەنتىنىڭ (قىتايدا قوعام قاۋىپسىزدىك دەپارتامەنتى دەپ اتالادى) باسشىسى گوڭ داۋ-ان پارتيا ءتارتىبى مەن زاڭىن ورەسكەل بۇزدى دەپ ايىپتالىپ، تەرگەۋگە الىنعان.

قكپ ورتالىق كوميتەتى جانىنداعى ءتارتىپ تەكسەرۋ كوميسسياسىنىڭ عالامتورداعى رەسمي پاراقشاسىندا گوڭ داۋ-اننىڭ قاشان تەرگەۋگە الىنعانى تۋرالى انىق مالىمەت جوق. شانحايداعى مەرزىمدى باسىلىمداردا دا 31 شىلدەدەن بەرى قاراي ول تۋرالى ەشقانداي رەسمي مالىمەتتەر تاراتپاعان. رەسمي باسىلىمداردا ونىڭ سوڭعى رەت 31 شىلدە كۇنى ۇلتتىق قاۋىپسىزدىك جونىندەگى جينالىسقا قاتىسقانى تۋرالى مالىمەت بار.

گوڭ داۋ-ءان شانحاي قالاسى اكىمىنىڭ 8 ورىنباسارىنىڭ ءبىرى. ول قالالىق ىشكى ىستەر دەپارتامەنتىن باسقارا وتىرىپ، قوعامدىق قاۋىپسىزدىك، سوت اكىمشىلىگى، تۇراقتىلىقتى جانە جول قوزعالىسى قاۋىپسىزدىگىن ساقتاۋ سىندى مىندەتتەرى بار. سونداي-اق، شانحايداعى قاۋىپسىزدىك كۇشتەر، تۇرمەلەردەن تارتىپ سوت پوليتسياسىنا دەيىن گوڭنىڭ قول استىنا قارايدى. بىلايشاي ايتقاندا، شانحايداعى ماڭىزدى توعىز لاۋازىمدىنىڭ ءبىرى. ال، شانحاي بولسا ستراتەگيالىق ماڭىزدىلىعى جاعىنان ورتالىق قالادان كەم ەمەس.

گوڭ داۋ-ان جىل باسىنان بەرى قىتايدىڭ قاۋىپسىزدىك قىزمەتىنەن تەرگەۋگە الىنعان ءۇشىنشى جوعارى لاۋازىمدى. ساۋىردە قكپ وك مۇشەسى، ىشكى ىستەر ءمينيسترىنىڭ ورىنباسارى سۋن ليجۋن دە پارتيا ءتارتىبى مەن زاڭدى ورەسكەل بۇزدى دەپ ايىپتالىپ، قكپ ءتارتىپ تەكسەرۋ كوميسسياسى جاعىنان تەرگەۋگە الىنعان. ال، ماۋسىمدا چۇڭچين (چۋنتسين) قالاسى اكىمىنىڭ ورىنباسارى، ىشكى ىستەر دەپارتامەنتىنىڭ باسشىسى دىڭ حۋلين دا وسىعان ۇقساس ايىپپەن قامالعان. بۇلاردىڭ ۇشەۋى دە زاڭ مەن پارتيا ءتارتىبىن ورەسكەل بۇزدى دەپ ايىپتالعان.

بۇل قىتاي باسشىسى شي ءجينپيڭنىڭ ساياسي تازالاۋ ارەكەتىن جالعاستىرىپ جاتقانىن انىق كورسەتەدى. پروۆينتسيالار مەن ماڭىزدى قالالارداعى قاۋىپسىزدىك قىزمەتىنىڭ لاۋازىمدىلارىن قۇلاتۋ ارەكەتتەرىندە نايزانىڭ ۇشى قكپ ساياسي-قۇقىقتىق كوميتەتىنىڭ بۇرىنعى حاتشىسى مىڭ جيانجۋعا باعىتتالعان دەسە دە بولادى. قىتايداعى اقپارات قۇرالدار گوڭ داۋ-ان مەن دىڭ حۋلين جانە مىڭ جيانجۋ ۇشەۋى اراسىندا سىبايلاستىق بولعانى تۋرالى مالىمەتتەر تاراعان. شانحاي قالالىق ىشكى ىستەر دەپارتامەنتىنىڭ سايتىنداعى مالىمەتتە گوڭ داۋ-اننىڭ ورنىنا شانحاي قالالىق مادەنيەت باسقارماسىنىڭ بەيزاتتىق مۇرالار جونىندەگى دەپارتامەنتتىڭ جەتەكشىسى قىزمەتىندەگى چىن توڭ تاعايىندالعان. ول قىتاي بيلىگىنىڭ ەندىگى يەگەرلەرى سانالاتىن «70-شى جىلعىلار» تولقىنىنىڭ وكىلى سانالادى. بۇل قىتايدىڭ بيلىك كلاندارى اراسىنداعى كەيبىر تارتىستاردان دا حابار بەرەدى.

“The Qazaq Times”