Qazaqstannıñ Ortalıq kommunikaciya qızmeti alañında 24 şilde işki ister ministri Erlan Twrğımbaev Sätpaev qalasındağı ereuilge baylanıstı qısqaşa tüsindirme berdi.  

«23 şilde küni sağat 21:00-de Sätpaev qalasınıñ policiyasına Jezqazğan qalasınıñ twrğını bes jasar balasınıñ (qız bala) joğalğanın aytıp şağımdanğan. Dereu izdestiru nätijesinde büldirşin qaladağı bir üyden tabıldı. 5 jasar qızdı zorladı degen küdikpen bir azamat qamauğa alındı. Biraq birneşe adam küdiktini öz qolına berudi talap etip, janjal şığardı. Bwzaqılıq jasap, policeylerge qarsılıq tanıttı. Bala därigerlerdiñ qarauında. Oğan medicinalıq saraptamağa tekseris jasaladı. Sätpaev qalasında jağday twraqtı, baqılauda. İs Qılmıstıq kodekste közdelgen jetkinşekti wrlau jäne zorlıq körsetu ayıbımen qozğaldı», – dep qısqa qayırdı bas policey.

Sonday-aq ol jalğan aqparatqa senbeuge jäne taratpauğa, arandatu sarını bayqalatın qauesetterge ermeuge şaqırdı.

23 şilde keşkisin Qarağandı oblısınıñ Sätpaev qalasında bes jastağı qız bala joğalıp, policiya men eriktiler jwmıla  izdegen. Tün aua jwmağa qarağan sağattarda qaladağı köpqabattı twrğın üydiñ birinen iisşil ittiñ kömegimen büldirşin egde jastağı er adamnıñ päterinen tabılğanı turalı aqparat tarağan. Sätpaevtıqtar birneşe sağat boyı küdiktini «jalpıhalıqtıq sot retinde köpşilik aldında jauapqa tartuğa tırısıp», öz betinşe jazalauğa talpınğan. Närestege zorlıq körsetti dep ızalanğan jwrt qalalıq policiya departamenti bastığınıñ orınbasarı Ernat Qaliakparov, qala äkimi Asqar Idırısov jäne jergilikti imamnıñ da sözine qwlaq aspağan. Osı sebepti alğa tartqan aşulı el (äleumettik jelilerde tarağan videodan toptıñ qatarı qalıñ ekenin añğaru qiın emes – red.) küdikti jetkizilgen policiya bölimşesine bet alıp, onda tayaq-tas laqtırğan, küştik qwrılımnıñ köligin örtegen. Sondıqtan Wlttıq gvardiyanıñ arnayı äskeri, temirqwrsau jasağı jwmıldırılğan.

Ministr Twrğımbaev bwzaqılıqtı aqtauğa bolmaytının bastı közir twtqanımen, alayda mwnıñ artında azamattardıñ tek formaldi türde reformalanatın işki ister organdarı men sot jüyesine senimsizdigi, atalğan salalarda qordalanğan özekti mäselelerdiñ barı jasırın emes. Narazı köñil-küyde jürgen jüzdegen adamnıñ qatarın redakciyalau arqılı «birneşe adamğa» kemitu kimge kerek bolğanı tüsiniksiz. Ministrdiñ spiçrayteri ne baspasöz hatşısı däl osı twsta manipulyaciyağa jol bergen siyaqtı. Birneşe adamnıñ şıntuaytındağı körinsi qalıñ toptıñ, eldiñ közqarası jatqanın eskersek, olardı jappay arandatuşılarğa balau artıq ketkendik emes pe?

Bwl jağdayğa baylanıstı azamattıq jäne qoğam belsendileri «zañ quatına senim setinegende el ayıptılardı özinşe jazalaudı qolğa alıp, Halıq sotı alğa şığatının, biraq mwnıñ qauipti ekenin» aytadı.

"The Qazaq Times"