قازاقستاننىڭ ورتالىق كوممۋنيكاتسيا قىزمەتى الاڭىندا 24 شىلدە ىشكى ىستەر ءمينيسترى ەرلان تۇرعىمباەۆ ساتپاەۆ قالاسىنداعى ەرەۋىلگە بايلانىستى قىسقاشا تۇسىندىرمە بەردى.  

«23 شىلدە كۇنى ساعات 21:00-دە ساتپاەۆ قالاسىنىڭ پوليتسياسىنا جەزقازعان قالاسىنىڭ تۇرعىنى بەس جاسار بالاسىنىڭ (قىز بالا) جوعالعانىن ايتىپ شاعىمدانعان. دەرەۋ ىزدەستىرۋ ناتيجەسىندە ءبۇلدىرشىن قالاداعى ءبىر ۇيدەن تابىلدى. 5 جاسار قىزدى زورلادى دەگەن كۇدىكپەن ءبىر ازامات قاماۋعا الىندى. بىراق بىرنەشە ادام كۇدىكتىنى ءوز قولىنا بەرۋدى تالاپ ەتىپ، جانجال شىعاردى. بۇزاقىلىق جاساپ، پوليتسەيلەرگە قارسىلىق تانىتتى. بالا دارىگەرلەردىڭ قاراۋىندا. وعان مەديتسينالىق ساراپتاماعا تەكسەرىس جاسالادى. ساتپاەۆ قالاسىندا جاعداي تۇراقتى، باقىلاۋدا. ءىس قىلمىستىق كودەكستە كوزدەلگەن جەتكىنشەكتى ۇرلاۋ جانە زورلىق كورسەتۋ ايىبىمەن قوزعالدى»، – دەپ قىسقا قايىردى باس پوليتسەي.

سونداي-اق ول جالعان اقپاراتقا سەنبەۋگە جانە تاراتپاۋعا، ارانداتۋ سارىنى بايقالاتىن قاۋەسەتتەرگە ەرمەۋگە شاقىردى.

23 شىلدە كەشكىسىن قاراعاندى وبلىسىنىڭ ساتپاەۆ قالاسىندا بەس جاستاعى قىز بالا جوعالىپ, پوليتسيا مەن ەرىكتىلەر جۇمىلا  ىزدەگەن. ءتۇن اۋا جۇماعا قاراعان ساعاتتاردا قالاداعى كوپقاباتتى تۇرعىن ءۇيدىڭ بىرىنەن ءيىسشىل ءيتتىڭ كومەگىمەن ءبۇلدىرشىن ەگدە جاستاعى ەر ادامنىڭ پاتەرىنەن تابىلعانى تۋرالى اقپارات تاراعان. ساتپاەۆتىقتار بىرنەشە ساعات بويى كۇدىكتىنى «جالپىحالىقتىق سوت رەتىندە كوپشىلىك الدىندا جاۋاپقا تارتۋعا تىرىسىپ»، ءوز بەتىنشە جازالاۋعا تالپىنعان. نارەستەگە زورلىق كورسەتتى دەپ ىزالانعان جۇرت قالالىق پوليتسيا دەپارتامەنتى باستىعىنىڭ ورىنباسارى ەرنات قالياكپاروۆ، قالا اكىمى اسقار ىدىرىسوۆ جانە جەرگىلىكتى يمامنىڭ دا سوزىنە قۇلاق اسپاعان. وسى سەبەپتى العا تارتقان اشۋلى ەل (الەۋمەتتىك جەلىلەردە تاراعان ۆيدەودان توپتىڭ قاتارى قالىڭ ەكەنىن اڭعارۋ قيىن ەمەس – رەد.) كۇدىكتى جەتكىزىلگەن پوليتسيا بولىمشەسىنە بەت الىپ، وندا تاياق-تاس لاقتىرعان، كۇشتىك قۇرىلىمنىڭ كولىگىن ورتەگەن. سوندىقتان ۇلتتىق گۆارديانىڭ ارنايى اسكەرى، تەمىرقۇرساۋ جاساعى جۇمىلدىرىلعان.

مينيستر تۇرعىمباەۆ بۇزاقىلىقتى اقتاۋعا بولمايتىنىن باستى كوزىر تۇتقانىمەن، الايدا مۇنىڭ ارتىندا ازاماتتاردىڭ تەك ءفورمالدى تۇردە رەفورمالاناتىن ىشكى ىستەر ورگاندارى مەن سوت جۇيەسىنە سەنىمسىزدىگى، اتالعان سالالاردا قوردالانعان وزەكتى ماسەلەلەردىڭ بارى جاسىرىن ەمەس. نارازى كوڭىل-كۇيدە جۇرگەن جۇزدەگەن ادامنىڭ قاتارىن رەداكتسيالاۋ ارقىلى «بىرنەشە ادامعا» كەمىتۋ كىمگە كەرەك بولعانى تۇسىنىكسىز. ءمينيستردىڭ سپيچرايتەرى نە ءباسپاسوز حاتشىسى ءدال وسى تۇستا مانيپۋلياتسياعا جول بەرگەن سياقتى. بىرنەشە ادامنىڭ شىنتۋايتىنداعى كورىنسى قالىڭ توپتىڭ، ەلدىڭ كوزقاراسى جاتقانىن ەسكەرسەك، ولاردى جاپپاي ارانداتۋشىلارعا بالاۋ ارتىق كەتكەندىك ەمەس پە؟

بۇل جاعدايعا بايلانىستى ازاماتتىق جانە قوعام بەلسەندىلەرى «زاڭ قۋاتىنا سەنىم سەتىنەگەندە ەل ايىپتىلاردى وزىنشە جازالاۋدى قولعا الىپ، حالىق سوتى العا شىعاتىنىن، بىراق مۇنىڭ قاۋىپتى ەكەنىن» ايتادى.

"The Qazaq Times"