BAQ ökilderine üş aptadan beri qwpiya bolıp kelgen koronavirustıñ janama äserinen qaytıs bolğandar sanı 319-ğa jetti.

Negizgi sebebi basqa, özge sozılmalı aurulardıñ saldarınan qaytıs bolğan, biraq boyında COVID-19 ştamı bar qwrbandardıñ sanı soñğı ret 2 şilde aytılğan edi. Odan beri 21 kün ötkende mälimet özge BAQ ökilderi qatarında redakciyanıñ joldağan resmi swrau hatı men Ortalıq kommunikaciya qızmetinde tikeley efirde qoyılğan swraqtarınan keyin qiındıqpen jañardı.

Pandemiya kezindegi virustıq sebeppen bolğan ölim jağdayın anıqtaytın komissiyanıñ dereginşe, virustıñ janama äserinen qaytıs bolğandardıñ sanı 319-ğa ösipti. Bwl turalı bügin, beysenbi Memlekettik bas sanitar-däriger Ayjan Esmağambetova BAQ ökilderimen ötken onlayn baspasöz jiınında mälimdedi.

Bwğan deyin 2 şilde küni densaulıq saqtau ministri Aleksey Coy 101 adamnıñ däl osı sebeppen qaytıs bolğanın habarlağan. Üş aptanıñ işinde 218 adam qaytqanın köruge boladı.

Biıl 1 qañtar men 15 şilde aralığında Qazaqstanda 234 mıñnan astam adam pnevmoniya auruına şaldıqqan. Ökpe qabınuınıñ eñ şarıqtau şegi mausım ayınıñ ekinşi jäne şilde ayınıñ alğaşqı jartısında bayqalğan. Esmağambetovanıñ sözinşe, qazirgi tañda el köleminde 45 mıñ nauqas stacionar-auruhanalarda emdelip jatır. Sonday-aq şilde ayı bastalğalı beri pnevmoniya dertine şaldıqqan 63 491 adam auruhanağa jatqızılğan.

Soñğı resmi mälimetke qarağanda, elde 77 mıñğa juıq adamnan koronavirus anıqtalğan. 610 adam qaytıs bolğan. Keybir sarapşılar elde virus jwqtırğandar men indetpen baylanıstı adam ölimi bwdan da köp dep sanaydı. Pandemiyanıñ moderatorı sanalatın Memlekettik ştabtıñ www.coronavirus2020.kz aqparat resursınıñ habarlauınşa, koronavirustıñ kesirinen 585 qazaqstandıq qaytıs bolğan. Jalpı jiıntıq esebine kelsek, osı uaqıtqa deyin COVID-19 virusın jwqtırğan 904 adam qaytıs bolğan.  DDSW wsınğan «COVID-19 ölimin sertifikaciyalau jäne klassifikaciyalauğa arnalğan» halıqaralıq nwsqaulıq boyınşa oqıs-baqıtsız jağdaydı esepke almağanda, boyınan virus tabılıp, qaytıs bolğan kez kelgen adamnıñ deregi jalpı esepke qosıluı qajet. Qazaqstan auırğan nauqastardı da mausımda simptomdı-simptomsız dep bölip qarastırğan. Biraq jaña ministr Aleksey Coy bwl ädisten bas tartqan. Degenmen ölim jağdayın tura-janama sebeppen esepteudiñ ekijaqtı täsili toqtamay twr.

"The Qazaq Times"