باق وكىلدەرىنە ءۇش اپتادان بەرى قۇپيا بولىپ كەلگەن كوروناۆيرۋستىڭ جاناما اسەرىنەن قايتىس بولعاندار سانى 319-عا جەتتى.

نەگىزگى سەبەبى باسقا، وزگە سوزىلمالى اۋرۋلاردىڭ سالدارىنان قايتىس بولعان، بىراق بويىندا COVID-19 شتامى بار قۇربانداردىڭ سانى سوڭعى رەت 2 شىلدە ايتىلعان ەدى. ودان بەرى 21 كۇن وتكەندە مالىمەت وزگە باق وكىلدەرى قاتارىندا رەداكتسيانىڭ جولداعان رەسمي سۇراۋ حاتى مەن ورتالىق كوممۋنيكاتسيا قىزمەتىندە تىكەلەي ەفيردە قويىلعان سۇراقتارىنان كەيىن قيىندىقپەن جاڭاردى.

پاندەميا كەزىندەگى ۆيرۋستىق سەبەپپەن بولعان ءولىم جاعدايىن انىقتايتىن كوميسسيانىڭ دەرەگىنشە، ۆيرۋستىڭ جاناما اسەرىنەن قايتىس بولعانداردىڭ سانى 319-عا ءوسىپتى. بۇل تۋرالى بۇگىن، بەيسەنبى مەملەكەتتىك باس سانيتار-دارىگەر ايجان ەسماعامبەتوۆا باق وكىلدەرىمەن وتكەن ونلاين ءباسپاسوز جيىنىندا مالىمدەدى.

بۇعان دەيىن 2 شىلدە كۇنى دەنساۋلىق ساقتاۋ ءمينيسترى الەكسەي تسوي 101 ادامنىڭ ءدال وسى سەبەپپەن قايتىس بولعانىن حابارلاعان. ءۇش اپتانىڭ ىشىندە 218 ادام قايتقانىن كورۋگە بولادى.

بيىل 1 قاڭتار مەن 15 شىلدە ارالىعىندا قازاقستاندا 234 مىڭنان استام ادام پنەۆمونيا اۋرۋىنا شالدىققان. وكپە قابىنۋىنىڭ ەڭ شارىقتاۋ شەگى ماۋسىم ايىنىڭ ەكىنشى جانە شىلدە ايىنىڭ العاشقى جارتىسىندا بايقالعان. ەسماعامبەتوۆانىڭ سوزىنشە، قازىرگى تاڭدا ەل كولەمىندە 45 مىڭ ناۋقاس ستاتسيونار-اۋرۋحانالاردا ەمدەلىپ جاتىر. سونداي-اق شىلدە ايى باستالعالى بەرى پنەۆمونيا دەرتىنە شالدىققان 63 491 ادام اۋرۋحاناعا جاتقىزىلعان.

سوڭعى رەسمي مالىمەتكە قاراعاندا، ەلدە 77 مىڭعا جۋىق ادامنان كوروناۆيرۋس انىقتالعان. 610 ادام قايتىس بولعان. كەيبىر ساراپشىلار ەلدە ۆيرۋس جۇقتىرعاندار مەن ىندەتپەن بايلانىستى ادام ءولىمى بۇدان دا كوپ دەپ سانايدى. پاندەميانىڭ مودەراتورى سانالاتىن مەملەكەتتىك شتابتىڭ www.coronavirus2020.kz اقپارات رەسۋرسىنىڭ حابارلاۋىنشا، كوروناۆيرۋستىڭ كەسىرىنەن 585 قازاقستاندىق قايتىس بولعان. جالپى جيىنتىق ەسەبىنە كەلسەك، وسى ۋاقىتقا دەيىن COVID-19 ۆيرۋسىن جۇقتىرعان 904 ادام قايتىس بولعان.  ددسۇ ۇسىنعان «COVID-19 ءولىمىن سەرتيفيكاتسيالاۋ جانە كلاسسيفيكاتسيالاۋعا ارنالعان» حالىقارالىق نۇسقاۋلىق بويىنشا وقىس-باقىتسىز جاعدايدى ەسەپكە الماعاندا، بويىنان ۆيرۋس تابىلىپ، قايتىس بولعان كەز كەلگەن ادامنىڭ دەرەگى جالپى ەسەپكە قوسىلۋى قاجەت. قازاقستان اۋىرعان ناۋقاستاردى دا ماۋسىمدا سيمپتومدى-سيمپتومسىز دەپ ءبولىپ قاراستىرعان. بىراق جاڭا مينيستر الەكسەي تسوي بۇل ادىستەن باس تارتقان. دەگەنمەن ءولىم جاعدايىن تۋرا-جاناما سەبەپپەن ەسەپتەۋدىڭ ەكىجاقتى ءتاسىلى توقتاماي تۇر.

"The Qazaq Times"