Reseydegi şeruler tolqını. Foto: Twitter.com

Ötken demalıs künderi Reseydiñ birneşe qalasında Habarovskide twtqındalğan «halıq gubernatorı» Sergey Furgaldı jaqtauşılar narazılıq akciyaların ötkizdi. Senbide qala köşelerine ondağan mıñ adam şıqtı. Koronavirus pandemiyasına qaramastan jer-jerdi şarpığan şeruler şeteldik basılımdar tarapınan «revolyuciyağa qadam jäne 1937-38 jıldardağı repressiyanıñ qaytalanuı» dep bağalandı.

Birinşi şeru 11 şildede ötkizildi. Bilik sağat 12-ge josparlanğan miting kezinde «koronaviruske baylanıstı dezinfekciya jasau üşin» alañdı jauıp tastadı. Keyinnen alañğa birneşe avtozak pen patrul' köligi qoyıldı. Deggenmen biliktiñ bwl äreketi narazı halıqqa tosqauıl bolğan joq. Şeruge qatısuşılar qorşauğa ilinbegen Lenin eskertkişiniñ janına jinala bastadı. Akciya qatısuşıları gubernatordıñ qamaluın «sayasi is, Furgal Mäskeuge jaqpay qalğan» dep sanaydı.

11 şilde bastalğan şeru birneşe künge jalğastı. Narazılıq bildiruşiler aldımen jergilikti ükimet ğimaratınıñ janına jinaldı, sodan keyin Karl Marks köşesi boyınan ötip, gubernatordıñ wstaluına qarsı wrandadı. Oğan qatıstı sottıñ ädil ötuin talap etti. Ötken senbide elu mıñday adam Habarovsk köşelerine şığıp, Furgaldı bosatudı talap etti. 600 mıñday twrğını bar qalada bwğan deyin osınşama halıq şeruge şıqpağan. Tipti Reseydiñ iri qalalarında da soñğı 20 jılda osınday auqımdı şara ötpegen. Osı statistikanı nazarğa ala otırıp, sarapşılar bwl şeruler tolqının «revolyuciyağa qadam» dep bağaladı.

19 şildede Reseydiñ Sibir, Qiır Şığısındağı birneşe qalada Furgaldı jaqtauşılar şerui ötti. Akciya qatısuşıları Vladivostok, Novosibirsk ortalığımen jürip ötti. Policiya Vladivostokta eki adamdı wstap, keyinnen bosattı.

Jeksenbilik miting osımen toğızınşı ret ötkizilip otır. Demalıs künderi 30 gradus ıstıqqa qaramastan adamdar plakat wstap, köşege şıqtı. Barlıq şeruge bilik tarapınan kelisim berilmegen, biraq policiya eşkimdi wstağan joq. Şerulerge kün sayın 10 mıñnan 85 mıñğa deyin adam jinalğan.

Bügin Resey prezidenti Vladimir Putin Sergey Furgaldı otstavkağa jiberdi. Aymaq basşısınıñ mindetin uaqıtşa atqarudı Mihail Degtyarevge tabıstadı. Ol da Furgal siyaqtı LDPR partiyasınıñ ökili. Bwrın Degtyarev Mäskeu meri saylauına eki ret qatısqan.

Furgal isi

Habarovsk gubernatorı Sergey Furgal 9 şildede wstaldı. Ertesine Mäskeu sotınıñ şeşimimen qamauğa alındı. Tergeu mälimeti boyınşa, gubernatorğa 2004-2005 jıldarı üş käsipker – Aleksandr Smol'skiy, Evgeniy Zori men Oleg Bulatovtıñ qastandıqpen öltiriluin wyımdastırdı degen ayıp tağılğan. Olardıñ barlığı metall saudasımen aynalısqan. Al osı saladağı käsiporındardıñ bir ülesi Furgal men onıñ äyeline tiesili.

16 şilde tergeu komiteti Furgaldıñ eki kisi öltiru men qastandıqqa qatısı bar ekenin resmi mälimdedi. Furgal öz kinäsin moyındağan joq. Qorğauşılarınıñ aytuınşa, kezinde käsibinde seriktes bolğan äldebireudiñ sözine ğana süyenip, osıdan 15 jıl bwrın bolğan qılmıstarğa ayıptap otır. Ölke twrğındarınıñ basım böligi de bwğan kümänmen qaraydı.

Sergey Furgal – LDPR Dumasınıñ deputatı, 2018 jıldıñ küzinde Habarovsk ölkesiniñ gubernatorı bolıp saylandı. Saylauda ol Kreml' men «Edinaya Rossiya» qoldağan öñir basşısı Vyaçeslav Şporttı jeñdi. Sensaciyalıq jeñisten keyin Furgaldı aymaqta «halıq gubernatorı» dep ataydı.

Qazir Reseyde 800 mıñğa juıq adamnan virus anıqtalıp, dertke şaldıqqandar sanı kün sanap artıp otır. Soğan qaramastan, eldegi iri şeruler tolqınınıñ basılar türi joq.

"The Qazaq Times"