Körneki kollaj. Foto: Shutterstock & Kursiv

Qazaqstanda örşigen pnevmoniyanıñ soñğı bes jılda jäne biıl, mausım ayındağı qarqını qanday?  Virus jwqtırıp qaytıs bolğandardıñ sanın bölip esepteu kimge kerek? Ministr men komitet jariyalağan mälimet jöninde.

Soñğı bes jıldağı statistika boyınşa pnevmoniya auruı jönindegi mälimet boyınşa redakciya joldağan saualğa Densaulıq saqtau ministrliginiñ Tauarlar men körsetiletin qızmetterdiñ sapası men qauipsizdigin baqılau komiteti jauap berdi.

Pnevmoniya auruına şaldıqqandardıñ sanağı jiti respiratorlıq virustıq infekciyalardıñ (JRVI) tirkelu mausımına säykes jürgiziletinin habarlağan vedomstvonıñ wsınğan deregi mınaday:

  • 2015-2016 epidmausım – 11 687 pnevmoniya jağdayı, onıñ işinde ölimmen ayaqtalğan sanı – 7;
  • 2016-2017 epidmausım – tiisinşe 17 423 jäne 8 jağday;
  • 2017-2018 epidmausım – tiisinşe 21 295 jäne 20 jağday;
  • 2018-2019 epidmausım – tiisinşe 19 582 jäne 10 jağday;
  • 2019-2020 epidmausım – tiisinşe 18 072 jäne 10 jağday.
  • 2019-2020 jılı twmaudan 4 adam qaytıs boldı.

Biıl, yağni 2020 jıl bastalğalı beri pnevmoniya jäne JRVI, sonday aq twmaumen respublika köleminde qanşa adam auırdı degen mäsele töñireginde de biraz mälimetke qol jetkizdik.

Osı jıldıñ alğaşqı bes ayında elde 284 548 adam JRVI-men auırğan desedi. Resmi mälimetke qarağanda, onıñ işinde 176 043 pacient – 14 jasqa deyingi balalar. Sonday-aq komitet:

«Bıltırğı osınday kezeñmen salıstırğanda auru körsetkişi halıq arasında 9,8%-ğa, balalar arasında 14%-ğa tömendegen. 2019 jılğı 5 ayda 315 354 jağday, 14 jasqa deyingi balalar arasında 199770 jağday tirkelgen, 100 mıñ twrğınğa şaqqanda körsetkiş tiisinşe 1725,5 jäne 3856,5 qwradı», – dep mälimdedi.

Sonımen qosa qañtar-mamır aylarında 2323 twmau jağdayı, jartısına juığı balalar (14 jasqa deyingi – QT) tirkelipti. Bıltırğı körsetkişke qarağanda, twmau el işinde 25%-ğa, al balalar arasında 9,9%-ğa artqan (2019 jılı osı aralıqta1854 jağday, 14 jasqa deyingi babalar arasında 918 jağday tirkelgen).

Timur Swltanğaziev basqaratın komitettiñ jauabı osılay. Degenmen Densaulıq saqtau ministri Aleksey Coy bwğan deyin Qazaqstanda biılğı birinşi jartı jılda (qañtar-mausım) 98,5 mıñ adam pnevmoniyağa şaldıqqanın, onıñ 32,7 mıñı ötken mausım ayında anıqtalğanın aytqan. Ministrdiñ sözinşe, bıltır däl osı ayda 8 mıñday nauqas bolğan, demek 4 esege köp.

Bwl derekti tolıqtırğan Memlekettik bas sanitarlıq däriger Ayjan Esmağambetova alğaşqı jartı jılda pnevmoniyadan 1772 adam qaytıs bolğan, al mausımda körsetkiş 628-ge jetken dep edi.

Täuelsiz medicina sarapşıları körsetkiştiñ basqa jıldarmen salıstırğanda kürt ösuin qazirgi tañda örşip twrğan pnevmoniyanıñ köp böligi koronavirustıñ asqınğan türi ekenine senimdi. Qazaqstandıq key därigerler jazdıgüni pnevmoniyanıñ virustıñ tınıs joldarınan tömenge ötip ketken, qabınudıñ saldarı dep bağalaydı.

Bügingi tañda virustıñ tura-janama äserinen köz jwmğandar qatarı qalıñdağan. Jalpı esebi 365 ölim jağdayı tirkelgen:

  • Koronavirustan qaytıs bolğandar – 264 ölim
  • Koronaviruspen qaytıs bolğandar – 101 ölim

Juırda ğana tağayındalğan jaña ministr bügin ötkizgen brifingte ölim sanı köptigine baylanıstı qazanıñ sebebin anıqtau isi qiınğa soğıp jatqanın jetkizdi. Ol «Bwdan özge memlekettik komissiya tağı 110 ölimniñ vrustan ne sozılmalı auru ekenin anıqtap jatır. Komissiya fizikalıq twrğıda aymaqtardan kelip jatqan tolassız derekti öñdep ülgermey jatır», – dedi.

Qazirgi tañda resmi mälimetke sensek, elde virus jwqtırğandar sanı 50 mıñğa juıqtadı. Sondıqtan Qazaqstan älem elderiniñ tiziminde 34-orında twr. 16 mıñ adam auruınan ayığıp şıqqan.

"The Qazaq Times"