Aqorda rezidenciyası. Astana. Foto: Aleksandr Petrov
Qazaqstan prezidenti Qasım-Jomart Toqaev düysenbi küni epidemiyanıñ taraluına qarsı şaralar men şekteuler jönindegi keñes otırısın ötkizdi. 

Prezident baspasöz hatşısı Berik Uäli Facebook jelisindegi paraqşasında Toqaevtıñ  birqatar äkimderdi qızmettegi salğırttığına sınağanın jazdı.

Aqorda hatşısınıñ sözinşe, Qasım-Jomart Toqaev bügin astanada indetke qarsı şaralar turalı keñes ötkizgen.

«Ol koronavirus indetiniñ taraluına qarsı şaralar qabıldau jönindegi keñeste özderine jüktelgen mindetterdi şala orındağan birqatar şeneuniktiñ jwmısın sınğa aldı. Osığan baylanıstı memleket basşısı jwmısına salğırt qarağanı üşin sögis jariyalap, eskertu berdi», – dep habarladı.

Uälidiñ mälimdeuine qarağanda,  virus uşıqqan Şımkent qalasınıñ äkimi M.Äytenovke, Aqtöbe oblısınıñ äkimi O.Orazalinge, Pavlodar oblısınıñ äkimi Ä.Sqaqovqa jäne Vedomstvoaralıq komissiyanıñ törağası E.Toğjanovqa sögis jariyalanğan. Sonımen qosa, astana äkimi A.Kölginovke, Almatı qalasınıñ äkimi B.Sağıntaevqa, Cifrlıq damu, innovaciyalar jäne aeroğarış önerkäsibi ministri A.Jwmağalievke eskertu jasaldı.

Sonday-aq Atırau, Qostanay jäne Batıs Qazaqstan oblıstarınıñ äkimderine öñirdegi ahualdı retteu qajettigi eskertilgen.

Toqaev jiın barısında üyde emdel-emdelme dep ekiwştı söylep, eldiñ esin san saqqa jügirtken şeneunikterdi de sınnıñ tezine alğanday boldı. Aqparattandıru sayasatın uıstan şığarıp alğan äkimder men ministrlerge qiın şaqta bosañsımaudı tapsırdı. Dese de «Halıq ünine qwlaq asatın memleket» twjırımdamasına samarqau qaraytın ükimet pen deputattar ärqanday mäselege tiisti deñgeyde ün qatıspaydı.

«Der kezinde habarlap, tiisti şaralar qabıldauğa köp närse baylanıstı. Bastapqı kezeñde bwl jwmıstar jaqsı wyımdastırıldı. Biraq memlekettik organdar soñğı kezde bwl isti bosañsıtıp jiberdi. Koronavirus boyınşa üş ay bwrın arnayı qwrılğan Respublikalıq kommunikaciyalıq ortalıq qazirgi uaqıtta is jüzinde jwmıs istemeydi. Osığan säykes, büginde birıñğay naqtı aqparat ağını joq. İndetke qarsı küreste jauaptı şeneunikter teris aqparat berip, halıqtı odan äri adastıradı. Eñ jamanı osı. Äkimder men ministrler qarapayım halıqpen baylanıs ornatudı qoydı. Olardıñ arız-şağımdarına der kezinde jauap bermeydi. Sondıqtan twrğındardıñ köpşiligi qayda bararın bilmey, torığuda», – dedi ol.