توقاەۆتىڭ قاھارى: پرەزيدەنت مينيسترلەر مەن اكىمدەردى سىناپ، ەسكەرتۋ بەردى

پرەزيدەنت ءباسپاسوز حاتشىسى بەرىك ءۋالي Facebook جەلىسىندەگى پاراقشاسىندا توقاەۆتىڭ  بىرقاتار اكىمدەردى قىزمەتتەگى سالعىرتتىعىنا سىناعانىن جازدى.

اقوردا حاتشىسىنىڭ سوزىنشە، قاسىم-جومارت توقاەۆ بۇگىن استانادا ىندەتكە قارسى شارالار تۋرالى كەڭەس وتكىزگەن.

«ول كوروناۆيرۋس ىندەتىنىڭ تارالۋىنا قارسى شارالار قابىلداۋ جونىندەگى كەڭەستە وزدەرىنە جۇكتەلگەن مىندەتتەردى شالا ورىنداعان بىرقاتار شەنەۋنىكتىڭ جۇمىسىن سىنعا الدى. وسىعان بايلانىستى مەملەكەت باسشىسى جۇمىسىنا سالعىرت قاراعانى ءۇشىن سوگىس جاريالاپ، ەسكەرتۋ بەردى»، – دەپ حابارلادى.

ءۋاليدىڭ مالىمدەۋىنە قاراعاندا،  ۆيرۋس ۋشىققان شىمكەنت قالاسىنىڭ اكىمى م.ايتەنوۆكە، اقتوبە وبلىسىنىڭ اكىمى و.ورازالينگە، پاۆلودار وبلىسىنىڭ اكىمى ءا.سقاقوۆقا جانە ۆەدومستۆوارالىق كوميسسيانىڭ توراعاسى ە.توعجانوۆقا سوگىس جاريالانعان. سونىمەن قوسا، استانا اكىمى ا.كولگىنوۆكە، الماتى قالاسىنىڭ اكىمى ب.ساعىنتاەۆقا، تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى ا.جۇماعاليەۆكە ەسكەرتۋ جاسالدى.

سونداي-اق اتىراۋ، قوستاناي جانە باتىس قازاقستان وبلىستارىنىڭ اكىمدەرىنە وڭىردەگى احۋالدى رەتتەۋ قاجەتتىگى ەسكەرتىلگەن.

توقاەۆ جيىن بارىسىندا ۇيدە ەمدەل-ەمدەلمە دەپ ەكىۇشتى سويلەپ، ەلدىڭ ەسىن سان ساققا جۇگىرتكەن شەنەۋنىكتەردى دە سىننىڭ تەزىنە العانداي بولدى. اقپاراتتاندىرۋ ساياساتىن ۋىستان شىعارىپ العان اكىمدەر مەن مينيسترلەرگە قيىن شاقتا بوساڭسىماۋدى تاپسىردى. دەسە دە «حالىق ۇنىنە قۇلاق اساتىن مەملەكەت» تۇجىرىمداماسىنا سامارقاۋ قارايتىن ۇكىمەت پەن دەپۋتاتتار ارقانداي ماسەلەگە ءتيىستى دەڭگەيدە ءۇن قاتىسپايدى.

«دەر كەزىندە حابارلاپ، ءتيىستى شارالار قابىلداۋعا كوپ نارسە بايلانىستى. باستاپقى كەزەڭدە بۇل جۇمىستار جاقسى ۇيىمداستىرىلدى. بىراق مەملەكەتتىك ورگاندار سوڭعى كەزدە بۇل ءىستى بوساڭسىتىپ جىبەردى. كوروناۆيرۋس بويىنشا ءۇش اي بۇرىن ارنايى قۇرىلعان رەسپۋبليكالىق كوممۋنيكاتسيالىق ورتالىق قازىرگى ۋاقىتتا ءىس جۇزىندە جۇمىس ىستەمەيدى. وسىعان سايكەس، بۇگىندە بىرىڭعاي ناقتى اقپارات اعىنى جوق. ىندەتكە قارسى كۇرەستە جاۋاپتى شەنەۋنىكتەر تەرىس اقپارات بەرىپ، حالىقتى ودان ءارى اداستىرادى. ەڭ جامانى وسى. اكىمدەر مەن مينيسترلەر قاراپايىم حالىقپەن بايلانىس ورناتۋدى قويدى. ولاردىڭ ارىز-شاعىمدارىنا دەر كەزىندە جاۋاپ بەرمەيدى. سوندىقتان تۇرعىنداردىڭ كوپشىلىگى قايدا بارارىن بىلمەي، تورىعۋدا»، – دەدى ول.