Mausımnıñ basınan beri Almatı qalasındağı stacionarlarğa KVI jwqtırğan 2132 nauqas tüsken. Bwl turalı Almatı qalasındağı qoğamdıq densaulıq saqtau basqarmasınıñ basşısı Kamaljan Nadırov habarladı.

«Ötken aptada ğana gospitalizaciyalau  men jedel järdem qızmetine jüginu eki esege wlğayğan. Biz infekciyanı 20-29 jas aralığındağı jastar jii jwqtıratındığın bayqadıq. Olardıñ ülesine sırqattanuşılardıñ 35% tiesili, 60 jastan asqan azamattardıñ sanı olardan tört ese az. Olar infekciya jwqtırğandardıñ tek 9% qwraydı», – dep mälimdedi ol OKQ brinfinginde.

Qazir elde jağdayı auır jäne asa auır pacientter sanı artqan. Bwl olardıñ qant diabeti, jürek auruları jäne gipertenziya sekildi janama sırqattarınıñ boluına baylanıstı. Mwnday qaterlerge köbinese jası wlğayğan azamattar tap boladı. Jağdayı auır jäne asa auır pacientterdiñ 80% 60 jastan asqan adamdar.

K.Nadırovtıñ aytuı boyınşa qaladağı stacionarlardıñ jüktemesi artıp baradı. Kün sayın 100-den asa nauqas gospitalizaciyalanadı. Qazirdiñ özinde stacionarlardıñ 85%-ı bos emes. Bilik ökilderi qaladağı bos ğimarattarğa inspekciya jürgizip, qosımşa stacionar aşu mümkindigin qarastırıp jatır dep aytıldı brifingte.

Eske sala keteyik, Qazaqstanda tötenşe jağday rejimi alınğannan keyin Covid-19 virusın jwqtırğandar sanı kürt köbeydi. İri megapolisterde karantin şaraları jwmsartılğanına 1 ayğa juıq uaqıt boldı. Äzirge jağdaydıñ oñala qoyar türi bayqalmaydı. Säuirde koronavirus öziniñ şırqau şegine jetedi degen densaulıq saqtau ministriniñ özi juırda infekciya jwqtırıp, em qabıldauğa mäjbür bolğan.

Qazir qoğam virustıñ bar ekendigine  senetinder men senbeytinder bolıp ekige jarılıp otır. Bilik ökilderi qolda bar qwraldarımen halıqtı sendirip bağuda.

"The Qazaq Times"