Foto: https://polisia.kz

Almatıda blok-bekettegi patrul' köligin mas küyinde soqqan jürgizuşiniñ bwğan deyin policey bolğanı habarlandı. Qayğılı jağday saldarınan eki policey qaza tauıp, bir tärtip saqşısı jansaqtau bölimine jatqızılğan.

Almatı policiya departamentiniñ bastığı Qanat Taymerdenovtıñ sözine qarağanda, avtokölik iesi bwrın 6 jılğa juıq qwqıq qorğau organdarında qızmet etken, alayda ol öz mindetine nemqwraylıq tanıtqanı üşin jwmıstan bosatılğan.

«Ol policiyada altı jıl qızmet etti, qızmettik mindetterin tiisinşe orındamağanı üşin tört tärtiptik jaza aldı. Bwl onıñ işki ister organdarınan ketuine sebep boldı. Biraq ol odan keyin de özi üşin dwrıs qorıtındı jasay almadı. Zañdı bwzıp, rölge mas küyinde otırıp, qılmıs jasadı», – deydi Taymerdenov.

Keşe, 25 mamır küni tañğı sağat 05.30 şamasında oblıstan qalağa kireberiste, Qarasay audanı, Köksay auılındağı №4 blok-bekette, jantürşigerlik jol apatı boldı. BMW markalı kölikti tizgindegen 28 jastağı er adam qattı jıldamdıqpen baqılau-ötkizu punktiniñ beton qorşauına soğıluınıñ kesirinen serpinmen wşıp, joldıñ arğı betindegi patrul' köligine küşpen wrılğan. Saldarınan qızmettik kölik işinde mañaydı baqılap otırğan 42 jastağı ağa leytenant Jaras Janğaziev oqiğa ornında qaza taptı. Al onıñ janındağı policiya serjantı Dastan Äbdikanov esin jimastan auruhanada qaytıs boldı.

Blok-bekette zardap şekken üşinşi policiya qızmetkeri Erbwlan Seydazım qazir jansaqtau böliminde jatır. Ol planşetpen ötip jatqan kölikterdi tekserip twrğan. Eks-policey qazir qamauda, sotqa deyingi tergeu jürip jatır. Küdiktiniñ kinäsi däleldense, 15 jıldan köp merzimge bas bostandığınan ayırılıp, ömir boyı kölik jürgizuine tıyım salınuı mümkin.

Oqiğa ornında köz jwmğan Dastan Äbdikanovtiñ jarı äleumettik jelide «küdiktiniñ policiya qızmetkeri ekenin» rastağan jazbasına deyin qwzırlı organdar men policiya departamentiniñ resmi ökili mwnı joqqa şığarğan edi. Policeydiñ qolınan özge policeyler ajal qwşqannan keyin prezident Qasım-Jomart Toqaev eki saqşığa (marqwmdarğa) İİ jäne İİİ därejeli «Aybın» ordenin beruge jarlıq şığardı.

Atalğan oqıs apat turalı qoğam qızu talqılap, Qazaqstan policiyası özin «meyilinşe jabıq wstauın» jäne «aşıqtıqtan boy tartatının» sınap jatır. Belsendiler äleumettik jelilerde jergilikti policiya basşılığı mas küyinde kölik jürgizgen küdiktiniñ policey bolğanın jasıruğa tırıstı dep sanaydı.

Blok-beketti zañsız bwzıp ötuge oqiğası birinşi ret bolıp twrğan joq. Naurızda TJ rejimi engizilgeli beri Almatı qalası men Türkistan oblısında da tekseris aymağın kölikpen kesip ötuge tırısqandar anıqtalğan.

;feature=emb_title

"The Qazaq Times"