فوتو: https://polisia.kz

الماتىدا بلوك-بەكەتتەگى پاترۋل كولىگىن ماس كۇيىندە سوققان جۇرگىزۋشىنىڭ بۇعان دەيىن پوليتسەي بولعانى حابارلاندى. قايعىلى جاعداي سالدارىنان ەكى پوليتسەي قازا تاۋىپ، ءبىر ءتارتىپ ساقشىسى جانساقتاۋ بولىمىنە جاتقىزىلعان.

الماتى پوليتسيا دەپارتامەنتىنىڭ باستىعى قانات تايمەردەنوۆتىڭ سوزىنە قاراعاندا، اۆتوكولىك يەسى بۇرىن 6 جىلعا جۋىق قۇقىق قورعاۋ ورگاندارىندا قىزمەت ەتكەن، الايدا ول ءوز مىندەتىنە نەمقۇرايلىق تانىتقانى ءۇشىن جۇمىستان بوساتىلعان.

«ول پوليتسيادا التى جىل قىزمەت ەتتى، قىزمەتتىك مىندەتتەرىن تيىسىنشە ورىنداماعانى ءۇشىن ءتورت تارتىپتىك جازا الدى. بۇل ونىڭ ىشكى ىستەر ورگاندارىنان كەتۋىنە سەبەپ بولدى. بىراق ول ودان كەيىن دە ءوزى ءۇشىن دۇرىس قورىتىندى جاساي المادى. زاڭدى بۇزىپ، رولگە ماس كۇيىندە وتىرىپ، قىلمىس جاسادى»، – دەيدى تايمەردەنوۆ.

كەشە، 25 مامىر كۇنى تاڭعى ساعات 05.30 شاماسىندا وبلىستان قالاعا كىرەبەرىستە، قاراساي اۋدانى، كوكساي اۋىلىنداعى №4 بلوك-بەكەتتە، جانتۇرشىگەرلىك جول اپاتى بولدى. BMW ماركالى كولىكتى تىزگىندەگەن 28 جاستاعى ەر ادام قاتتى جىلدامدىقپەن باقىلاۋ-وتكىزۋ پۋنكتىنىڭ بەتون قورشاۋىنا سوعىلۋىنىڭ كەسىرىنەن سەرپىنمەن ۇشىپ، جولدىڭ ارعى بەتىندەگى پاترۋل كولىگىنە كۇشپەن ۇرىلعان. سالدارىنان قىزمەتتىك كولىك ىشىندە ماڭايدى باقىلاپ وتىرعان 42 جاستاعى اعا لەيتەنانت جاراس جانعازيەۆ وقيعا ورنىندا قازا تاپتى. ال ونىڭ جانىنداعى پوليتسيا سەرجانتى داستان ابدىكانوۆ ەسىن جيماستان اۋرۋحانادا قايتىس بولدى.

بلوك-بەكەتتە زارداپ شەككەن ءۇشىنشى پوليتسيا قىزمەتكەرى ەربۇلان سەيدازىم قازىر جانساقتاۋ بولىمىندە جاتىر. ول پلانشەتپەن ءوتىپ جاتقان كولىكتەردى تەكسەرىپ تۇرعان. ەكس-پوليتسەي قازىر قاماۋدا، سوتقا دەيىنگى تەرگەۋ ءجۇرىپ جاتىر. كۇدىكتىنىڭ كىناسى دالەلدەنسە، 15 جىلدان كوپ مەرزىمگە باس بوستاندىعىنان ايىرىلىپ، ءومىر بويى كولىك جۇرگىزۋىنە تىيىم سالىنۋى مۇمكىن.

وقيعا ورنىندا كوز جۇمعان داستان ابدىكانوۆتىڭ جارى الەۋمەتتىك جەلىدە «كۇدىكتىنىڭ پوليتسيا قىزمەتكەرى ەكەنىن» راستاعان جازباسىنا دەيىن قۇزىرلى ورگاندار مەن پوليتسيا دەپارتامەنتىنىڭ رەسمي وكىلى مۇنى جوققا شىعارعان ەدى. پوليتسەيدىڭ قولىنان وزگە پوليتسەيلەر اجال قۇشقاننان كەيىن پرەزيدەنت قاسىم-جومارت توقاەۆ ەكى ساقشىعا (مارقۇمدارعا) ءىى جانە ءىىى دارەجەلى «ايبىن» وردەنىن بەرۋگە جارلىق شىعاردى.

اتالعان وقىس اپات تۋرالى قوعام قىزۋ تالقىلاپ، قازاقستان پوليتسياسى ءوزىن «مەيىلىنشە جابىق ۇستاۋىن» جانە «اشىقتىقتان بوي تارتاتىنىن» سىناپ جاتىر. بەلسەندىلەر الەۋمەتتىك جەلىلەردە جەرگىلىكتى پوليتسيا باسشىلىعى ماس كۇيىندە كولىك جۇرگىزگەن كۇدىكتىنىڭ پوليتسەي بولعانىن جاسىرۋعا تىرىستى دەپ سانايدى.

بلوك-بەكەتتى زاڭسىز بۇزىپ وتۋگە وقيعاسى ءبىرىنشى رەت بولىپ تۇرعان جوق. ناۋرىزدا تج رەجيمى ەنگىزىلگەلى بەرى الماتى قالاسى مەن تۇركىستان وبلىسىندا دا تەكسەرىس ايماعىن كولىكپەن كەسىپ وتۋگە تىرىسقاندار انىقتالعان.

;feature=emb_title

"The Qazaq Times"