Aqorda, Parlament jäne Ükimet üyindegi birqatar "eski şeneunikter" arasında auıs-tüyis boldı. Foto: aşıq derekköz

Apta bası düysenbi küni Qazaqstannıñ zañ şığaruşı jäne atqaruşı bilik tarmaqtarında birqatar auıs-tüyis jasaldı. 

Auqımdı kadrlıq tağayındaudıñ bası ötken senbide prezident Toqaevtıñ keşegi künge deyin senat pikeri äri deputatı bolıp kelgen Dariğa  Nazarbaevanı otstavkağa jibergen jarlığınan bastaldı. Demalıs künderi jariyalanğan jañalıqtı el ärtürli sebeppen baylanıstırdı.

Biliktiñ üş tarmağındağı "şeneunikter korpusı" şoğırlanğan şıraylı aumaq. Foto: Aqorda

Bügin tañ atqalı Aqorda saytına üñilgen halıqtıñ qatarı qalıñ. Äueli memleket basşısınıñ jarlığımen Prezident äkimşiliginiñ birinşi orınbasarı, Nwr Otan partiyasınıñ eñ belsendi müşesi Mäulen Sağathanwlı Äşimbaev qızmetinen bosap, artınşa parlament senatınıñ deputatı, yağni eks-spiker Dariğa Nwrswlanqızınıñ ornına tağayındaldı.

Qazaqstan parlamenti senatınıñ törağa deputatı Mäulen Äşimbaev jaña qızmetine tağayındalar twsta. Astana. 4 mamır 2020 jıl. Foto: Aqorda

Prezident Qasım-Jomart Toqaev bügin Parlament senatınıñ otırısına qatısıp, Mäulen Äşimbaev jöninde jağımdı komplimentin ayttı. Sonımen qosa ol Nazarbaevağa öz rizaşılığın bildire kele ile-şala senat törağası lauazımına Äşimbaevtıñ kandidaturasın wsındı.

– Ol memleket isiniñ qır-sırın jetik meñgergen, wzaq jıl türli salada jemisti jäne tiimdi qızmet atqardı. Parlament jwmısın jaqsı biledi. Ärdayım özine jüktelgen mindetterdi abıroymen atqarıp keledi. Memlekettik qızmettegi täjiribesi mol. Sondıqtan bwl qızmetti abıroymen atqaratınına kümänim joq, – dedi Toqaev.

Prezident wsınısın eşqaşan keri qaytarmaytın joğarı palata ädettegidey jasırın dauıs beru arqılı «birauızdan» PÄ ökilin bas spiker etip sayladı.

Toqaev senat otırısında Nazarbaevağa alğıs bilirip, Äşimbaevtı wsındı. Wsınıs iske astı. Astana. 4 mamır 2020 jıl. Foto: Aqorda

Osıdan köp ötpey Äşimbaevtıñ osı uaqıtqa deyingi ornına közi aşıq eldiñ aldında bası biraz dauğa qalğan aqparat ministri Däuren Abaev barğanı habarlandı.  Toqaevtıñ kezekti jarlığı boyınşa Däuren Äskerbekwlı Abaev basqa jwmısqa auısuına baylanıstı  Aqparat jäne qoğamdıq damu ministri qızmetinen bosatılıp, birden №320 jarlıqpen Prezident äkimşiligi basşısı Erlan Qoşanovtıñ birinşi orınbasarı bolıp jarılqandı.

Al Abaevtıñ tört jıl otırğan ıstıq ornına... Prezident Toqaevtıñ kömekşisi äri Prezident äkimşiliginiñ Ötinişterdi qaraudı baqılau böliminiñ meñgeruşisi qızmetinde bolğanına äli bir öte qoymağan Ayida Balaeva ornınan bosatıldı da, Aqparat jäne qoğamdıq damu ministri lauazımına tağayındaldı.

Äzirge bos twrğan vakansiya Balaevanıñ ornı. Al wzaq jıldar boyı parlament qabırğasında bolğan Dariğa Nazarbaevanıñ qandayda bir qızmetke kelgeni turalı habar belgisiz.

Osılayşa Aqorda tarapınan jürgizilgen Ükimet pen Parlament arasındağı kadrlıq jüristerden "jaña beyne" körinbedi, bäri "jüzi tanıs" şeneunikter. Bwl özgeristerdiñ pandemiya ötindegi TJ-karantin rejimi jäne eldiñ oñtüstiginde su tasqını küşeygen kezde jüzege asuın sarapşılar men äleumettik jeli qoldanuşıları ärtürli joruda. Keybiri mwnı "klanaralıq talas" dese, bir böligi "qosılğıştardıñ ornı auısqanımen, - qosındınıñ mäni özgermeytinin körsetetin eski ädis" deydi.

"The Qazaq Times"