اقوردا، پارلامەنت جانە ۇكىمەت ۇيىندەگى بىرقاتار "ەسكى شەنەۋنىكتەر" اراسىندا اۋىس-ءتۇيىس بولدى. فوتو: اشىق دەرەككوز

اپتا باسى دۇيسەنبى كۇنى قازاقستاننىڭ زاڭ شىعارۋشى جانە اتقارۋشى بيلىك تارماقتارىندا بىرقاتار اۋىس-ءتۇيىس جاسالدى. 

اۋقىمدى كادرلىق تاعايىنداۋدىڭ باسى وتكەن سەنبىدە پرەزيدەنت توقاەۆتىڭ كەشەگى كۇنگە دەيىن سەنات پيكەرى ءارى دەپۋتاتى بولىپ كەلگەن داريعا  نازارباەۆانى وتستاۆكاعا جىبەرگەن جارلىعىنان باستالدى. دەمالىس كۇندەرى جاريالانعان جاڭالىقتى ەل ءارتۇرلى سەبەپپەن بايلانىستىردى.

بيلىكتىڭ ءۇش تارماعىنداعى "شەنەۋنىكتەر كورپۋسى" شوعىرلانعان شىرايلى اۋماق. فوتو: اقوردا

بۇگىن تاڭ اتقالى اقوردا سايتىنا ۇڭىلگەن حالىقتىڭ قاتارى قالىڭ. اۋەلى مەملەكەت باسشىسىنىڭ جارلىعىمەن پرەزيدەنت اكىمشىلىگىنىڭ ءبىرىنشى ورىنباسارى، نۇر وتان پارتياسىنىڭ ەڭ بەلسەندى مۇشەسى ماۋلەن ساعاتحانۇلى اشىمباەۆ قىزمەتىنەن بوساپ, ارتىنشا پارلامەنت سەناتىنىڭ دەپۋتاتى، ياعني ەكس-سپيكەر داريعا نۇرسۇلانقىزىنىڭ ورنىنا تاعايىندالدى.

قازاقستان پارلامەنتى سەناتىنىڭ توراعا دەپۋتاتى ماۋلەن اشىمباەۆ جاڭا قىزمەتىنە تاعايىندالار تۇستا. استانا. 4 مامىر 2020 جىل. فوتو: اقوردا

پرەزيدەنت قاسىم-جومارت توقاەۆ بۇگىن پارلامەنت سەناتىنىڭ وتىرىسىنا قاتىسىپ, ماۋلەن اشىمباەۆ جونىندە جاعىمدى كومپليمەنتىن ايتتى. سونىمەن قوسا ول نازارباەۆاعا ءوز ريزاشىلىعىن بىلدىرە كەلە ىلە-شالا سەنات توراعاسى لاۋازىمىنا اشىمباەۆتىڭ كانديداتۋراسىن ۇسىندى.

– ول مەملەكەت ءىسىنىڭ قىر-سىرىن جەتىك مەڭگەرگەن، ۇزاق جىل ءتۇرلى سالادا جەمىستى جانە ءتيىمدى قىزمەت اتقاردى. پارلامەنت جۇمىسىن جاقسى بىلەدى. ءاردايىم وزىنە جۇكتەلگەن مىندەتتەردى ابىرويمەن اتقارىپ كەلەدى. مەملەكەتتىك قىزمەتتەگى تاجىريبەسى مول. سوندىقتان بۇل قىزمەتتى ابىرويمەن اتقاراتىنىنا كۇمانىم جوق، – دەدى توقاەۆ.

پرەزيدەنت ۇسىنىسىن ەشقاشان كەرى قايتارمايتىن جوعارى پالاتا ادەتتەگىدەي جاسىرىن داۋىس بەرۋ ارقىلى «ءبىراۋىزدان» ءپا وكىلىن باس سپيكەر ەتىپ سايلادى.

توقاەۆ سەنات وتىرىسىندا نازارباەۆاعا العىس ءبىلىرىپ، اشىمباەۆتى ۇسىندى. ۇسىنىس ىسكە استى. استانا. 4 مامىر 2020 جىل. فوتو: اقوردا

وسىدان كوپ وتپەي اشىمباەۆتىڭ وسى ۋاقىتقا دەيىنگى ورنىنا كوزى اشىق ەلدىڭ الدىندا باسى ءبىراز داۋعا قالعان اقپارات ءمينيسترى داۋرەن اباەۆ بارعانى حابارلاندى.  توقاەۆتىڭ كەزەكتى جارلىعى بويىنشا داۋرەن اسكەربەكۇلى اباەۆ باسقا جۇمىسقا اۋىسۋىنا بايلانىستى  اقپارات جانە قوعامدىق دامۋ ءمينيسترى قىزمەتىنەن بوساتىلىپ, بىردەن №320 جارلىقپەن پرەزيدەنت اكىمشىلىگى باسشىسى ەرلان قوشانوۆتىڭ ءبىرىنشى ورىنباسارى بولىپ جارىلقاندى.

ال اباەۆتىڭ ءتورت جىل وتىرعان ىستىق ورنىنا... پرەزيدەنت توقاەۆتىڭ كومەكشىسى ءارى پرەزيدەنت اكىمشىلىگىنىڭ وتىنىشتەردى قاراۋدى باقىلاۋ ءبولىمىنىڭ مەڭگەرۋشىسى قىزمەتىندە بولعانىنا ءالى ءبىر وتە قويماعان ايدا بالاەۆا ورنىنان بوساتىلدى دا، اقپارات جانە قوعامدىق دامۋ ءمينيسترى لاۋازىمىنا تاعايىندالدى.

ازىرگە بوس تۇرعان ۆاكانسيا بالاەۆانىڭ ورنى. ال ۇزاق جىلدار بويى پارلامەنت قابىرعاسىندا بولعان داريعا نازارباەۆانىڭ قاندايدا ءبىر قىزمەتكە كەلگەنى تۋرالى حابار بەلگىسىز.

وسىلايشا اقوردا تاراپىنان جۇرگىزىلگەن ۇكىمەت پەن پارلامەنت اراسىنداعى كادرلىق جۇرىستەردەن "جاڭا بەينە" كورىنبەدى، ءبارى ء"جۇزى تانىس" شەنەۋنىكتەر. بۇل وزگەرىستەردىڭ پاندەميا وتىندەگى تج-كارانتين رەجيمى جانە ەلدىڭ وڭتۇستىگىندە سۋ تاسقىنى كۇشەيگەن كەزدە جۇزەگە اسۋىن ساراپشىلار مەن الەۋمەتتىك جەلى قولدانۋشىلارى ءارتۇرلى جورۋدا. كەيبىرى مۇنى "كلانارالىق تالاس" دەسە، ءبىر بولىگى "قوسىلعىشتاردىڭ ورنى اۋىسقانىمەن، - قوسىندىنىڭ ءمانى وزگەرمەيتىنىن كورسەتەتىن ەسكى ءادىس" دەيدى.

"The Qazaq Times"