Jambıl oblısı Qorday audandıq sotı aqpanda osı audanda bolğan wltaralıq janjalğa sebep boldı delingen joldağı kikiljiñge qatıstı sot ükimin oqıdı. Sot ayıptaluşı Qorday audanı Sortöbe auılınıñ twrğını 27 jastağı Marat YUnhudı "Bwzaqılıq" jäne "Densaulıqqa qasaqana ziyan keltiru" babı boyınşa kinäli dep tauıp, 2 jıl jäne 6 ayğa bas bostandığınan ayırdı. Sot sonımen birge "Bwzaqılıq" babı boyınşa ayıptalğan Sortöbe twrğını Ersman YUnhudıñ (birinşi ayıptaluşınıñ äkesi) bostandığın 2 jıl 6 ayğa şektedi, - Bwl turalı Ortalıq Aziya jañalıqtar qızmeti jariyaladı.

Basılım sot ükiminiñ 24 säuirde şıqqanmen aqparat qwraldarına bir aptadan keyin ğana belgili bolğanın jazdı.

Bwl iste Qorday audanı Qarakemer auılınıñ 78 jastağı twrğını Tölegen Qwdaşbaev eki balasımen birge jäbirlenuşi retinde tanılğan. Sot ükimi boyınşa, ayıptaluşılar moral'dıq şığın retinde jäbirlenuşilerge 3 mln teñge töleui tiis jäne sot şığının tolığımen moynına aladı.

Aqparat boyınşa, kikiljiñ 5 aqpanda Sortöbe auılında bolğan. Tergeu organdarına silteme jasağan zakon.kz saytınıñ jazuınşa, Marat YUnhu jolğa şığıp, auladan ağası mingen jük köligi şığa aluı üşin kölikterdi toqtatqan. Däl osı kezde Tölegen Qwdaşbaevtı balaları kölikpen därigerge apara jatqan. Eki jaq arasında töbeles bolıp, qariyanıñ jambası sınğan, onıñ wlınıñ bas süyegi men miına zaqım kelgen.

Bwğan deyin işki ister ministrligi Qordaydağı janjalğa osı kikiljiñ sebep boldı dep aytqan.

7 aqpan keşke Jambıl oblısı Qorday audanında qazaqtar men düngender janjaldasıp, resmi derek boyınşa, 11 adam qaza tauıp, 180-nen asa adam zardap şekken. Qordaydağı janjal kezinde Qırğızstanmen şekarağa jaqın ornalasqan, negizinen etnikalıq düngender twratın Masançi, Sortöbe, Auqattı auıldarı köp zardap şekken.

Qazaqstan ükimeti janjalğa baylanıstı 120-dan astam qılmıstıq is qozğalğanın mälimdedi. ("Adam öltiru" babı boyınşa 11 is). Qordaydağı janjaldan soñ Jambıl oblısınıñ äkimi Asqar Mırzahmetov bastağan birneşe şeneunik jäne policiya departamentiniñ basşısı qızmetten ketti. Onıñ ornına sol kezde prem'er-ministrdiñ orınbasarı bolğan Berdibek Saparbaev tağayındaldı.​

29 säuirde Almatıdağı tergeu izolyatorında Jambıl oblısı Qorday audanında bolğan wltaralıq janjalğa baylanıstı wstalğan Bekbol Kibaevtıñ qaytıs bolğanı belgili boldı. Prokuratura osı oqiğa boyınşa sotqa deyingi tergeu bastalğanın habarladı. Oqiğanıñ basqa jayttarı belgisiz.​

"The Qazaq Times"