جامبىل وبلىسى قورداي اۋداندىق سوتى اقپاندا وسى اۋداندا بولعان ۇلتارالىق جانجالعا سەبەپ بولدى دەلىنگەن جولداعى كيكىلجىڭگە قاتىستى سوت ۇكىمىن وقىدى. سوت ايىپتالۋشى قورداي اۋدانى سورتوبە اۋىلىنىڭ تۇرعىنى 27 جاستاعى مارات يۋنحۋدى "بۇزاقىلىق" جانە "دەنساۋلىققا قاساقانا زيان كەلتىرۋ" بابى بويىنشا كىنالى دەپ تاۋىپ، 2 جىل جانە 6 ايعا باس بوستاندىعىنان ايىردى. سوت سونىمەن بىرگە "بۇزاقىلىق" بابى بويىنشا ايىپتالعان سورتوبە تۇرعىنى ەرسمان يۋنحۋدىڭ ء(بىرىنشى ايىپتالۋشىنىڭ اكەسى) بوستاندىعىن 2 جىل 6 ايعا شەكتەدى، - بۇل تۋرالى ورتالىق ازيا جاڭالىقتار قىزمەتى جاريالادى.

باسىلىم سوت ۇكىمىنىڭ 24 ساۋىردە شىققانمەن اقپارات قۇرالدارىنا ءبىر اپتادان كەيىن عانا بەلگىلى بولعانىن جازدى.

بۇل ىستە قورداي اۋدانى قاراكەمەر اۋىلىنىڭ 78 جاستاعى تۇرعىنى تولەگەن قۇداشباەۆ ەكى بالاسىمەن بىرگە جابىرلەنۋشى رەتىندە تانىلعان. سوت ۇكىمى بويىنشا، ايىپتالۋشىلار مورالدىق شىعىن رەتىندە جابىرلەنۋشىلەرگە 3 ملن تەڭگە تولەۋى ءتيىس جانە سوت شىعىنىن تولىعىمەن موينىنا الادى.

اقپارات بويىنشا، كيكىلجىڭ 5 اقپاندا سورتوبە اۋىلىندا بولعان. تەرگەۋ ورگاندارىنا سىلتەمە جاساعان zakon.kz سايتىنىڭ جازۋىنشا، مارات يۋنحۋ جولعا شىعىپ، اۋلادان اعاسى مىنگەن جۇك كولىگى شىعا الۋى ءۇشىن كولىكتەردى توقتاتقان. ءدال وسى كەزدە تولەگەن قۇداشباەۆتى بالالارى كولىكپەن دارىگەرگە اپارا جاتقان. ەكى جاق اراسىندا توبەلەس بولىپ، قاريانىڭ جامباسى سىنعان، ونىڭ ۇلىنىڭ باس سۇيەگى مەن ميىنا زاقىم كەلگەن.

بۇعان دەيىن ىشكى ىستەر مينيسترلىگى قوردايداعى جانجالعا وسى كيكىلجىڭ سەبەپ بولدى دەپ ايتقان.

7 اقپان كەشكە جامبىل وبلىسى قورداي اۋدانىندا قازاقتار مەن دۇنگەندەر جانجالداسىپ، رەسمي دەرەك بويىنشا، 11 ادام قازا تاۋىپ، 180-نەن اسا ادام زارداپ شەككەن. قوردايداعى جانجال كەزىندە قىرعىزستانمەن شەكاراعا جاقىن ورنالاسقان، نەگىزىنەن ەتنيكالىق دۇنگەندەر تۇراتىن ماسانچي، سورتوبە، اۋقاتتى اۋىلدارى كوپ زارداپ شەككەن.

قازاقستان ۇكىمەتى جانجالعا بايلانىستى 120-دان استام قىلمىستىق ءىس قوزعالعانىن مالىمدەدى. ("ادام ءولتىرۋ" بابى بويىنشا 11 ءىس). قوردايداعى جانجالدان سوڭ جامبىل وبلىسىنىڭ اكىمى اسقار مىرزاحمەتوۆ باستاعان بىرنەشە شەنەۋنىك جانە پوليتسيا دەپارتامەنتىنىڭ باسشىسى قىزمەتتەن كەتتى. ونىڭ ورنىنا سول كەزدە پرەمەر-ءمينيستردىڭ ورىنباسارى بولعان بەردىبەك ساپارباەۆ تاعايىندالدى.​

29 ساۋىردە الماتىداعى تەرگەۋ يزولياتورىندا جامبىل وبلىسى قورداي اۋدانىندا بولعان ۇلتارالىق جانجالعا بايلانىستى ۇستالعان بەكبول كيباەۆتىڭ قايتىس بولعانى بەلگىلى بولدى. پروكۋراتۋرا وسى وقيعا بويىنشا سوتقا دەيىنگى تەرگەۋ باستالعانىن حابارلادى. وقيعانىڭ باسقا جايتتارى بەلگىسىز.​

"The Qazaq Times"