Bügin sağat 11:00-de prezident Toqaevtıñ törağalığımen ötken komissiya otırısında astanadağı jäne eldegi TJ merzimine qatıstı şeşim qabıldandı.

Mäjilis deputatı Vladimir Bojkonıñ sözinşe, memkomissiya TJ merzimin säuir ayınıñ soñına deyin sozğan. Prezidenttiñ baspasöz hatşısı Berik Uäli facebook jelisindegi resmi parağında karantin merzimin özgertu jönindegi Toqaevtıñ uäjin bölisti:

«15 säuirde tötenşe jağday rejimi turalı Jarlığımnıñ merzimi ayaqtaladı. Tötenşe jağday rejimin, kem degende, säuirdiñ ayağına deyin sozuğa tura keletini qazirdiñ özinde tüsinikti bolıp otır. Biz koronaviruspen auırudıñ şarıqtau şegin äli ötkizgen joqpız. İndetke qatıstı jağdaydı jeñildetuge bolmaydı. Osı sebepke baylanıstı karantin rejimin elordada, Almatı men Şımkentte jäne tiisti oblıstarda säuirdiñ ayağına deyin sozudı tapsıramın. Mwnıñ oñtaylı şeşim emes ekenin tüsinemin. Öytkeni halıq köşege şığıp, qalıptı twrmısın jalğastırğısı keledi. Biraq karantin rejimin saqtaudan, oqşaulanudan basqa jol joq. Bwl otandıq jäne halıqaralıq virusolog mamandardıñ wsınısı», – dedi prezident. 

13 naurız alğaşqı nauqastar tirkelgennen keyin eki kün ötken soñ, prezident Toqaev 16 naurızdan bastap 15 säuirdegi 7:00-ge deyin eldiñ barlıq aumağında tötenşe jağday jariyalauğa №285 qaulısın şığarıp edi.

TJ rejimi merziminiñ ayaqtaluına 5 kün qalğanına qaramastan, keybir öñirlerde karantin endi engizildi. 17 naurız – Almatıda, 19 naurız – astanada, 30 naurız – Atırau jäne Aqtauda, 31 naurız – Aqmola oblısında, 1 säuir – Qızılorda oblısında, 2 säuir – Öskemen jäne Semey qalalarında, 4 säuir –  Şımkentte, 6 säuir – Aqtöbe oblısında, 7 säuir – Qarağandı oblısında, al keşegi künnen, 9 säuirden bastap Jambıl oblısında karantin jariyalandı.

Älemniñ «esin şığarıp, köz toqtatıp oylanuğa mäjbürlegen» indetten Qazaqstanda 9 adam qaytıs bolsa, ay ötpey jatıp 800-den astam adam jwqtırıp ülgerdi.  Tirkelgen keyster sanı boyınşa älemde äzirge 73-orınğa twraqtadı.

Italiya ükimetiniñ basşısı Djuzeppe Konte elde koronavirustıñ taraluın şekteu maqsatında karantindi 3 mamırğa deyin  wzartuğa şeşim qabıldağanın mälimdedi. Köptegen elder TJ rejimin wzartıp jatsa, Japoniya endi qolğa aldı. Keşe, 9 säuir japon prem'er-ministri Sindzo Abe elde 6 mamırğa deyin tötenşe jağday engizdi. Bwl jağdaydıñ äli de twraqtamağanın añğartsa kerek-ti. Qıtay sarapşıları  indettiñ «ekinşi tolqınınan» qauiptenip otır.

“The Qazaq Times”