قازاقستاندا تج مەرزىمى اي سوڭىنا دەيىن ۇزارتىلدى

بۇگىن ساعات 11:00-دە پرەزيدەنت توقاەۆتىڭ توراعالىعىمەن وتكەن كوميسسيا وتىرىسىندا استاناداعى جانە ەلدەگى تج مەرزىمىنە قاتىستى شەشىم قابىلداندى.

ءماجىلىس دەپۋتاتى ۆلاديمير بوجكونىڭ سوزىنشە, مەمكوميسسيا تج مەرزىمىن ءساۋىر ايىنىڭ سوڭىنا دەيىن سوزعان. پرەزيدەنتتىڭ ءباسپاسوز حاتشىسى بەرىك ءۋالي facebook جەلىسىندەگى رەسمي پاراعىندا كارانتين مەرزىمىن وزگەرتۋ جونىندەگى توقاەۆتىڭ ءۋاجىن ءبولىستى:

«15 ساۋىردە توتەنشە جاعداي رەجيمى تۋرالى جارلىعىمنىڭ مەرزىمى اياقتالادى. توتەنشە جاعداي رەجيمىن، كەم دەگەندە، ءساۋىردىڭ اياعىنا دەيىن سوزۋعا تۋرا كەلەتىنى قازىردىڭ وزىندە تۇسىنىكتى بولىپ وتىر. ءبىز كوروناۆيرۋسپەن اۋىرۋدىڭ شارىقتاۋ شەگىن ءالى وتكىزگەن جوقپىز. ىندەتكە قاتىستى جاعدايدى جەڭىلدەتۋگە بولمايدى. وسى سەبەپكە بايلانىستى كارانتين رەجيمىن ەلوردادا، الماتى مەن شىمكەنتتە جانە ءتيىستى وبلىستاردا ءساۋىردىڭ اياعىنا دەيىن سوزۋدى تاپسىرامىن. مۇنىڭ وڭتايلى شەشىم ەمەس ەكەنىن تۇسىنەمىن. ويتكەنى حالىق كوشەگە شىعىپ، قالىپتى تۇرمىسىن جالعاستىرعىسى كەلەدى. بىراق كارانتين رەجيمىن ساقتاۋدان، وقشاۋلانۋدان باسقا جول جوق. بۇل وتاندىق جانە حالىقارالىق ۆيرۋسولوگ مامانداردىڭ ۇسىنىسى»، – دەدى پرەزيدەنت. 

13 ناۋرىز العاشقى ناۋقاستار تىركەلگەننەن كەيىن ەكى كۇن وتكەن سوڭ، پرەزيدەنت توقاەۆ 16 ناۋرىزدان باستاپ 15 ساۋىردەگى 7:00-گە دەيىن ەلدىڭ بارلىق اۋماعىندا توتەنشە جاعداي جاريالاۋعا №285 قاۋلىسىن شىعارىپ ەدى.

تج رەجيمى مەرزىمىنىڭ اياقتالۋىنا 5 كۇن قالعانىنا قاراماستان، كەيبىر وڭىرلەردە كارانتين ەندى ەنگىزىلدى. 17 ناۋرىز – الماتىدا، 19 ناۋرىز – استانادا، 30 ناۋرىز – اتىراۋ جانە اقتاۋدا، 31 ناۋرىز – اقمولا وبلىسىندا، 1 ءساۋىر – قىزىلوردا وبلىسىندا، 2 ءساۋىر – وسكەمەن جانە سەمەي قالالارىندا، 4 ءساۋىر –  شىمكەنتتە، 6 ءساۋىر – اقتوبە وبلىسىندا، 7 ءساۋىر – قاراعاندى وبلىسىندا، ال كەشەگى كۇننەن، 9 ساۋىردەن باستاپ جامبىل وبلىسىندا كارانتين جاريالاندى.

الەمنىڭ «ەسىن شىعارىپ، كوز توقتاتىپ ويلانۋعا ماجبۇرلەگەن» ىندەتتەن قازاقستاندا 9 ادام قايتىس بولسا، اي وتپەي جاتىپ 800-دەن استام ادام جۇقتىرىپ ۇلگەردى.  تىركەلگەن كەيستەر سانى بويىنشا الەمدە ازىرگە 73-ورىنعا تۇراقتادى.

يتاليا ۇكىمەتىنىڭ باسشىسى دجۋزەپپە كونتە ەلدە كوروناۆيرۋستىڭ تارالۋىن شەكتەۋ ماقساتىندا كارانتيندى 3 مامىرعا دەيىن  ۇزارتۋعا شەشىم قابىلداعانىن مالىمدەدى. كوپتەگەن ەلدەر تج رەجيمىن ۇزارتىپ جاتسا، جاپونيا ەندى قولعا الدى. كەشە، 9 ءساۋىر جاپون پرەمەر-ءمينيسترى سيندزو ابە ەلدە 6 مامىرعا دەيىن توتەنشە جاعداي ەنگىزدى. بۇل جاعدايدىڭ ءالى دە تۇراقتاماعانىن اڭعارتسا كەرەك-ءتى. قىتاي ساراپشىلارى  ىندەتتىڭ «ەكىنشى تولقىنىنان» قاۋىپتەنىپ وتىر.

“The Qazaq Times”