Foto: voxpopuli.kz/

8 säuirde  Ştab-päteri Parijde ornalasqan  «Adam qwqıqtarı jönindegi halıqaralıq federaciyası (FIDH)» älem elderiniñ ükimetterin koronavirus pandemiyası kezinde türmedegi qwqıq qorğauşılar men sayasi twtqındardı bosatuğa şaqırıp mälimdeme jasadı dep jazdı Ortalıq Aziya jañalıqtar qızmeti.

BWW-nıñ adam qwqıqtarı jönindegi Joğarğı komissarı Mişel' Baçelettıñ mälimşeuinşe, ükimetter negizsiz qamauğa alınğandar men jazıqsız qudalanğandardı bosatuı tiis. Kämelet jasqa tolmağandar, migranttar, bosqındar, sayasi baqtalastar, jurnalister, qwqıq qorğauşılar türmelerden şığuı tiis delingen mälimdemede.

Wyımnıñ veb-saytında türmede otırğan ondağan qwqıq qorğauşınıñ esimideri jariyalandı.

Koronavirus pandemiyası bastalğan uaqıtta älemniñ birqatar eli, sonıñ işinde Türkiya men Bahreyn, türmedegi twtqındardıñ bir böligin bosattı. Biraq terrorizmge qatısı bar ayıptarmen sottalğandar bwl tizimge kirmey qalğan. FIDH qamaudağı qwqıq qorğauşılardıñ deni terrorizmge qatıstı jalğan ayıptarmen otırğanın atap ötti.

Bwğan deyinde belgili qwqıq qorğauşı, zañger Abzal Qwspan el prezidenti Qasım-Jomart Toqaevqa aşıq hat jazıp eldegi tergeu izolyatorları men türmelerdegi jağdaydıñ halıqaralıq talaptarğa mülde say kelmeytini sebepti türmeler men tergeu izolyatorlarındağı jazası asa auır emes, kisi öltirmegen, qoğamğa qauip töndirmeytin nemese jaza merzimi ayaqtaluğa jaqın, ekonomikalıq qılmıstar boyınşa sottalğan azamattardı, sonıñ işinde zeynetkerler men äyelderdiñ jazaların jeñildetip, üyqamaqqa jiberu turalı wsınısın aytqan bolatın.

"The Qazaq Times"