Älem jwrtın dürliktirgen koronavirus derti pandemiyağa aynalğalı köpşilikten maza qaştı. Därihanalarda medicinalıq betperde tabu qiınday tüsti. Aragidik tabıla qoysa tabıs közine aynaldırğandar bağasın şarıqtatıp jibergen. Ädette 15-30 teñge aralığında twratın birrettik betperdeniñ özi onlayn dükenderde 120-140 teñge köleminde satılıp jatır.

Desek te aurudan tügel qorğamasa da, virustı süzip, ärtürli infekciyadan minimaldı deñgeyde qalqan bolatın betperdeni mamandar üy jağdayında da dayındauğa bolatının aytadı. Medicinalıq betperdeniñ tapşılığı tuğan şaqta ärtürli balamalı amaldar qoldanılatını belgili. Internet sayttarı men YouTube videohostinginde üyde betperde jasaudıñ san aluan ädisin tabuğa boladı.

Otandıq mamandardıñ biri medicinalıq-biotehnologiyalıq apparattar jäne jüyeler böliminiñ injeneri Serik Mwrathan üy jağdayında materialı maqtadan jasalğan mata arqılı birneşe märte qoldanuğa jaraytın betperde jasaudıñ «receptisimen» bölisti.

  1. Dükennen jwmsaq, maqtadan jasalğan mata satıp alamız. Mata boyauı şıqpaytın tabiği (natural) boluı kerek;
  2. Üyge äkelip tömendegi maskanıñ ülgisi negizinde pişemiz;
  3. Pişilgen materialdı üş qabat etip tigemiz. Bau tağamız;
  4. Är adamğa jwmıs uaqıtına jetetindey esepteymiz. (8 sağat + 2 sağat / jolğa ketetin uaqıt) Eki sağat sayın auıstıru üşin bir adamğa künine bes betperde qajet boladı;
  5. Tigilgen bes betperdeni sömkege salıp alamız;
  6. Är eki sağatta auıstırıp,qoldanılğan betperdeni bölek paketke salıp otıramız. Betperdeni auıstırğan soñ qoldı dizenfekciyalau şart;
  7. Üyge kelgennen keyin betperdeni kirjuğış maşinada nemese qolmen juıp, keptirip, qaytadan 2-3 minut eki jağınan ütiktep taza qalpında qoldanamız.

Mamannıñ sözinşe, qoldan jasalğan betperde käsipkerler ünemdep jasağan birrettik betperdesinen äldeqayda sapalı boladı.

Körneki suret. Foto: aşıq derekköz

"The Qazaq Times"