Astana qalasınıñ bas prokurorınıñ orınbasarı Eldos Kilımjanov Toqtasınwlı Dulat Ağadilge küş körsetilmegenin ayttı. 28 aqpan 2020 jıl. Astana. Foto: Azattıq

Bügin sağat 15:00-de astana prokuraturasında qala prokurorınıñ orınbasarı Eldos Toqtasınwlı bastağan resmi top türmede qaza bolğan qoğam belsendisi Dulat Ağadildiñ ölimine baylanıstı baspasöz brifingin ötkizdi.  

Ağadildiñ ölimi turalı aşıp aytpağan qala prokurorınıñ orınbasarı Eldos Kilımjanov «äleumettik jelilerde tarağan mäyitegi jaraqattı» aqtau mäninde mälimdeme jasadı. Ol:

– Birden aytayın marqwmnıñ denesi turalı videonı tuıstarınıñ rwqsatınsız taratu moral'ğa, etikalıq normağa qayşı. Deneni zertteudiñ nätijesi boyınşa, eşqanday zorlıq äreketiniñ belgileri anıqtalmadı. Ağadildiñ öliminiñ sebebi – jürek qan tamırına otteginiñ jetispeui. Denedegi daqtar mäyitte bolatın qalıptı qwbılıs. Şındıqqa janaspaytın aqparat taratpaularıñızdı swraymın. Marqwmnıñ anası bizge videonı tüsirip taratqandarğa şara qoldanudı swrap şağındı, – dedi.

Prokuror orınbasarınıñ sözinşe, zerthanalıq zertteu-saraptau jwmısınan keyin bir ayda naqtı qorıtındı şığarıladı. Tergeu ob'ektivti-operativti türde ayğaqtardı fiksaciyalaumen jürip jatır desedi.

Bes spiker qatısqan brifingte tek ekeui ğana qısqa qayıra söyledi.

301 sekundqa (5,1 minut) «sozılğan» baspasöz jiınında jauaptı mamandar tilşilerdiñ swraqtarına jauap bermey şığıp ketti. Artınan jügirgen jurnalisterdiñ «sud'yanı tildedi degen sebeppen tün işinde formasız barğan bir top policey äreketiniñ zañdılığı», «olardıñ kim ekeni» turalı swraqtarı jauapsız qaldı.

Facebook jelisinde «Dulat Ağadildiñ qamaudan keyingi ahualı» dep tarağan videoda kuägerler arqa jauırın twsı men ayaq sanınıñ kögerip-qarayğanı körinedi. Äleumettik jeli qoldanuşıları «zañ organdarı men sot jüyesine senim joğalğandıqtan el şındıq üşin öz betinşe osınday äreketke baruğa mäjbür bolatının» aytadı.

 “The Qazaq Times”