Osıdan üş ay bwrın astanadağı tergeu izolyatorında köz jwmğan azamattıq belsendi Dulat Ağadildiñ ölimine qatıstı is toqtatıldı. Qoğamdıq rezonans tudırıp, köpti aşındırğan "jwmbağı köp" qaza kütpegen jerden nege toqtadı? 

Astana prokuraturası iste qılmıstıq qwqıq bwzuşılıq oqiğası anıqtalmağanın habarladı.

"Oğan eşqayda şıqpau turalı bwltartpau şarasın bwzğanı jäne tergeu organınan jaltarğanı üşin izdeu jariyalanğan. Osı sebepterge baylanıstı Ağadilge qatıstı bwltartpau şarası qamauğa auıstırıldı. Osılayşa, sot ükiminiñ mindetti türde orındaluı turalı zañ talabı boyınşa policiya onı wstap, qamauğa aldı. Ağadildi wstau jäne onı qamauğa alu zañ ayasında jüzege asırıldı. Ölimniñ sebepteri men män-jayların täjiribeli mamandar men arnayı kardiologtar komissiyası mwqiyat zerttedi. Olardıñ arasında marqwmnıñ jaqın tuıstarınıñ ötinişi boyınşa tartılğan sarapşılar da boldı", – delingen habarlamada.

Prokuraturanıñ mälimdeuinşe, sarapşılar Ağadildiñ denesinde dene jaraqattarın tappağan.

"Ağadildiñ ölimine asqınğan miokard infarktı diagnozı sebep boldı. Auruınıñ saldarınan qan wyığıştığı bwzılıp, sol jaq jürek qarınşasında qan jetkiliksizdigi bayqalğan. Sonday-aq sarapşılar Ağadildiñ denesinen jaraqat belgilerin tappağan. Osığan oray, ağımdağı jıldıñ 25 mamırında Ağadildiñ ölimi turalı qılmıstıq is qılmıstıq qwqıq bwzuşılıqtıñ bolmauına baylanıstı toqtatıldı».

Bwğan deyin 24 aqpan keşkisin sağat 20:48-de formasız kelgen bir top policey "sotqa til tigizdi" degen ayıppen  Dulat Ağadildi "eşqayda ketpeu" şarası retinde üyinen alıp ketken edi. Biraq nebäri 30 şaqırımğa jeter-jetpes qaşıqtıqtağı izolyatorğa tüngi sağat 00:00 şamasında jetkizilip, erteñine, yağni aqpannıñ 25-i küni qaytıs bolğan. Qwzırlı organdar sol küni-aq azamattıq qwqıq pen demokratiyalıq qwndılıqtardıñ orındaluın talap etip, birneşe ret sottalğan belsendiniñ ölim sebebin "jürek qan tamırlarınıñ jetispeuşiligi" dep atağan.

Äleumettik jeli qoldanuşıları men Dulat Ağadildiñ qazasın aza twtqan astana, Almatı, Şımkent, Aqtöbe, Oral, Taraz qalalarına jinalğan belsendiler onı jürekten qayttı degen «resmi nwsqağa» senbeytinin, bwrın-soñdı densaulığına qatıstı şağımı bolmağanın aytıp edi. Ağadildiñ ruhın joqtağan, istiñ ädil äri aşıq jüruin talap etken jwrt birneşe kün boyı jinalıp prezident Toqaevtıñ, işki ister ministri Twrğımbaevtıñ atına talap-arız joldağan. Alayda eşqanday resmi jauap berilmedi.

Dulat Ağadildiñ «...sottaluğa da dayınmın. Öltirip te, wrıp ta, pışaqtap ta ketui mümkin. Mwnı istese, arnayı qızmetter ğana isteydi. Köşedegi bireu istemeydi. Öytkeni men köşede betaldı jürmeymin, araq işpeymin, temeki şekpeymin, basqa bireudiñ ala jibin attağan emespin, wrlıq jasmaymın. Sondıqtan mwnday äñgimeler bolıp jatsa, sabırlıq saqtap senbeñizder» dep biliktiñ arnayı küştik qwrılımınan seziktenetin äri qastandıq jasaluı ıqtimal ekenin aytqan beyneündeui internette tarağan.

Artında 6 birdey balası qalğan Dulat Ağadil – äleumettik problemalar jäne azamattıq qwqıqtı saqtau mäselesin köterip jürgen belsendi. Biıl tamız ayınan beri birneşe äkimşilik jazağa tartılıp, kem degende 60 täulik qamauda otırğan.

"The Qazaq Times"