Abaqtıda qaytıs bolğan Dulat Ağadildiñ qazasın ädil tekserudi jäne 22 aqpan mitingte wstalğandardı dereu bosatudı talap etip kelip twrğan belsendiler qalalıq prokuratura ğimaratınıñ aldında. 27 aqpan 2020 jıl. Almatı qalası. Foto: QT

Bügin Aqmola oblısındağı Talapker auılında juırda ğana 43 jasqa tolğan, "öliminiñ sayasi astarı bar" delinetin astanalıq azamattıq belsendi Dulat Ağadildiñ janazasınan soñ Almatı qalasında belsendiler qaralı jiın ötkizip, prokuraturadan soñğı mitingte wstalğandardı dereu bosatudı talap etip jatır.

Almatıdağı "Respublika" alañınıñ mañında da belsendiler jinalıp,  Dulat Ağadildiñ ölimine baylanıstı aza twttı. Jinalğandar arasında Baltaş Twrsımbaev jäne Jasaral Quanışalin qatarlı qoğam qayratkerleri  men jas sayasatker Janbolat Mamay bar. Belsendini sayasi jüyeniñ qwrbanı dep sanaytın jwrtşılıq Batıs Jeltoqsan-Mahatma Gandi köşeleriniñ qiılısındağı Almatı qalalıq prokuraturası ğimaratınıñ aldına barıp, "prokuror şıqsın", "bostandıq", "22-si wstalğandar bosatılsın", "Ağadildiñ ölimi ädil tergelsin" dep wrandastı.

Jinalğandar Dulat Ağadildiñ ölimine tikeley bilik kinäli,  bilik bwl arqılı qoğam belsendilerin qorqıtudı közdep otır,  bilikke qarsı şıqpauğa köndirgisi keledi dep sanaydı.

Däl qazir Almatı qalasınıñ prokurorı Jüyriktaev Berik Quanışbekwlınıñ halıq aldına şığuın talap etken 60-70 şaqtı belsendini policiya sırttay baqılap, torauıldap twr. Köpşilikpen tildesuge tırısqan, özin prokuror orınbasarınıñ ökilimin dep tanıstırğan şendiniñ sözin azamattar bölip, aytqızbay qoydı.

Qwqıq qorğau organınıñ ökili ortağa şığıp "Dulat Ağadildiñ qazasına biz de qayğırıp köñil aytamız. Mına jiındarıñız zañsız. Jauapkerşilik barın eskertemiz. Taraularıñızdı swraymız" dep ayttı.

Prokuratura ğimaratınıñ aldına jinalğandar "miting" emes, qaralı jiın ekenin aytadı. 27 aqpan 2020 jıl. Almatı qalası. Foto: QT

Soñğı beyneündeuiniñ birinde "öziniñ işimdik işpeytinin, temeki tartpaytının, bilik kez kelgen ädispen öltirui mümkin ekenin" eskertken Dulat Ağadildiñ belsendiler onıñ bwrın soñdı «jürek talmasımen» auırmağanın aytadı.

Belsendiniñ qaza bolğanı habar tarağan künnen beri astanada, Almatı jäne Şımkent qalasında jwrt narazılıqqa şıqqan. Alğaşqı küni-aq elordada eluge juıq belsendini policiya departamenti bastığınıñ birinşi orınbasarı Baqıtjan Malıbaev bastağan jasaq tört avtobusqa  küşpen tiep alıp ketken edi. Al keşkilik Almatıdağı Celinnıy kinoteatrınıñ mañına jinalğan 50-60 şaqtı belsendi prezident Qasım-Jomart Toqaev, qala prokurorı Berik Jüyriutaev  pen işki ister ministri Erlan Twrğımbaevtıñ atına talap arız jazıp, BAQ arqılı resmi türde jauap beruin swrağan bolatın.

24 aqpan keşkisin sağat 20:48-de formasız kelgen bir top policey "sotqa til tigizdi" degen ayıppen  Dulat Ağadildi «eşqayda ketpeu» turalı şarası retinde üyinen alıp ketken edi. Biraq bar bolğanı 30 şaqırımğa jeter-jetpes qaşıqtıqtağı izolyatorğa tüngi sağat 00:00 şamasında jetkizip, abaqtığa japqan.

Qwzırlı organdar 25 aqpan keşkisin ötken brifingte azamattıq qwqıq pen demokratiyalıq qwndılıqtardıñ orındaluın talap ete jürip birneşe ret sottalğan belsendi Ağadilov öliminiñ sebebin «jürek qan tamırlarınıñ jetispeuşiligi» dep atadı.

The Qazaq Times